Vishnu · Traditional devotional text · Source: vignanam.org (Traditional devotional text (public-domain shlokas))
ഗോപീജനായ കഥിതം നിയമാവസാനേ മാരോത്സവം ത്വമഥ സാധയിതും പ്രവൃത്തഃ । സാംദ്രേണ ചാംദ്രമഹസാ ശിശിരീകൃതാശേ പ്രാപൂരയോ മുരലികാം യമുനാവനാംതേ ॥1॥
സമ്മൂര്ഛനാഭിരുദിതസ്വരമംഡലാഭിഃ സമ്മൂര്ഛയംതമഖിലം ഭുവനാംതരാലമ് । ത്വദ്വേണുനാദമുപകര്ണ്യ വിഭോ തരുണ്യ- സ്തത്താദൃശം കമപി ചിത്തവിമോഹമാപുഃ ॥2॥
Offered for worship and study, not as prediction. Non-commercial.
More devotional texts
താ ഗേഹകൃത്യനിരതാസ്തനയപ്രസക്താഃ കാംതോപസേവനപരാശ്ച സരോരുഹാക്ഷ്യഃ । സർവം വിസൃജ്യ മുരലീരവമോഹിതാസ്തേ കാംതാരദേശമയി കാംതതനോ സമേതാഃ ॥3॥
കാശ്ചിന്നിജാംഗപരിഭൂഷണമാദധാനാ വേണുപ്രണാദമുപകര്ണ്യ കൃതാര്ധഭൂഷാഃ । ത്വാമാഗതാ നനു തഥൈവ വിഭൂഷിതാഭ്യ- സ്താ ഏവ സംരുരുചിരേ തവ ലോചനായ ॥4॥
ഹാരം നിതംബഭുവി കാചന ധാരയംതീ കാംചീം ച കംഠഭുവി ദേവ സമാഗതാ ത്വാമ് । ഹാരിത്വമാത്മജഘനസ്യ മുകുംദ തുഭ്യം വ്യക്തം ബഭാഷ ഇവ മുഗ്ധമുഖീ വിശേഷാത് ॥5॥
കാചിത് കുചേ പുനരസജ്ജിതകംചുലീകാ വ്യാമോഹതഃ പരവധൂഭിരലക്ഷ്യമാണാ । ത്വാമായയൌ നിരുപമപ്രണയാതിഭാര- രാജ്യാഭിഷേകവിധയേ കലശീധരേവ ॥6॥
കാശ്ചിത് ഗൃഹാത് കില നിരേതുമപാരയംത്യ- സ്ത്വാമേവ ദേവ ഹൃദയേ സുദൃഢം വിഭാവ്യ । ദേഹം വിധൂയ പരചിത്സുഖരൂപമേകം ത്വാമാവിശന് പരമിമാ നനു ധന്യധന്യാഃ ॥7॥
ജാരാത്മനാ ന പരമാത്മതയാ സ്മരംത്യോ നാര്യോ ഗതാഃ പരമഹംസഗതിം ക്ഷണേന । തം ത്വാം പ്രകാശപരമാത്മതനും കഥംചി- ച്ചിത്തേ വഹന്നമൃതമശ്രമമശ്നുവീയ ॥8॥
അഭ്യാഗതാഭിരഭിതോ വ്രജസുംദരീഭി- ര്മുഗ്ധസ്മിതാര്ദ്രവദനഃ കരുണാവലോകീ । നിസ്സീമകാംതിജലധിസ്ത്വമവേക്ഷ്യമാണോ വിശ്വൈകഹൃദ്യ ഹര മേ പവനേശ രോഗാന് ॥9॥
Browse Related Categories: