Narayaniyam Dashaka 25

stambhē ghaṭṭayatō hiraṇyakaśipōḥ karṇau samāchūrṇaya- nnāghūrṇajjagadaṇḍakuṇḍakuharō ghōrastavābhūdravaḥ । śrutvā yaṃ kila daityarājahṛdayē pūrvaṃ kadāpyaśrutaṃ kampaḥ kaśchana sampapāta chalitō'pyambhōjabhūrviṣṭarāt ॥1॥

daityē dikṣu visṛṣṭachakṣuṣi mahāsaṃrambhiṇi stambhataḥ sambhūtaṃ na mṛgātmakaṃ na manujākāraṃ vapustē vibhō । kiṃ kiṃ bhīṣaṇamētadadbhutamiti vyudbhrāntachittē'surē visphūrjjaddhavalōgrarōmavikasadvarṣmā samājṛmbhathāḥ ॥2॥

taptasvarṇasavarṇaghūrṇadatirūkṣākṣaṃ saṭākēsara- prōtkampapranikumbitāmbaramahō jīyāttavēdaṃ vapuḥ । vyāttavyāptamahādarīsakhamukhaṃ khaḍgōgravalganmahā- jihvānirgamadṛśyamānasumahādaṃṣṭrāyugōḍḍāmaram ॥3॥

utsarpadvalibhaṅgabhīṣaṇahanu hrasvasthavīyastara- grīvaṃ pīvaradōśśatōdgatanakhakrūrāṃśudūrōlbaṇam । vyōmōllaṅghi ghanāghanōpamaghanapradhvānanirdhāvita- spardhāluprakaraṃ namāmi bhavatastannārasiṃhaṃ vapuḥ ॥4॥

nūnaṃ viṣṇurayaṃ nihanmyamumiti bhrāmyadgadābhīṣaṇaṃ daityēndraṃ samupādravantamadhṛthā dōrbhyāṃ pṛthubhyāmamum । vīrō nirgalitō'tha khaḍgaphalakau gṛhṇanvichitraśramān vyāvṛṇvan punarāpapāta bhuvanagrāsōdyataṃ tvāmahō ॥5॥

bhrāmyantaṃ ditijādhamaṃ punarapi prōdgṛhya dōrbhyāṃ javāt dvārē'thōruyugē nipātya nakharān vyutkhāya vakṣōbhuvi । nirbhindannadhigarbhanirbharagaladraktāmbu baddhōtsavaṃ pāyaṃ pāyamudairayō bahu jagatsaṃhārisiṃhāravān ॥6॥

tyaktvā taṃ hatamāśu raktalaharīsiktōnnamadvarṣmaṇi pratyutpatya samastadaityapaṭalīṃ chākhādyamānē tvayi । bhrāmyadbhūmi vikampitāmbudhikulaṃ vyālōlaśailōtkaraṃ prōtsarpatkhacharaṃ charācharamahō duḥsthāmavasthāṃ dadhau ॥7॥