Narayaniyam Dashaka 32

purā hayagrīvamahāsurēṇa ṣaṣṭhāntarāntōdyadakāṇḍakalpē । nidrōnmukhabrahmamukhāt hṛtēṣu vēdēṣvadhitsaḥ kila matsyarūpam ॥1॥

satyavratasya dramilādhibharturnadījalē tarpayatastadānīm । karāñjalau sañjvalitākṛtistvamadṛśyathāḥ kaśchana bālamīnaḥ ॥2॥

kṣiptaṃ jalē tvāṃ chakitaṃ vilōkya ninyē'mbupātrēṇa muniḥ svagēham । svalpairahōbhiḥ kalaśīṃ cha kūpaṃ vāpīṃ saraśchānaśiṣē vibhō tvam ॥3॥

yōgaprabhāvādbhavadājñayaiva nītastatastvaṃ muninā payōdhim । pṛṣṭō'munā kalpadidṛkṣumēnaṃ saptāhamāsvēti vadannayāsīḥ ॥4॥

prāptē tvaduktē'hani vāridhārāpariplutē bhūmitalē munīndraḥ । saptarṣibhiḥ sārdhamapāravāriṇyudghūrṇamānaḥ śaraṇaṃ yayau tvām ॥5॥

dharāṃ tvadādēśakarīmavāptāṃ naurūpiṇīmāruruhustadā tē tatkampakamprēṣu cha tēṣu bhūyastvamambudhērāvirabhūrmahīyān ॥6॥

jhaṣākṛtiṃ yōjanalakṣadīrghāṃ dadhānamuchchaistaratējasaṃ tvām । nirīkṣya tuṣṭā munayastvaduktyā tvattuṅgaśṛṅgē taraṇiṃ babandhuḥ ॥7॥

ākṛṣṭanaukō munimaṇḍalāya pradarśayan viśvajagadvibhāgān । saṃstūyamānō nṛvarēṇa tēna jñānaṃ paraṃ chōpadiśannachārīḥ ॥8॥