Nitya Parayana · Traditional devotional text · Source: vignanam.org (Traditional devotional text (public-domain shlokas))
ā tū na̍ indra kṣu̠manta̎-ñchi̠tra-ṅgrā̠bhaṃ sa-ṅgṛ̍bhāya । ma̠hā̠ha̠stī dakṣi̍ṇēna ॥ 1 ॥
vi̠dmā hi tvā̎ tuvikū̠rmintu̠vidē̎ṣṇa-ntu̠vīma̍gham । tu̠vi̠mā̠tramavō̎bhiḥ ॥ 2 ॥
na̠ hi tvā̎ śūra dē̠vā na martā̎sō̠ ditsa̎ntam । bhī̠ma-nna gāṃ vā̠raya̎ntē ॥ 3 ॥
ētō̠nvindra̠ṃ stavā̠mēśā̎na̠ṃ vasva̍-ssva̠rājam̎ । na rādha̍sā mardhiṣannaḥ ॥ 4 ॥
pra stō̎ṣa̠dupa̍ gāsiṣa̠chChrava̠tsāma̍ gī̠yamā̎nam । a̠bhirādha̍sājugurat ॥ 5 ॥
ā nō̎ bhara̠ dakṣi̍ṇēnā̠bhi sa̠vyēna̠ pra mṛ̍śa । indra̠ mānō̠ vasō̠rnirbhā̎k ॥ 6 ॥
upa̍krama̠svā bha̍ra dhṛṣa̠tā dhṛ̍ṣṇō̠ janā̎nām । adā̎śūṣṭarasya̠ vēda̍ḥ ॥ 7 ॥
indra̠ ya u̠ nu tē̠ asti̠ vājō̠ viprē̎bhi̠-ssani̍tvaḥ । a̠smābhi̠-ssutaṃ sa̍nuhi ॥ 8 ॥
sa̠dyō̠juva̍stē̠ vājā̎ a̠smabhya̎ṃ vi̠śvaścha̎ndrāḥ । vaśai̎ścha ma̠kṣū ja̍rantē ॥ 9 ॥
Offered for worship and study, not as prediction. Non-commercial.
ga̠ṇānā̎-ntvā ga̠ṇapa̍tiṃ havāmahē ka̠vi-ṅka̍vī̠nāmu̍pa̠maśra̍vastamam । jyē̠ṣṭha̠rāja̠-mbrahma̍ṇā-mbrahmaṇaspata̠ ā na̍-śśṛ̠ṇvannū̠tibhi̍ssīda̠ sāda̍nam ॥ 10 ॥
ni ṣu sī̎da gaṇapatē ga̠ṇēṣu̠ tvāmā̎hu̠rvipra̍tama-ṅkavī̠nām । na ṛ̠tē tvatkri̍yatē̠ ki-ñcha̠nārē ma̠hāma̠rka-mma̍ghavañchi̠trama̍rcha ॥ 11 ॥
a̠bhi̠khyānō̎ maghava̠nnādha̍mānā̠ntsakhē̎ bō̠dhi va̍supatē̠ sakhī̎nām । raṇaṃ̎ kṛdhi raṇakṛtsatyaśu̠ṣmābha̍ktē chi̠dā bha̍jā rā̠yē a̠smān ॥ 12 ॥
Browse Related Categories: