Vishnu Padadi Keshanta Varnana Stotram

avyānnirghātaghōrō haribhujapavanāmarśanādhmātamūrtē- -rasmānvismēranētratridaśanutivachaḥsādhukāraiḥ sutāraḥ । sarvaṃ saṃhartumichChōrarikulabhuvana sphāraviṣphāranādaḥ saṃyatkalpāntasindhau śarasalilaghaṭāvārmuchaḥ kārmukasya ॥ 3 ॥

jīmūtaśyāmabhāsā muhurapi bhagavadbāhunā mōhayantī yuddhēṣūddhūyamānā jhaṭiti taṭidivālakṣyatē yasya mūrtiḥ । sō'sistrāsākulākṣatridaśaripuvapuḥśōṇitāsvādatṛptō nityānandāya bhūyānmadhumathanamanōnandanō nandakō naḥ ॥ 4 ॥

kamrākārā murārēḥ karakamalatalēnānurāgādgṛhītā samyagvṛttā sthitāgrē sapadi na sahatē darśanaṃ yā parēṣām । rājantī daityajīvāsavamadamuditā lōhitālēpanārdrā kāmaṃ dīptāṃśukāntā pradiśatu dayitēvāsya kaumōdakī naḥ ॥ 5 ॥

yō viśvaprāṇabhūtastanurapi cha harēryānakētusvarūpō yaṃ sañchintyaiva sadyaḥ svayamuragavadhūvargagarbhāḥ patanti । chañchachchaṇḍōrutuṇḍatruṭitaphaṇivasāraktapaṅkāṅkitasyaṃ vandē Chandōmayaṃ taṃ khagapatimamalasvarṇavarṇaṃ suparṇam ॥ 6 ॥

viṣṇōrviśvēśvarasya pravaraśayanakṛtsarvalōkaikadhartā sō'nantaḥ sarvabhūtaḥ pṛthuvimalayaśāḥ sarvavēdaiścha vēdyaḥ । pātā viśvasya śaśvatsakalasuraripudhvaṃsanaḥ pāpahantā sarvajñaḥ sarvasākṣī sakalaviṣabhayātpātu bhōgīśvarō naḥ ॥ 7 ॥

vāgbhūgairyādibhēdairviduriha munayō yāṃ yadīyaiścha puṃsāṃ kāruṇyārdraiḥ kaṭākṣaiḥ sakṛdapi patitaiḥ sampadaḥ syuḥ samagrāḥ । kundēndusvachChamandasmitamadhuramukhāmbhōruhāṃ sundarāṅgīṃ vandē vandyāmaśēṣairapi murabhidurōmandirāmindirāṃ tām ॥ 8 ॥

yā sūtē sattvajālaṃ sakalamapi sadā sannidhānēna puṃsō dhattē yā tattvayōgāchcharamacharamidaṃ bhūtayē bhūtajātam । dhātrīṃ sthātrīṃ janitrīṃ prakṛtimavikṛtiṃ viśvaśaktiṃ vidhātrīṃ viṣṇōrviśvātmanastāṃ vipulaguṇamayīṃ prāṇanāthāṃ praṇaumi ॥ 9 ॥

yēbhyō'sūyadbhiruchchaiḥ sapadi padamuru tyajyatē daityavargai- -ryēbhō dhartuṃ cha mūrdhnā spṛhayati satataṃ sarvagīrvāṇavargaḥ । nityaṃ nirmūlayēyurnichitataramamī bhaktinighnātmanāṃ naḥ padmākṣasyāṅghripadmadvayatalanilayāḥ pāṃsavaḥ pāpapaṅkam ॥ 10 ॥

rēkhā lēkhādivandyāścharaṇatalagatāśchakramatsyādirūpāḥ snigdhāḥ sūkṣmāḥ sujātā mṛdulalitatarakṣaumasūtrāyamāṇāḥ । dadyurnō maṅgaḻāni bhramarabharajuṣā kōmalēnābdhijāyāḥ kamrēṇāmrēḍyamānāḥ kisalayamṛdunā pāṇinā chakrapāṇēḥ ॥ 11 ॥

yasmādākrāmatō dyāṃ garuḍamaṇiśilākētudaṇḍāyamānā dāśchyōtantī babhāsē surasaridamalā vaijayantīva kāntā । bhūmiṣṭhō yastathānyō bhuvanagṛhabṛhat‍stambhaśōbhāṃ dadhau naḥ pātāmētau pāyōjōdaralalitatalau paṅkajākṣasya pādau ॥ 12 ॥

ākrāmadbhyāṃ trilōkīmasurasurapatī tatkṣaṇādēva nītau yābhyāṃ vairōchanīndrau yugapadapi vipatsampadōrēkadhāmaḥ । tābhyāṃ tāmrōdarābhyāṃ muhurahamajitasyāñchitābhyāmubhābhyāṃ prājyaiśvaryapradābhyāṃ praṇatimupagataḥ pādapaṅkēruhābhyām ॥ 13 ॥

yēbhyō varṇaśchaturthaścharamata udabhūdādisargē prajānāṃ sāhasrī chāpi saṅkhyā prakaṭamabhihitā sarvavēdēṣu yēṣām । prāptā viśvambharā yairativitatatanōrviśvamūrtērvirājō viṣṇōstēbhyō mahadbhyaḥ satatamapi namō'stvaṅghripaṅkēruhēbhyaḥ ॥ 14 ॥

viṣṇōḥ pādadvayāgrē vimalanakhamaṇibhrājitā rājatē yā rājīvasyēva ramyā himajalakaṇikālaṅkṛtāgrā dalālī । asmākaṃ vismayārhāṇyakhilajanamana prārthanīyā hi sēyaṃ dadyādādyānavadyā tatiratiruchirā maṅgaḻānyaṅguḻīnām ॥ 15 ॥

yasyāṃ dṛṣṭvāmalāyāṃ pratikṛtimamarāḥ sambhavantyānamantaḥ sēndrāḥ sāndrīkṛtērṣyāstvaparasurakulāśaṅkayātaṅkavantaḥ । sā sadyaḥ sātirēkāṃ sakalasukhakarīṃ sampadaṃ sādhayēnna- -śchañchachchārvaṃśuchakrā charaṇanaḻinayōśchakrapāṇērnakhālī ॥ 16 ॥

pādāmbhōjanmasēvāsamavanatasuravrātabhāsvatkirīṭa- -pratyuptōchchāvachāśmapravarakaragaṇaiśchintitaṃ yadvibhāti । namrāṅgānāṃ harērnō haridupalamahākūrmasaundaryahāri- -chChāyaṃ śrēyaḥpradāyi prapadayugamidaṃ prāpayētpāpamantam ॥ 17 ॥

śrīmatyau chāruvṛttē karaparimalanānandahṛṣṭē ramāyāḥ saundaryāḍhyēndranīlōpalarachitamahādaṇḍayōḥ kāntichōrē । sūrīndraiḥ stūyamānē surakulasukhadē sūditārātisaṅghē jaṅghē nārāyaṇīyē muhurapi jayatāmasmadaṃhō harantyau ॥ 18 ॥

samyaksāhyaṃ vidhātuṃ samamiva satataṃ jaṅghayōḥ khinnayōryē bhārībhūtōrudaṇḍadvayabharaṇakṛtōttambhabhāvaṃ bhajētē । chittādarśaṃ nidhātuṃ mahitamiva satāṃ tē samudrāyamānē vṛttākārē vidhattāṃ hyadi mudamajitasyāniśaṃ jānunī naḥ ॥ 19 ॥

dēvō bhītiṃ vidhātuḥ sapadi vidadhatau kaiṭabhākhyaṃ madhuṃ chā- -pyārōpyārūḍhagarvāvadhijaladhi yayōrādidaityau jaghāna । vṛttāvanyōnyatulyau chaturamupachayaṃ bibhratāvabhranīlā- -vūrū chārū harēstau mudamatiśayinīṃ mānasē nō vidhattām ॥ 20 ॥

pītēna dyōtatē yachchaturaparihitēnāmbarēṇātyudāraṃ jātālaṅkārayōgaṃ jalamiva jaladhērbāḍabāgniprabhābhiḥ । ētatpātityadānnō jaghanamatighanādēnasō mānanīyaṃ sātatyēnaiva chētōviṣayamavataratpātu pītāmbarasya ॥ 21 ॥

yasyā dāmnā tridhāmnō jaghanakalitayā bhrājatē'ṅgaṃ yathābdhē- -rmadhyasthō mandarādrirbhujagapatimahābhōgasannaddhamadhyaḥ । kāñchī sā kāñchanābhā maṇivarakiraṇairullasadbhiḥ pradīptā kalyāṃ kaḻyāṇadātrīṃ mama matimaniśaṃ kamrarūpāṃ karōtu ॥ 22 ॥

unnamraṃ kamramuchchairupachitamudabhūdyatra patrairvichitraiḥ pūrvaṃ gīrvāṇapūjyaṃ kamalajamadhupasyāspadaṃ tatpayōjam । yasminnīlāśmanīlaistaralaruchijalaiḥ pūritē kēlibuddhyā nālīkākṣasya nābhīsarasi vasatu naśchittahaṃsaśchirāya ॥ 23 ॥

pātālaṃ yasya nālaṃ valayamapi diśāṃ patrapaṅktīrnagēndrā- -nvidvāṃsaḥ kēsarālīrviduriha vipulāṃ karṇikāṃ svarṇaśailam । bhūyādgāyatsvayambhūmadhukarabhavanaṃ bhūmayaṃ kāmadaṃ nō nālīkaṃ nābhipadmākarabhavamuru tannāgaśayyasya śaurēḥ ॥ 24 ॥

ādau kalpasya yasmātprabhavati vitataṃ viśvamētadvikalpaiḥ kalpāntē yasya chānta praviśati sakalaṃ sthāvaraṃ jaṅgamaṃ cha । atyantāchintyamūrtēśchirataramajitasyāntarikṣasvarūpē tasminnasmākamantaḥkaraṇamatimudā krīḍatātkrōḍabhāgē ॥ 25 ॥

kāntyambhaḥpūrapūrṇē lasadasitavalībhaṅgabhāsvattaraṅgē gambhīrākāranābhīchaturataramahāvartaśōbhinyudārē । krīḍatvānadvahēmōdaranahanamahābāḍabāgniprabhāḍhyē kāmaṃ dāmōdarīyōdarasalilanidhau chittamatsyaśchiraṃ naḥ ॥ 26 ॥

nābhīnālīkamūlādadhikaparimaḻōnmōhitānāmalīnāṃ mālā nīlēva yāntī sphurati ruchimatī vaktrapadmōnmukhī yā । ramyā sā rōmarājirmahitaruchikarī madhyabhāgasya viṣṇō- -śchittasthā mā viraṃsīchchirataramuchitāṃ sādhayantī śriyaṃ naḥ ॥ 27 ॥

saṃstīrṇaṃ kaustubhāṃśuprasarakisalayairmugdhamuktāphalāḍhyaṃ śrīvatsōllāsi phullapratinavavanamālāṅki rājadbhujāntam । vakṣaḥ śrīvṛkṣakāntaṃ madhukaranikaraśyāmalaṃ śārṅgapāṇēḥ saṃsārādhvaśramārtairupavanamiva yatsēvitaṃ tatprapadyē ॥ 28 ॥

kāntaṃ vakṣō nitāntaṃ vidadhadiva galaṃ kālimā kālaśatrō- -rindōrbimbaṃ yathāṅkō madhupa iva tarōrmañjarīṃ rājatē yaḥ । śrīmānnityaṃ vidhēyādaviralamilitaḥ kaustubhaśrīpratānaiḥ śrīvatsaḥ śrīpatēḥ sa śriya iva dayitō vatsa uchchaiḥśriyaṃ naḥ ॥ 29 ॥

sambhūyāmbhōdhimadhyātsapadi sahajayā yaḥ śriyā sannidhattē nīlē nārāyaṇōraḥsthalagaganatalē hāratārōpasēvyē । āśāḥ sarvāḥ prakāśā vidadhadapidadhachchātmabhāsānyatējā- -syāścharyasyākarō nō dyumaṇiriva maṇiḥ kaustubhaḥ sō'stubhūtyai ॥ 30 ॥

yā vāyāvānukūlyātsarati maṇiruchā bhāsamānā samānā sākaṃ sākampamaṃsē vasati vidadhatī vāsubhadraṃ subhadram । sāraṃ sāraṅgasaṅghairmukharitakusumā mēchakāntā cha kāntā mālā mālālitāsmānna viramatu sukhairyōjayantī jayantī ॥ 31 ॥

hārasyōruprabhābhiḥ pratinavavanamālāśubhiḥ prāṃśurūpaiḥ śrībhiśchāpyaṅgadānāṃ kabalitaruchi yanniṣkabhābhiścha bhāti । bāhulyēnaiva baddhāñjalipuṭamajitasyābhiyāchāmahē ta- -dvandhārtiṃ bādhatāṃ nō bahuvihatikarīṃ bandhuraṃ bāhumūlam ॥ 32 ॥

viśvatrāṇaikadīkṣāstadanuguṇaguṇakṣatranirmāṇadakṣāḥ kartārō durnirūpasphuṭaguṇayaśasā karmaṇāmadbhutānām । śārṅgaṃ bāṇaṃ kṛpāṇaṃ phalakamarigadē padmaśaṅkhau sahasraṃ bibhrāṇāḥ śastrajālaṃ mama dadhatu harērbāhavō mōhahānim ॥ 33 ॥

kaṇṭhākalpōdgatairyaḥ kanakamayalasatkuṇḍalōtthairudārai- -rudyōtaiḥ kaustubhasyāpyurubhirupachitaśchitravarṇō vibhāti । kaṇṭhāślēṣē ramāyāḥ karavalayapadairmudritē bhadrarūpē vaikuṇṭhīyē'tra kaṇṭhē vasatu mama matiḥ kuṇṭhabhāvaṃ vihāya ॥ 34 ॥

padmānandapradātā parilasadaruṇaśrīparītāgrabhāgaḥ kālē kālē cha kambupravaraśaśadharāpūraṇē yaḥ pravīṇaḥ । vaktrākāśāntarasthastirayati nitarāṃ dantatāraughaśōbhāṃ śrībharturdantavāsōdyumaṇiraghatamōnāśanāyāstvasau naḥ ॥ 35 ॥

nityaṃ snēhātirēkānnijakamituralaṃ viprayōgākṣamā yā vaktrēndōrantarālē kṛtavasatirivābhāti nakṣatrarājiḥ । lakṣmīkāntasya kāntākṛtirativilasanmugdhamuktāvaliśrī- -rdantālī santataṃ sā natinutiniratānakṣatānrakṣatānnaḥ ॥ 36 ॥

brahmanbrahmaṇyajihmāṃ matimapi kuruṣē dēva sambhāvayē tvāṃ śambhō śakra trilōkīmavasi kimamarairnāradādyāḥ sukhaṃ vaḥ । itthaṃ sēvāvanamraṃ suramuninikaraṃ vīkṣya viṣṇōḥ prasanna- -syāsyēndōrāsravantī varavachanasudhāhlādayēnmānasaṃ naḥ ॥ 37 ॥

karṇasthasvarṇakamrōjjvalamakaramahākuṇḍalaprōtadīpya- -nmāṇikyaśrīpratānaiḥ parimilitamaliśyāmalaṃ kōmalaṃ yat । prōdyatsūryāṃśurājanmarakatamukurākārachōraṃ murārē- -rgāḍhāmāgāminīṃ naḥ śamayatu vipadaṃ gaṇḍayōrmaṇḍalaṃ tat ॥ 38 ॥

vaktrāmbhōjē lasantaṃ muhuradharamaṇiṃ pakvabimbābhirāmaṃ dṛṣṭvā draṣṭuṃ śukasya sphuṭamavataratastuṇḍadaṇḍāyatē yaḥ । ghōṇaḥ śōṇīkṛtātmā śravaṇayugaḻasatkuṇḍalōsrairmurārēḥ prāṇākhyasyānilasya prasaraṇasaraṇiḥ prāṇadānāya naḥ syāt ॥ 39 ॥

dikkālau vēdayantau jagati muhurimau sañcharantau ravīndū trailōkyālōkadīpāvabhidadhati yayōrēva rūpaṃ munīndrāḥ । asmānabjaprabhē tē prachuratarakṛpānirbharaṃ prēkṣamāṇē pātāmātāmraśuklāsitaruchiruchirē padmanētrasya nētrē ॥ 40 ॥

pātātpātālapātātpatagapatigatērbhrūyugaṃ bhugnamadhyaṃ yēnēṣachchālitēna svapadaniyamitāḥ sāsurā dēvasaṅghāḥ । nṛtyallālāṭaraṅgē rajanikaratanōrardhakhaṇḍāvadātē kālavyāladvayaṃ vā vilasati samayā vālikāmātaraṃ naḥ ॥ 41 ॥

lakṣmākārālakālisphuradalikaśaśāṅkārdhasandarśamīla- -nnētrāmbhōjaprabōdhōtsukanibhṛtatarālīnabhṛṅgachChaṭābhē । lakṣmīnāthasya lakṣyīkṛtavibudhagaṇāpāṅgabāṇāsanārdha- -chChāyē nō bhūribhūtiprasavakuśalatē bhrūlatē pālayētām ॥ 42 ॥

rūkṣasmārēkṣuchāpachyutaśaranikarakṣīṇalakṣmīkaṭākṣa- -prōtphullatpadmamālāvilasitamahitasphāṭikaiśānaliṅgam । bhūyādbhūyō vibhūtyai mama bhuvanapatērbhrūlatādvandvamadhyā- -dutthaṃ tatpuṇḍramūrdhvaṃ janimaraṇatamaḥkhaṇḍanaṃ maṇḍanaṃ cha ॥ 43 ॥

pīṭhībhūtālakāntē kṛtamakuṭamahādēvaliṅgapratiṣṭhē lālāṭē nāṭyaraṅgē vikaṭatarataṭē kaiṭabhārēśchirāya । prōddhāṭyaivātmatandrīprakaṭapaṭakuṭīṃ prasphurantīṃ sphuṭāṅgaṃ paṭvīyaṃ bhāvanākhyāṃ chaṭulamatinaṭī nāṭikāṃ nāṭayēnnaḥ ॥ 44 ॥

mālālīvālidhāmnaḥ kuvalayakalitā śrīpatēḥ kuntalālī kālindyāruhya mūrdhnō galati haraśiraḥsvardhunīspardhayā nu । rāhurvā yāti vaktraṃ sakalaśaśikalābhrāntilōlāntarātmā lōkairālōkyatē yā pradiśatu satataṃ sākhilaṃ maṅgaḻaṃ naḥ ॥ 45 ॥

suptākārāḥ prasuptē bhagavati vibudhairapyadṛṣṭasvarūpā vyāptavyōmāntarālāstaralamaṇiruchā rañjitāḥ spaṣṭabhāsaḥ । dēhachChāyōdgamābhā ripuvapuraguruplōṣarōṣāgnidhūmyāḥ kēśāḥ kēśidviṣō nō vidadhatu vipulaklēśapāśapraṇāśam ॥ 46 ॥

yatra pratyuptaratnapravaraparilasadbhūrirōchiṣpratāna- -sphūrtyāṃ mūrtirmurārērdyumaṇiśatachitavyōmavaddurnirīkṣyā । kurvatpārēpayōdhi jvaladakṛśaśikhābhāsvadaurvāgniśaṅkāṃ śaśvannaḥ śarma diśyātkalikaluṣatamaḥpāṭanaṃ tatkirīṭam ॥ 47 ॥

bhrāntvā bhrāntvā yadantastribhuvanagururapyabdakōṭīranēkā gantuṃ nāntaṃ samarthō bhramara iva punarnābhinālīkanālāt । unmajjannūrjitaśrīstribhuvanamaparaṃ nirmamē tatsadṛkṣaṃ dēhāmbhōdhiḥ sa dēyānniravadhiramṛtaṃ daityavidvēṣiṇō naḥ ॥ 48 ॥

matsyaḥ kūrmō varāhō narahariṇapatirvāmanō jāmadagnyaḥ kākutsthaḥ kaṃsaghātī manasijavijayī yaścha kalkirbhaviṣyan । viṣṇōraṃśāvatarā bhuvanahitakarā dharmasaṃsthāpanārthāḥ pāyāsurmāṃ ta ētē gurutarakaruṇābhārakhinnāśayā yē ॥ 49 ॥

yasmādvāchō nivṛttāḥ samamapi manasā lakṣaṇāmīkṣamāṇāḥ svārthālābhātparārthavyapagamakathanaślāghinō vēdavādāḥ । nityānandaṃ svasaṃvinniravadhivimalasvāntasaṅkrāntabimba- -chChāyāpatyāpi nityaṃ sukhayati yaminō yattadavyānmahō naḥ ॥ 50 ॥

āpādādā cha śīrṣādvapuridamanaghaṃ vaiṣṇavaṃ yaḥ svachittē dhattē nityaṃ nirastākhilakalikaluṣa santatāntaḥ pramōdam । juhvajjihvākṛśānau haricharitahaviḥ stōtramantrānupāṭhai- -statpādāmbhōruhābhyāṃ satatamapi namaskurmahē nirmalābhyām ॥ 51 ॥

mōdātpādādikēśastutimitirachitā kīrtayitvā tridhāmna pādābjadvandvasēvāsamayanatamatirmastakēnānamēdya । unmuchyaivātmanainōnichayakavachaka pañchatāmētya bhānō- -rbimbāntargōchara sa praviśati paramānandamātmasvarūpam ॥ 52 ॥

iti śrīmatparamahaṃsaparivrājakāchāryasya śrīgōvindabhagavatpūjyapādaśiṣyasya śrīmachChaṅkarabhagavataḥ kṛtau śrī viṣṇu pādādikēśāntavarṇaṇa stōtraṃ sampūrṇam ।

Browse Related Categories: