Narayaniyam Dashaka 49

bhavatprabhāvāvidurā hi gōpāstaruprapātādikamatra gōṣṭhē । ahētumutpātagaṇaṃ viśaṅkya prayātumanyatra manō vitēnuḥ ॥1॥

tatrōpanandābhidhagōpavaryō jagau bhavatprēraṇayaiva nūnam । itaḥ pratīchyāṃ vipinaṃ manōjñaṃ vṛndāvanaṃ nāma virājatīti ॥2॥

bṛhadvanaṃ tat khalu nandamukhyā vidhāya gauṣṭhīnamatha kṣaṇēna । tvadanvitatvajjananīniviṣṭagariṣṭhayānānugatā vichēluḥ ॥3॥

anōmanōjñadhvanidhēnupālīkhurapraṇādāntaratō vadhūbhiḥ । bhavadvinōdālapitākṣarāṇi prapīya nājñāyata mārgadairghyam ॥4॥

nirīkṣya vṛndāvanamīśa nandatprasūnakundapramukhadrumaugham । amōdathāḥ śādvalasāndralakṣmyā harinmaṇīkuṭṭimapuṣṭaśōbham ॥5॥

navākanirvyūḍhanivāsabhēdēṣvaśēṣagōpēṣu sukhāsitēṣu । vanaśriyaṃ gōpakiśōrapālīvimiśritaḥ paryagalōkathāstvam ॥6॥

arālamārgāgatanirmalāpāṃ marālakūjākṛtanarmalāpām । nirantarasmērasarōjavaktrāṃ kalindakanyāṃ samalōkayastvam ॥7॥

mayūrakēkāśatalōbhanīyaṃ mayūkhamālāśabalaṃ maṇīnām । viriñchalōkaspṛśamuchchaśṛṅgairgiriṃ cha gōvardhanamaikṣathāstvam ॥8॥