Vedic · Traditional devotional text · Source: vignanam.org (Traditional devotional text (public-domain shlokas))
(tai. brā. 2.8.8.6)
śra̠ddhayā̠-'gni-ssami̍dhyatē । śra̠ddhayā̍ vindatē ha̠viḥ । śra̠ddhā-mbhaga̍sya mū̠rdhani̍ । vacha̠sā-''vē̍dayāmasi । pri̠yagg śra̍ddhē̠ dada̍taḥ । pri̠yagg śra̍ddhē̠ didā̍sataḥ । pri̠ya-mbhō̠jēṣu̠ yajva̍su ॥
i̠da-mma̍ udi̠ta-ṅkṛ̍dhi । yathā̍ dē̠vā asu̍rēṣu । śra̠ddhāmu̠grēṣu̍ chakri̠rē । ē̠va-mbhō̠jēṣu̠ yajva̍su । a̠smāka̍mudi̠ta-ṅkṛ̍dhi । śra̠ddhā-ndē̍vā̠ yaja̍mānāḥ । vā̠yugō̍pā̠ upā̍satē । śra̠ddhāgṃ hṛ̍da̠yya̍yā-''kū̎tyā । śra̠ddhayā̍ hūyatē ha̠viḥ । śra̠ddhā-mprā̠tarha̍vāmahē ॥
śra̠ddhā-mma̠dhyandi̍na̠-mpari̍ । śra̠ddhāgṃ sūrya̍sya ni̠mṛchi̍ । śraddhē̠ śraddhā̍payē̠ha mā̎ । śra̠ddhā dē̠vānadhi̍vastē । śra̠ddhā viśva̍mi̠da-ñjaga̍t । śra̠ddhā-ṅkāma̍sya mā̠taram̎ । ha̠viṣā̍ vardhayāmasi ।
Browse Related Categories:
Offered for worship and study, not as prediction. Non-commercial.