Kamasika Ashtakam

śrutīnāmuttaraṃ bhāgaṃ vēgavatyāścha dakṣiṇam । kāmādadhivasan jīyāt kaśchidadbhuta kēsarī ॥ 1 ॥

tapanēndvagninayanaḥ tāpānapachinōtu naḥ । tāpanīyarahasyānāṃ sāraḥ kāmāsikā hariḥ ॥ 2 ॥

ākaṇṭhamādipuruṣaṃ kaṇṭhīravamupari kuṇṭhitārātim । vēgōpakaṇṭhasaṅgāt vimuktavaikuṇṭhabahumatimupāsē ॥ 3 ॥

bandhumakhilasya jantōḥ bandhuraparyaṅkabandharamaṇīyam । viṣamavilōchanamīḍē vēgavatīpuḻinakēḻinarasiṃham ॥ 4 ॥

svasthānēṣu marudgaṇān niyamayan svādhīnasarvēndriyaḥ paryaṅkasthiradhāraṇā prakaṭitapratyaṅmukhāvasthitiḥ । prāyēṇa praṇipēduṣaḥ prabhurasau yōgaṃ nijaṃ śikṣayan kāmānātanutādaśēṣajagatāṃ kāmāsikā kēsarī ॥ 5 ॥

vikasvaranakhasvarukṣatahiraṇyavakṣaḥsthalī- -nirargalavinirgaladrudhirasindhusandhyāyitāḥ । avantu madanāsikāmanujapañchavaktrasya māṃ ahamprathamikāmithaḥ prakaṭitāhavā bāhavaḥ ॥ 6 ॥

saṭāpaṭalabhīṣaṇē sarabhasāṭṭahāsōdbhaṭē sphurat krudhiparisphuṭa bhrukuṭikē'pi vaktrē kṛtē । kṛpākapaṭakēsarin danujaḍimbhadattastanā sarōjasadṛśā dṛśā vyativiṣajya tē vyajyatē ॥ 7 ॥

tvayi rakṣati rakṣakaiḥ kimanyai- -stvayi chārakṣati rakṣakaiḥ kimanyaiḥ । iti niśchitadhīḥ śrayāmi nityaṃ nṛharē vēgavatītaṭāśrayaṃ tvām ॥ 8 ॥