Ganesha · Traditional devotional text · Source: vignanam.org (Traditional devotional text (public-domain shlokas))
1. śrī bāla gaṇapatiḥ karastha kadalīchūtapanasēkṣukamōdakam । bālasūryanibhaṃ vandē dēvaṃ bālagaṇādhipam ॥ 1 ॥
2. śrī taruṇa gaṇapatiḥ pāśāṅkuśāpūpakapitthajambū- -svadantaśālīkṣumapi svahastaiḥ । dhattē sadā yastaruṇāruṇābhaḥ pāyāt sa yuṣmāṃstaruṇō gaṇēśaḥ ॥ 2 ॥
Offered for worship and study, not as prediction. Non-commercial.
More devotional texts
3. śrī bhakta gaṇapatiḥ nārikēḻāmrakadalīguḍapāyasadhāriṇam । śarachchandrābhavapuṣaṃ bhajē bhaktagaṇādhipam ॥ 3 ॥
4. śrī vīra gaṇapatiḥ vētālaśaktiśarakārmukachakrakhaḍga- -khaṭvāṅgamudgaragadāṅkuśanāgapāśān । śūlaṃ cha kuntaparaśuṃ dhvajamudvahantaṃ vīraṃ gaṇēśamaruṇaṃ satataṃ smarāmi ॥ 4 ॥
5. śrī śakti gaṇapatiḥ āliṅgya dēvīṃ haritāṅgayaṣṭiṃ parasparāśliṣṭakaṭipradēśam । sandhyāruṇaṃ pāśasṛṇī vahantaṃ bhayāpahaṃ śaktigaṇēśamīḍē ॥ 5 ॥
6. śrī dvija gaṇapatiḥ yaṃ pustakākṣa guṇadaṇḍakamaṇḍalu śrī- -vidyōtamānakarabhūṣaṇaminduvarṇam । stambēramānanachatuṣṭayaśōbhamānaṃ tvāṃ yaḥ smarēt dvijagaṇādhipatē sa dhanyaḥ ॥ 6 ॥
7. śrī siddha gaṇapatiḥ pakvachūtaphalapuṣpamañjarī- -rikṣudaṇḍatilamōdakaiḥ saha । udvahan paraśumastu tē namaḥ śrīsamṛddhiyuta hēmapiṅgaḻa ॥ 7 ॥
8. śrī uchChiṣṭa gaṇapatiḥ nīlābjadāḍimīvīṇāśālīguñjākṣasūtrakam । dadhaduchChiṣṭanāmāyaṃ gaṇēśaḥ pātu mēchakaḥ ॥ 8 ॥
9. śrī vighna gaṇapatiḥ śaṅkhēkṣuchāpakusumēṣukuṭhārapāśa- -chakrasvadantasṛṇimañjarikāśarādyaiḥ । pāṇiśritaiḥ parisamīhitabhūṣaṇaśrī- -vighnēśvarō vijayatē tapanīyagauraḥ ॥ 9 ॥
10. śrī kṣipra gaṇapatiḥ dantakalpalatāpāśaratnakumbhāṅkuśōjjvalam । bandhūkakamanīyābhaṃ dhyāyēt kṣipragaṇādhipam ॥ 10 ॥
11. śrī hēramba gaṇapatiḥ abhayavaradahastaḥ pāśadantākṣamālā- -sṛṇiparaśu dadhānō mudgaraṃ mōdakaṃ cha । phalamadhigatasiṃhaḥ pañchamātaṅgavaktrō gaṇapatiratigauraḥ pātu hērambanāmā ॥ 11 ॥
12. śrī lakṣmī gaṇapatiḥ bibhrāṇaḥ śukabījapūrakamilanmāṇikyakumbhākuśān pāśaṃ kalpalatāṃ cha khaḍgavilasajjyōtiḥ sudhānirjharaḥ । śyāmēnāttasarōruhēṇa sahitaṃ dēvīdvayaṃ chāntikē gaurāṅgō varadānahastasahitō lakṣmīgaṇēśō'vatāt ॥ 12 ॥
13. śrī mahā gaṇapatiḥ hastīndrānanaminduchūḍamaruṇachChāyaṃ trinētraṃ rasā- -dāśliṣṭaṃ priyayā sapadmakarayā svāṅkasthayā santatam । bījāpūragadēkṣukārmukalasachchakrābjapāśōtpala- -vrīhyagrasvaviṣāṇaratnakalaśān hastairvahantaṃ bhajē ॥ 13 ॥
14. śrī vijaya gaṇapatiḥ pāśāṅkuśasvadantāmraphalavānākhuvāhanaḥ । vighnaṃ nihantu naḥ sarvaṃ raktavarṇō vināyakaḥ ॥ 14 ॥
15. śrī nṛtta gaṇapatiḥ pāśāṅkuśāpūpakuṭhāradanta- -chañchatkarākluptavarāṅgulīkam । pītaprabhaṃ kalpatarōradhasthaṃ bhajāmi nṛttōpapadaṃ gaṇēśam ॥ 15 ॥
16. śrī ūrdhva gaṇapatiḥ kalhāraśālikamalēkṣukachāpabāṇa- -dantaprarōhakagadī kanakōjjvalāṅgaḥ । āliṅganōdyatakarō haritāṅgayaṣṭyā dēvyā karōtu śubhamūrdhvagaṇādhipō mē ॥ 16 ॥
17. śrī ēkākṣara gaṇapatiḥ raktō raktāṅgarāgāṅkuśakusumayutastundilaśchandramauḻiḥ nētrairyuktastribhirvāmanakaracharaṇō bījapūraṃ dadhānaḥ । hastāgrāklupta pāśāṅkuśaradavaradō nāgavaktrō'hibhūṣō dēvaḥ padmāsanasthō bhavatu sukhakarō bhūtayē vighnarājaḥ ॥ 17 ॥
18. śrī vara gaṇapatiḥ sindūrābhamibhānanaṃ trinayanaṃ hastē cha pāśāṅkuśau bibhrāṇaṃ madhumatkapālamaniśaṃ sādhvindumauḻiṃ bhajē । puṣṭyāśliṣṭatanuṃ dhvajāgrakarayā padmōllasaddhastayā tadyōnyāhita pāṇimāttavasumatpātrōllasatpuṣkaram ॥ 18 ॥
19. śrī tryakṣara gaṇapatiḥ gajēndravadanaṃ sākṣāchchalatkarṇasuchāmaraṃ hēmavarṇaṃ chaturbāhuṃ pāśāṅkuśadharaṃ varam । svadantaṃ dakṣiṇē hastē savyē tvāmrapalaṃ tathā puṣkarairmōdakaṃ chaiva dhārayantamanusmarēt ॥ 19 ॥
20. śrī kṣipraprasāda gaṇapatiḥ dhṛtapāśāṅkuśakalpalatā svaradaścha bījapūrayutaḥ śaśiśakalakalitamauḻistrilōchanō'ruṇaścha gajavadanaḥ । bhāsurabhūṣaṇadīptō bṛhadudaraḥ padmaviṣṭarōllasitaḥ vighnapayōdharapavanaḥ karadhṛtakamalaḥ sadāstu mē bhūtyai ॥ 20 ॥
21. śrī haridrā gaṇapatiḥ haridrābhaṃ chaturbāhuṃ karīndravadanaṃ prabhum । pāśāṅkuśadharaṃ dēvaṃ mōdakaṃ dantamēva cha । bhaktābhayapradātāraṃ vandē vighnavināśanam ॥ 21 ॥
22. śrī ēkadanta gaṇapatiḥ lambōdaraṃ śyāmatanuṃ gaṇēśaṃ kuṭhāramakṣasrajamūrdhvagātram । salaḍḍukaṃ dantamadhaḥ karābhyāṃ vāmētarābhyāṃ cha dadhānamīḍē ॥ 22 ॥
23. śrī sṛṣṭi gaṇapatiḥ pāśāṅkuśasvadantāmraphalavānākhuvāhanaḥ । vighnaṃ nihantu naḥ śōṇaḥ sṛṣṭidakṣō vināyakaḥ ॥ 23 ॥
24. śrī uddaṇḍa gaṇapatiḥ kalhārāmbujabījapūrakagadādantēkṣuchāpaṃ sumaṃ bibhrāṇō maṇikumbhaśālikalaśau pāśaṃ sṛṇiṃ chābjakam । gaurāṅgyā ruchirāravindakarayā dēvyā samāliṅgataḥ śōṇāṅgaḥ śubhamātanōtu bhajatāmuddaṇḍavighnēśvaraḥ ॥ 24 ॥
25. śrī ṛṇamōchaka gaṇapatiḥ pāśāṅkuśau dantajambu dadhānaḥ sphāṭikaprabhaḥ । raktāṃśukō gaṇapatirmudē syādṛṇamōchakaḥ ॥ 25 ॥
26. śrī ḍhuṇḍhi gaṇapatiḥ akṣamālāṃ kuṭhāraṃ cha ratnapātraṃ svadantakam । dhattē karairvighnarājō ḍhuṇḍhināmā mudē'stu naḥ ॥ 26 ॥
27. śrī dvimukha gaṇapatiḥ svadantapāśāṅkuśaratnapātraṃ karairdadhānō harinīlagātraḥ । raktāṃśukō ratnakirīṭamālī bhūtyai sadā mē dvimukhō gaṇēśaḥ ॥ 27 ॥
28. śrī trimukha gaṇapatiḥ śrīmattīkṣṇaśikhāṅkuśākṣavaradān dakṣē dadhānaḥ karaiḥ pāśaṃ chāmṛtapūrṇakumbhamabhayaṃ vāmē dadhānō mudā । pīṭhē svarṇamayāravindavilasatsatkarṇikābhāsurē svāsīnastrimukhaḥ palāśaruchirō nāgānanaḥ pātu naḥ ॥ 28 ॥
29. śrī siṃha gaṇapatiḥ vīṇāṃ kalpalatāmariṃ cha varadaṃ dakṣē vidattē karai- -rvāmē tāmarasaṃ cha ratnakalaśaṃ sanmañjarīṃ chābhayam । śuṇḍādaṇḍalasanmṛgēndravadanaḥ śaṅkhēndugauraḥ śubhō dīvyadratnanibhāṃśukō gaṇapatiḥ pāyādapāyat sa naḥ ॥ 29 ॥
30. śrī yōga gaṇapatiḥ yōgārūḍhō yōgapaṭṭābhirāmō bālārkābhaśchēndranīlāṃśukāḍhyaḥ । pāśēkṣvakṣān yōgadaṇḍaṃ dadhānō pāyānnityaṃ yōgavighnēśvarō naḥ ॥ 30 ॥
31. śrī durgā gaṇapatiḥ taptakāñchanasaṅkāśaśchāṣṭahastō mahattanuḥ dīptāṅkuśaṃ śaraṃ chākṣaṃ dantu dakṣē vahan karaiḥ । vāmē pāśaṃ kārmukaṃ cha latāṃ jambu dadhatkaraiḥ raktāṃśukaḥ sadā bhūyāddurgāgaṇapatirmudē ॥ 31 ॥
32. śrī saṅkaṣṭahara gaṇapatiḥ bālārkāruṇakāntirvāmē bālāṃ vahannaṅkē lasadindīvarahastāṃ gaurāṅgīṃ ratnaśōbhāḍhyām । dakṣē'ṅkuśavaradānaṃ vāmē pāśaṃ cha pāyasaṃ pātraṃ nīlāṃśukalasamānaḥ pīṭhē padmāruṇē tiṣṭhan ॥ 32 ॥ saṅkaṭaharaṇaḥ pāyāt saṅkaṭapūgādgajānanō nityam ।
śrī vallabha gaṇapati bījāpūra gadēkṣukārmukabhujāchakrābja pāśōtpala vrīhyagrasvaviṣāṇa ratnakalaśa prōdyatkarāmbhōruhaḥ । dhyēyō vallabhayā cha padmakarayāśliṣṭō jvaladbhūṣayā viśvōtpattivināśasaṃsthitikarō vighnō viśiṣṭārthadaḥ ॥
śrī siddhidēvī pītavarṇāṃ dvinētrāṃ tāmēkavaktrāmbujadvayāṃ navaratnakirīṭāṃ cha pītāmbarasudhāriṇīm । vāmahastē mahāpadmaṃ dakṣē lambakarānvitāṃ jājīchampakamālāṃ cha tribhaṅgīṃ lalitāṅgikām ॥ gaṇēśadakṣiṇē bhāgē guruḥ siddhiṃ tu bhāvayēt ॥
śrī buddhidēvī dvihastāṃ cha dvinētrāṃ tāmēkavaktrāṃ tribhaṅgikāṃ muktāmaṇikirīṭāṃ cha dakṣē hastē mahōtpalam । vāmē pralambahastāṃ cha divyāmbarasudhāriṇīṃ śyāmavarṇanibhāṃ bhāsvatsarvābharaṇabhūṣitām ॥ pārijātōtpalāmālyāṃ gaṇēśō vāmapārśvakē dhyātvā buddhiṃ surūpāṃ samarchayēddēśikōttamaḥ ॥
Browse Related Categories: