Sri Gurugita Chapter 3

gurumantrō mukhē yasya tasya siddhyanti nā'nyathā । dīkṣayā sarvakarmāṇi siddhyanti guruputrakē ॥ 244 ॥

bhavamūlavināśāya chāṣṭapāśanivṛttayē । gurugītāmbhasi snānaṃ tattvajñaḥ kurutē sadā ॥ 245 ॥

sa ēvaṃ sadguruḥ sākṣāt sadasadbrahmavittamaḥ । tasya sthānāni sarvāṇi pavitrāṇi na saṃśayaḥ ॥ 246 ॥

sarvaśuddhaḥ pavitrō'sau svabhāvādyatra tiṣṭhati । tatra dēvagaṇāḥ sarvē kṣētrapīṭhē charanti cha ॥ 247 ॥

āsanasthāḥ śayānā vā gachChantastiṣṭhatō'pi vā । aśvārūḍhā gajārūḍhāḥ suṣuptā jāgratō'pi vā ॥ 248 ॥

śuchirbhūtā jñānavantō gurugītāṃ japanti yē । tēṣāṃ darśanasaṃsparśāt divyajñānaṃ prajāyatē ॥ 249 ॥

samudrē vai yathā tōyaṃ kṣīrē kṣīraṃ jalē jalam । bhinnē kumbhē yathā''kāśaṃ tathā''tmā paramātmani ॥ 250 ॥

tathaiva jñānavān jīvaḥ paramātmani sarvadā । aikyēna ramatē jñānī yatra kutra divāniśam ॥ 251 ॥

ēvaṃvidhō mahāyuktaḥ sarvatra vartatē sadā । tasmātsarvaprakārēṇa gurubhaktiṃ samācharēt ॥ 252 ॥

gurusantōṣaṇādēva muktō bhavati pārvati । aṇimādiṣu bhōktṛtvaṃ kṛpayā dēvi jāyatē ॥ 253 ॥

sāmyēna ramatē jñānī divā vā yadi vā niśi । ēvaṃvidhō mahāmaunī trailōkyasamatāṃ vrajēt ॥ 254 ॥

atha saṃsāriṇaḥ sarvē gurugītā japēna tu । sarvān kāmāṃstu bhuñjanti trisatyaṃ mama bhāṣitam ॥ 255 ॥

satyaṃ satyaṃ punaḥ satyaṃ dharmasāraṃ mayōditam । gurugītāsamaṃ stōtraṃ nāsti tattvaṃ gurōḥ param ॥ 256 ॥

gururdēvō gururdharmō gurau niṣṭhā paraṃ tapaḥ । gurōḥ parataraṃ nāsti trivāraṃ kathayāmi tē ॥ 257 ॥

dhanyā mātā pitā dhanyō gōtraṃ dhanyaṃ kulōdbhavaḥ । dhanyā cha vasudhā dēvi yatra syādgurubhaktatā ॥ 258 ॥

ākalpajanma kōṭīnāṃ yajñavratatapaḥ kriyāḥ । tāḥ sarvāḥ saphalā dēvi gurūsantōṣamātrataḥ ॥ 259 ॥

śarīramindriyaṃ prāṇamarthaṃ svajanabandhutā । mātṛkulaṃ pitṛkulaṃ gururēva na saṃśayaḥ ॥ 260 ॥

mandabhāgyā hyaśaktāścha yē janā nānumanvatē । gurusēvāsu vimukhāḥ pachyantē narakē'śuchau ॥ 261 ॥

vidyā dhanaṃ balaṃ chaiva tēṣāṃ bhāgyaṃ nirarthakam । yēṣāṃ gurūkṛpā nāsti adhō gachChanti pārvati ॥ 262 ॥

brahmā viṣṇuścha rudraścha dēvāścha pitṛkinnarāḥ । siddhachāraṇayakṣāścha anyē cha munayō janāḥ ॥ 263 ॥

gurubhāvaḥ paraṃ tīrthamanyatīrthaṃ nirarthakam । sarvatīrthamayaṃ dēvi śrīgurōścharaṇāmbujam ॥ 264 ॥

kanyābhōgaratā mandāḥ svakāntāyāḥ parāṅmukhāḥ । ataḥ paraṃ mayā dēvi kathitaṃ na mama priyē ॥ 265 ॥

idaṃ rahasyamaspaṣṭaṃ vaktavyaṃ cha varānanē । sugōpyaṃ cha tavāgrē tu mamātmaprītayē sati ॥ 266 ॥

svāmimukhyagaṇēśādyān vaiṣṇavādīṃścha pārvati । na vaktavyaṃ mahāmāyē pādasparśaṃ kuruṣva mē ॥ 267 ॥

abhaktē vañchakē dhūrtē pāṣaṇḍē nāstikādiṣu । manasā'pi na vaktavyā gurugītā kadāchana ॥ 268 ॥

guravō bahavaḥ santi śiṣyavittāpahārakāḥ । tamēkaṃ durlabhaṃ manyē śiṣyahṛttāpahārakam ॥ 269 ॥

chāturyavān vivēkī cha adhyātmajñānavān śuchiḥ । mānasaṃ nirmalaṃ yasya gurutvaṃ tasya śōbhatē ॥ 270 ॥

guravō nirmalāḥ śāntāḥ sādhavō mitabhāṣiṇaḥ । kāmakrōdhavinirmuktāḥ sadāchārāḥ jitēndriyāḥ ॥ 271 ॥

sūchakādiprabhēdēna guravō bahudhā smṛtāḥ । svayaṃ samyak parīkṣyātha tattvaniṣṭhaṃ bhajētsudhīḥ ॥ 272 ॥

varṇajālamidaṃ tadvadbāhyaśāstraṃ tu laukikam । yasmin dēvi samabhyastaṃ sa guruḥ suchakaḥ smṛtaḥ ॥ 273 ॥

varṇāśramōchitāṃ vidyāṃ dharmādharmavidhāyinīm । pravaktāraṃ guruṃ viddhi vāchakaṃ tviti pārvati ॥ 274 ॥

pañchākṣaryādimantrāṇāmupadēṣṭā tu pārvati । sa gururbōdhakō bhūyādubhayōrayamuttamaḥ ॥ 275 ॥

mōhamāraṇavaśyādituchChamantrōpadēśinam । niṣiddhagururityāhuḥ paṇḍitāstattvadarśinaḥ ॥ 276 ॥

anityamiti nirdiśya saṃsāraṃ saṅkaṭālayam । vairāgyapathadarśī yaḥ sa gururvihitaḥ priyē ॥ 277 ॥

tattvamasyādivākyānāmupadēṣṭā tu pārvati । kāraṇākhyō guruḥ prōktō bhavarōganivārakaḥ ॥ 278 ॥

sarvasandēhasandōhanirmūlanavichakṣaṇaḥ । janmamṛtyubhayaghnō yaḥ sa guruḥ paramō mataḥ ॥ 279 ॥

bahujanmakṛtāt puṇyāllabhyatē'sau mahāguruḥ । labdhvā'muṃ na punaryāti śiṣyaḥ saṃsārabandhanam ॥ 280 ॥

ēvaṃ bahuvidhā lōkē guravaḥ santi pārvati । tēṣu sarvaprayatnēna sēvyō hi paramō guruḥ ॥ 281 ॥

niṣiddhaguruśiṣyastu duṣṭasaṅkalpadūṣitaḥ । brahmapraḻayaparyantaṃ na punaryāti martyatām ॥ 282 ॥

ēvaṃ śrutvā mahādēvī mahādēvavachastathā । atyantavihvalamanāḥ śaṅkaraṃ paripṛchChati ॥ 283 ॥

pārvatyuvācha

namastē dēvadēvātra śrōtavyaṃ kiñchidasti mē । śrutvā tvadvākyamadhunā bhṛśaṃ syādvihvalaṃ manaḥ ॥ 284

svayaṃ mūḍhā mṛtyubhītāḥ sukṛtādviratiṃ gatāḥ । daivānniṣiddhagurugā yadi tēṣāṃ tu kā gatiḥ ॥ 285 ॥

śrī mahādēva uvācha

śṛṇu tattvamidaṃ dēvi yadā syādviratō naraḥ । tadā'sāvadhikārīti prōchyatē śrutimastakaiḥ ॥ 286

akhaṇḍaikarasaṃ brahma nityamuktaṃ nirāmayam । svasmin sandarśitaṃ yēna sa bhavēdasyaṃ dēśikaḥ ॥ 287 ॥

jalānāṃ sāgarō rājā yathā bhavati pārvati । gurūṇāṃ tatra sarvēṣāṃ rājā'yaṃ paramō guruḥ ॥ 288 ॥

mōhādirahitaḥ śāntō nityatṛptō nirāśrayaḥ । tṛṇīkṛtabrahmaviṣṇuvaibhavaḥ paramō guruḥ ॥ 289 ॥

sarvakālavidēśēṣu svatantrō niśchalassukhī । akhaṇḍaikarasāsvādatṛptō hi paramō guruḥ ॥ 290 ॥

dvaitādvaitavinirmuktaḥ svānubhūtiprakāśavān । ajñānāndhatamaśChēttā sarvajñaḥ paramō guruḥ ॥ 291 ॥

yasya darśanamātrēṇa manasaḥ syāt prasannatā । svayaṃ bhūyāt dhṛtiśśāntiḥ sa bhavēt paramō guruḥ ॥ 292 ॥

siddhijālaṃ samālōkya yōgināṃ mantravādinām । tuchChākāramanōvṛttiḥ yasyāsau paramō guruḥ ॥ 293 ॥

svaśarīraṃ śavaṃ paśyan tathā svātmānamadvayam । yaḥ strīkanakamōhaghnaḥ sa bhavēt paramō guruḥ ॥ 294 ॥

maunī vāgmīti tattvajñō dvidhā'bhūchChṛṇu pārvati । na kaśchinmaunināṃ lōbhō lōkē'sminbhavati priyē ॥ 295 ॥

vāgmī tūtkaṭasaṃsārasāgarōttāraṇakṣamaḥ । yatō'sau saṃśayachChēttā śāstrayuktyanubhūtibhiḥ ॥ 296 ॥

gurunāmajapāddēvi bahujanmārjitānyapi । pāpāni vilayaṃ yānti nāsti sandēhamaṇvapi ॥ 297 ॥

śrīgurōssadṛśaṃ daivaṃ śrīgurōsadṛśaḥ pitā । gurudhyānasamaṃ karma nāsti nāsti mahītalē ॥ 298 ॥

kulaṃ dhanaṃ balaṃ śāstraṃ bāndhavāssōdarā imē । maraṇē nōpayujyantē gururēkō hi tārakaḥ ॥ 299 ॥

kulamēva pavitraṃ syāt satyaṃ svagurusēvayā । tṛptāḥ syussakalā dēvā brahmādyā gurutarpaṇāt ॥ 300 ॥

gururēkō hi jānāti svarūpaṃ dēvamavyayam । tad​jñānaṃ yatprasādēna nānyathā śāstrakōṭibhiḥ ॥ 301 ॥

svarūpajñānaśūnyēna kṛtamapyakṛtaṃ bhavēt । tapōjapādikaṃ dēvi sakalaṃ bālajalpavat ॥ 302 ॥

śivaṃ kēchiddhariṃ kēchidvidhiṃ kēchittu kēchana । śaktiṃ daivamiti jñātvā vivadanti vṛthā narāḥ ॥ 303 ॥

na jānanti paraṃ tattvaṃ gurudīkṣāparāṅmukhāḥ । bhrāntāḥ paśusamā hyētē svaparijñānavarjitāḥ ॥ 304 ॥

tasmātkaivalyasiddhyarthaṃ gurumēva bhajētpriyē । guruṃ vinā na jānanti mūḍhāstatparamaṃ padam ॥ 305 ॥

bhidyatē hṛdayagranthiśChidyantē sarvasaṃśayāḥ । kṣīyantē sarvakarmāṇi gurōḥ karuṇayā śivē ॥ 306 ॥

kṛtāyā gurubhaktēstu vēdaśāstrānusārataḥ । muchyatē pātakādghōrāt gurubhaktō viśēṣataḥ ॥ 307 ॥

dussaṅgaṃ cha parityajya pāpakarma parityajēt । chittachihnamidaṃ yasya tasya dīkṣā vidhīyatē ॥ 308 ॥

chittatyāganiyuktaścha krōdhagarvavivarjitaḥ । dvaitabhāvaparityāgī tasya dīkṣā vidhīyatē ॥ 309 ॥

ētallakṣaṇayuktatvaṃ sarvabhūtahitē ratam । nirmalaṃ jīvitaṃ yasya tasya dīkṣā vidhīyatē ॥ 310 ॥

kriyayā chānvitaṃ pūrvaṃ dīkṣājālaṃ nirūpitam । mantradīkṣābhidhaṃ sāṅgōpāṅgaṃ sarvaṃ śivōditam ॥ 311 ॥

kriyayā syādvirahitāṃ gurusāyujyadāyinīm । gurudīkṣāṃ vinā kō vā gurutvāchārapālakaḥ ॥ 312 ॥

śaktō na chāpi śaktō vā daiśikāṅghri samāśrayēt । tasya janmāsti saphalaṃ bhōgamōkṣaphalapradam ॥ 313 ॥

atyantachittapakvasya śraddhābhaktiyutasya cha । pravaktavyamidaṃ dēvi mamātmaprītayē sadā ॥ 314 ॥

rahasyaṃ sarvaśāstrēṣu gītāśāstramidaṃ śivē । samyakparīkṣya vaktavyaṃ sādhakasya mahātmanaḥ ॥ 315 ॥

satkarmaparipākāchcha chittaśuddhiścha dhīmataḥ । sādhakasyaiva vaktavyā gurugītā prayatnataḥ ॥ 316 ॥

nāstikāya kṛtaghnāya dāmbhikāya śaṭhāya cha । abhaktāya vibhaktāya na vāchyēyaṃ kadāchana ॥ 317 ॥

strīlōlupāya mūrkhāya kāmōpahatachētasē । nindakāya na vaktavyā gurugītā svabhāvataḥ ॥ 318 ॥

sarvapāpapraśamanaṃ sarvōpadravavārakam । janmamṛtyuharaṃ dēvi gītāśāstramidaṃ śivē ॥ 319 ॥

śrutisāramidaṃ dēvi sarvamuktaṃ samāsataḥ । nānyathā sadgatiḥ puṃsāṃ vinā gurupadaṃ śivē ॥ 320 ॥

bahujanmakṛtātpāpādayamarthō na rōchatē । janmabandhanivṛttyarthaṃ gurumēva bhajētsadā ॥ 321 ॥

ahamēva jagatsarvamahamēva paraṃ padam । ētad​jñānaṃ yatō bhūyāttaṃ guruṃ praṇamāmyaham ॥ 322 ॥

alaṃ vikalpairahamēva kēvalaṃ mayi sthitaṃ viśvamidaṃ charācharam । idaṃ rahasyaṃ mama yēna darśitaṃ sa vandanīyō gururēva kēvalam ॥ 323 ॥

yasyāntaṃ nādimadhyaṃ na hi karacharaṇaṃ nāmagōtraṃ na sūtram । nō jātirnaiva varṇō na bhavati puruṣō nō napuṃsō na cha strī ॥ 324 ॥

nākāraṃ nō vikāraṃ na hi janimaraṇaṃ nāsti puṇyaṃ na pāpam । nō'tattvaṃ tattvamēkaṃ sahajasamarasaṃ sadguruṃ taṃ namāmi ॥ 325 ॥

nityāya satyāya chidātmakāya navyāya bhavyāya parātparāya । śuddhāya buddhāya nirañjanāya namō'stu nityaṃ guruśēkharāya ॥ 326 ॥

sachchidānandarūpāya vyāpinē paramātmanē । namaḥ śrīgurunāthāya prakāśānandamūrtayē ॥ 327 ॥

satyānandasvarūpāya bōdhaikasukhakāriṇē । namō vēdāntavēdyāya guravē buddhisākṣiṇē ॥ 328 ॥

namastē nātha bhagavan śivāya gururūpiṇē । vidyāvatārasaṃsiddhyai svīkṛtānēkavigraha ॥ 329 ॥

navāya navarūpāya paramārthaikarūpiṇē । sarvājñānatamōbhēdabhānavē chidghanāya tē ॥ 330 ॥

svatantrāya dayākluptavigrahāya śivātmanē । paratantrāya bhaktānāṃ bhavyānāṃ bhavyarūpiṇē ॥ 331 ॥

vivēkināṃ vivēkāya vimarśāya vimarśinām । prakāśināṃ prakāśāya jñānināṃ jñānarūpiṇē ॥ 332 ॥

purastātpārśvayōḥ pṛṣṭhē namaskuryāduparyadhaḥ । sadā machchittarūpēṇa vidhēhi bhavadāsanam ॥ 333 ॥

śrīguruṃ paramānandaṃ vandē hyānandavigraham । yasya sannidhimātrēṇa chidānandāya tē manaḥ ॥ 334 ॥

namō'stu guravē tubhyaṃ sahajānandarūpiṇē । yasya vāgamṛtaṃ hanti viṣaṃ saṃsārasañjñakam ॥ 335 ॥

nānāyuktōpadēśēna tāritā śiṣyasantatiḥ । tatkṛpāsāravēdēna guruchitpadamachyutam ॥ 336 ॥

[pāṭhabhēdaḥ - achyutāya namastubhyaṃ guravē paramātmanē । svārāmōktapadēchChūnāṃ dattaṃ yēnāchyutaṃ padam ॥ ] achyutāya namastubhyaṃ guravē paramātmanē । sarvatantrasvatantrāya chidghanānandamūrtayē ॥ 337 ॥

namō'chyutāya guravē'jñānadhvāntaikabhānavē । śiṣyasanmārgapaṭavē kṛpāpīyūṣasindhavē ॥ 338 ॥

ōmachyutāya guravē śiṣyasaṃsārasētavē । bhaktakāryaikasiṃhāya namastē chitsukhātmanē ॥ 339 ॥

gurunāmasamaṃ daivaṃ na pitā na cha bāndhavāḥ । gurunāmasamaḥ svāmī nēdṛśaṃ paramaṃ padam ॥ 340 ॥

ēkākṣarapradātāraṃ yō guruṃ naiva manyatē । śvānayōniśataṃ gatvā chāṇḍālēṣvapi jāyatē ॥ 341 ॥

gurutyāgādbhavēnmṛtyuḥ mantratyāgāddaridratā । gurumantraparityāgī rauravaṃ narakaṃ vrajēt ॥ 342 ॥

śivakrōdhādgurustrātā gurukrōdhāchChivō na hi । tasmātsarvaprayatnēna gurōrājñāṃ na laṅghayēt ॥ 343 ॥

saṃsārasāgarasamuddharaṇaikamantraṃ brahmādidēvamunipūjitasiddhamantram । dāridryaduḥkhabhavarōgavināśamantraṃ vandē mahābhayaharaṃ gururājamantram ॥ 344 ॥

saptakōṭimahāmantrāśchittavibhramakārakāḥ । ēka ēva mahāmantrō gururityakṣaradvayam ॥ 345 ॥

ēvamuktvā mahādēvaḥ pārvatīṃ punarabravīt । idamēva paraṃ tattvaṃ śṛṇu dēvi sukhāvaham ॥ 346 ॥

gurutattvamidaṃ dēvi sarvamuktaṃ samāsataḥ । rahasyamidamavyaktaṃ na vadēdyasya kasyachit ॥ 347 ॥

na mṛṣā syādiyaṃ dēvi maduktiḥ satyarūpiṇī । gurugītāsamaṃ stōtraṃ nāsti nāsti mahītalē ॥ 348 ॥

gurugītāmimāṃ dēvi bhavaduḥkhavināśinīm । gurudīkṣāvihīnasya puratō na paṭhēt kvachit ॥ 349 ॥

rahasyamatyantarahasyamētanna pāpinā labhyamidaṃ mahēśvari । anēkajanmārjitapuṇyapākādgurōstu tattvaṃ labhatē manuṣyaḥ ॥ 350 ॥

yasya prasādādahamēva sarvaṃ mayyēva sarvaṃ parikalpitaṃ cha । itthaṃ vijānāmi sadātmarūpaṃ tasyāṅghripadmaṃ praṇatō'smi nityam ॥ 351 ॥

ajñānatimirāndhasya viṣayākrāntachētasaḥ । jñānaprabhāpradānēna prasādaṃ kuru mē prabhō ॥ 352 ॥

iti śrīskandapurāṇē uttarakhaṇḍē umāmahēśvara saṃvādē śrī gurugītā samāpta ॥

maṅgaḻaṃ maṅgaḻaṃ gurudēvāya mahanīyaguṇātmanē । sarvalōkaśaraṇyāya sādhurūpāya maṅgaḻam ॥

Browse Related Categories: