Devi · Traditional devotional text · Source: vignanam.org (Traditional devotional text (public-domain shlokas))
జయ కామేశి చాముండే జయ భూతాపహారిణి । జయ సర్వగతే దేవి కామేశ్వరి నమోఽస్తు తే ॥ 1 ॥
విశ్వమూర్తే శుభే శుద్ధే విరూపాక్షి త్రిలోచనే । భీమరూపే శివే విద్యే కామేశ్వరి నమోఽస్తు తే ॥ 2 ॥
మాలాజయే జయే జంభే భూతాక్షి క్షుభితేఽక్షయే । మహామాయే మహేశాని కామేశ్వరి నమోఽస్తు తే ॥ 3 ॥
భీమాక్షి భీషణే దేవి సర్వభూతక్షయంకరి । కాలి చ వికరాలి చ కామేశ్వరి నమోఽస్తు తే ॥ 3 ॥
కాలి కరాలవిక్రాంతే కామేశ్వరి హరప్రియే । సర్వశాస్త్రసారభూతే కామేశ్వరి నమోఽస్తు తే ॥ 4 ॥
కామరూపప్రదీపే చ నీలకూటనివాసిని । నిశుంభశుంభమథని కామేశ్వరి నమోఽస్తు తే ॥ 5 ॥
కామాఖ్యే కామరూపస్థే కామేశ్వరి హరిప్రియే । కామనాం దేహి మే నిత్యం కామేశ్వరి నమోఽస్తు తే ॥ 6 ॥
వపానాఢ్యమహావక్త్రే తథా త్రిభువనేశ్వరి । మహిషాసురవధే దేవి కామేశ్వరి నమోఽస్తు తే ॥ 7 ॥
ఛాగతుష్టే మహాభీమే కామాఖ్యే సురవందితే । జయ కామప్రదే తుష్టే కామేశ్వరి నమోఽస్తు తే ॥ 8 ॥
Offered for worship and study, not as prediction. Non-commercial.
భ్రష్టరాజ్యో యదా రాజా నవమ్యాం నియతః శుచిః । అష్టమ్యాం చ చతుర్దశ్యాముపవాసీ నరోత్తమః ॥ 9 ॥
సంవత్సరేణ లభతే రాజ్యం నిష్కంటకం పునః । య ఇదం శృణుయాద్భక్త్యా తవ దేవి సముద్భవమ్ । సర్వపాపవినిర్ముక్తః పరం నిర్వాణమృచ్ఛతి ॥ 10 ॥
శ్రీకామరూపేశ్వరి భాస్కరప్రభేప్రకాశితాంభోజనిభాయతాననే । సురారిరక్షఃస్తుతిపాతనోత్సుకేత్రయీమయే దేవనుతే నమామి ॥ 11 ॥
సితాసితే రక్తపిశంగవిగ్రహేరూపాణి యస్యాః ప్రతిభాంతి తాని । వికారరూపా చ వికల్పితానిశుభాశుభానామపి తాం నమామి ॥ 12 ॥
కామరూపసముద్భూతే కామపీఠావతంసకే । విశ్వాధారే మహామాయే కామేశ్వరి నమోఽస్తు తే ॥ 13 ॥
అవ్యక్తవిగ్రహే శాంతే సంతతే కామరూపిణి । కాలగమ్యే పరే శాంతే కామేశ్వరి నమోఽస్తు తే ॥ 14 ॥
యా సుషుమ్నాంతరాలస్థా చింత్యతే జ్యోతిరూపిణీ । ప్రణతోఽస్మి పరాం వీరాం కామేశ్వరి నమోఽస్తు తే ॥ 15 ॥
దంష్ట్రాకరాలవదనే ముండమాలోపశోభితే । సర్వతః సర్వగే దేవి కామేశ్వరి నమోఽస్తు తే ॥ 16 ॥
చాముండే చ మహాకాలి కాలి కపాలహారిణీ । పాశహస్తే దండహస్తే కామేశ్వరి నమోఽస్తు తే ॥ 17 ॥
చాముండే కులమాలాస్యే తీక్ష్ణదంష్ట్రే మహాబలే । శవయానస్థితే దేవి కామేశ్వరి నమోఽస్తు తే ॥ 18 ॥
ఇతి శ్రీ కామాఖ్యా స్తోత్రమ్ ।
Browse Related Categories: