Gita Govindam Chapter 4 - Snigdha Madhusudana

॥ gītaṃ 8 ॥

nindati chandanamindukiraṇamanu vindati khēdamadhīram । vyālanilayamilanēna garalamiva kalayati malayasamīram ॥ sā virahē tava dīnā mādhava manasijaviśikhabhayādiva bhāvanayā tvayi līnā ॥ 1 ॥

aviralanipatitamadanaśarādiva bhavadavanāya viśālam । svahṛdayarmaṇī varma karōti sajalanalinīdalajālam ॥ 2 ॥

kusumaviśikhaśaratalpamanalpavilāsakalākamanīyam । vratamiva tava parirambhasukhāya karōti kusumaśayanīyam ॥ 3 ॥

vahati cha galitavilōchanajalabharamānanakamalamudāram । vidhumiva vikaṭavidhuntudadantadalanagalitāmṛtadhāram ॥ 4 ॥

vilikhati rahasi kuraṅgamadēna bhavantamasamaśarabhūtam । praṇamati makaramadhō vinidhāya karē cha śaraṃ navachūtam ॥ 5 ॥

pratipadamidamapi nigatati mādhava tava charaṇē patitāham । tvayi vimukhē mayi sapadi sudhānidhirapi tanutē tanudāham ॥ 6 ॥

dhyānalayēna puraḥ parikalpya bhavantamatīva durāpam । vilapati hasati viṣīdati rōditi chañchati muñchati tāpam ॥ 7 ॥

śrījayadēvabhaṇitamidamadhikaṃ yadi manasā naṭanīyam । harivirahākulaballavayuvatisakhīvachanaṃ paṭhanīyam ॥ 8 ॥

āvāsō vipināyatē priyasakhīmālāpi jālāyatē tāpō'pi śvasitēna dāvadahanajvālākalāpāyatē । sāpi tvadvirahēṇa hanta hariṇīrūpāyatē hā kathaṃ kandarpō'pi yamāyatē virachayañśārdūlavikrīḍitam ॥ 26 ॥

॥ gītaṃ 9 ॥

stanavinihitamapi hāramudāram । sā manutē kṛśatanuratibhāram ॥ rādhikā virahē tava kēśava ॥ 1 ॥

sarasamasṛṇamapi malayajapaṅkam । paśyati viṣamiva vapuṣi saśaṅkam ॥ 2 ॥

śvasitapavanamanupamapariṇāham । madanadahanamiva vahati sadāham ॥ 3 ॥

diśi diśi kirati sajalakaṇajālam । nayananalinamiva vigalitanālam ॥ 4 ॥

nayanaviṣayamapi kisalayatalpam । kalayati vihitahutāśavikalpam ॥ 5 ॥

tyajati na pāṇitalēna kapōlam । bālaśaśinamiva sāyamalōlam ॥ 6 ॥

haririti haririti japati sakāmam । virahavihitamaraṇēna nikāmam ॥ 7 ॥

śrījayadēvabhaṇitamiti gītam । sukhayatu kēśavapadamupunītam ॥ 8 ॥

sā rōmāñchati sītkarōti vilapatyutkmpatē tāmyati dhyāyatyudbhramati pramīlati patatyudyāti mūrchChatyapi । ētāvatyatanujvarē varatanurjīvēnna kiṃ tē rasāt svarvaidyapratima prasīdasi yadi tyaktō'nyathā nāntakaḥ ॥ 27 ॥

smarāturāṃ daivatavaidyahṛdya tvadaṅgasaṅgāmṛtamātrasādhyām । vimuktabādhāṃ kuruṣē na rādhā-mupēndra vajrādapi dāruṇō'si ॥ 28 ॥

kandarpajvarasañjvarasturatanōrāścharyamasyāśchiraṃ chētaśchandanachandramaḥkamalinīchintāsu santāmyati । kintu klāntivaśēna śītalatanuṃ tvāmēkamēva priyaṃ dhyāyantī rahasi sthitā kathamapi kṣīṇā kṣaṇaṃ prāṇiti ॥ 29 ॥

kṣaṇamapi virahaḥ purā na sēhē nayananimīlanakhinnayā yayā tē । śvasiti kathamasau rasālaśākhāṃ chiravirahēṇa vilōkya puṣpitāgrām ॥ 30 ॥

॥ iti gītagōvindē snigdhamādhavō nāma chaturthaḥ sargaḥ ॥

Browse Related Categories: