Ganga · Traditional devotional text · Source: vignanam.org (Traditional devotional text (public-domain shlokas))
ഭഗവതി ഭവലീലാമൌളിമാലേ തവാംഭഃ കണമണുപരിമാണം പ്രാണിനോ യേ സ്പൃശംതി । അമരനഗരനാരീചാമരഗ്രാഹിണീനാം വിഗതകലികലംകാതംകമംകേ ലുഠംതി ॥ 1 ॥
ബ്രഹ്മാംഡം ഖംഡയംതീ ഹരശിരസി ജടാവല്ലിമുല്ലാസയംതീ സ്വര്ലോകാദാപതംതീ കനകഗിരിഗുഹാഗംഡശൈലാത് സ്ഖലംതീ । ക്ഷോണീപൃഷ്ടേ ലുഠംതീ ദുരിതചയചമൂര്നിര്ഭരം ഭര്ത്സയംതീ പാഥോധിം പൂരയംതീ സുരനഗരസരിത്പാവനീ നഃ പുനാതു ॥ 2 ॥
മജ്ജന്മാതംഗകുംഭച്യുതമദമദിരാമോദമത്താലിജാലം സ്നാനൈഃ സിദ്ധാംഗനാനാം കുചയുഗവിഗലത്കുംകുമാസംഗപിംഗമ് । സായം പ്രാതര്മുനീനാം കുശകുസുമചയൈശ്ഛിന്നതീരസ്ഥനീരം പായാന്നോ ഗാംഗമംഭഃ കരികരമകരാക്രാംതരഹസ്തരംഗമ് ॥ 3 ॥
ആദാവാദിപിതാമഹസ്യ നിയമവ്യാപാരപാത്രേ ജലം പശ്ചാത്പന്നഗശായിനോ ഭഗവതഃ പാദോദകം പാവനമ് । ഭൂയഃ ശംഭുജടാവിഭൂഷണമണിര്ജഹ്നോര്മഹര്ഷേരിയം കന്യാ കല്മഷനാശിനീ ഭഗവതീ ഭാഗീരഥീ പാതു മാമ് ॥ 4 ॥
ശൈലേംദ്രാദവതാരിണീ നിജജലേ മജ്ജജ്ജനോത്താരിണീ പാരാവാരവിഹാരിണീ ഭവഭയശ്രേണീസമുത്സാരിണീ । ശേഷാംഗൈരനുകാരിണീ ഹരശിരോവല്ലീദളാകാരിണീ കാശീപ്രാംതവിഹാരിണീ വിജയതേ ഗംഗാ മനോഹാരിണീ ॥ 5 ॥
കുതോ വീചീ വീചിസ്തവ യദി ഗതാ ലോചനപഥം ത്വമാപീതാ പീതാംബരപുരവാസം വിതരസി । ത്വദുത്സംഗേ ഗംഗേ പതതി യദി കായസ്തനുഭൃതാം തദാ മാതഃ ശാംതക്രതവപദലാഭോഽപ്യതിലഘുഃ ॥ 6 ॥
ഭഗവതി തവ തീരേ നീരമാത്രാശനോഽഹം വിഗതവിഷയതൃഷ്ണഃ കൃഷ്ണമാരാധയാമി । സകലകലുഷഭംഗേ സ്വര്ഗസോപാനസംഗേ തരലതരതരംഗേ ദേവി ഗംഗേ പ്രസീദ ॥ 7 ॥
Offered for worship and study, not as prediction. Non-commercial.
More devotional texts
മാതര്ജാഹ്നവി ശംഭുസംഗമിലിതേ മൌളൌ നിധായാംജലിം ത്വത്തീരേ വപുഷോഽവസാനസമയേ നാരായണാംഘ്രിദ്വയമ് । സാനംദം സ്മരതോ ഭവിഷ്യതി മമ പ്രാണപ്രയാണോത്സവേ ഭൂയാദ്ഭക്തിരവിച്യുതാ ഹരിഹരാദ്വൈതാത്മികാ ശാശ്വതീ ॥ 8 ॥
ഗംഗാഷ്ടകമിദം പുണ്യം യഃ പഠേത്പ്രയതോ നരഃ । സർവപാപവിനിര്മുക്തോ വിഷ്ണുലോകം സ ഗച്ഛതി ॥ 9 ॥
ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിംദഭഗവത്പൂജ്യപാദശിഷ്യസ്യ ശ്രീമച്ഛംകരഭഗവതഃ കൃതൌ ഗംഗാഷ്ടകം സംപൂര്ണമ് ।
Browse Related Categories: