Narayaniyam Dashaka 74

ಸಂಪ್ರಾಪ್ತೋ ಮಥುರಾಂ ದಿನಾರ್ಧವಿಗಮೇ ತತ್ರಾಂತರಸ್ಮಿನ್ ವಸ- ನ್ನಾರಾಮೇ ವಿಹಿತಾಶನಃ ಸಖಿಜನೈರ್ಯಾತಃ ಪುರೀಮೀಕ್ಷಿತುಮ್ । ಪ್ರಾಪೋ ರಾಜಪಥಂ ಚಿರಶ್ರುತಿಧೃತವ್ಯಾಲೋಕಕೌತೂಹಲ- ಸ್ತ್ರೀಪುಂಸೋದ್ಯದಗಣ್ಯಪುಣ್ಯನಿಗಲೈರಾಕೃಷ್ಯಮಾಣೋ ನು ಕಿಮ್ ॥1॥

ತ್ವತ್ಪಾದದ್ಯುತಿವತ್ ಸರಾಗಸುಭಗಾಃ ತ್ವನ್ಮೂರ್ತಿವದ್ಯೋಷಿತಃ ಸಂಪ್ರಾಪ್ತಾ ವಿಲಸತ್ಪಯೋಧರರುಚೋ ಲೋಲಾ ಭವತ್ ದೃಷ್ಟಿವತ್ । ಹಾರಿಣ್ಯಸ್ತ್ವದುರಃಸ್ಥಲೀವದಯಿ ತೇ ಮಂದಸ್ಮಿತಪ್ರೌಢಿವ- ನ್ನೈರ್ಮಲ್ಯೋಲ್ಲಸಿತಾಃ ಕಚೌಘರುಚಿವದ್ರಾಜತ್ಕಲಾಪಾಶ್ರಿತಾಃ ॥2॥

ತಾಸಾಮಾಕಲಯನ್ನಪಾಂಗವಲನೈರ್ಮೋದಂ ಪ್ರಹರ್ಷಾದ್ಭುತ- ವ್ಯಾಲೋಲೇಷು ಜನೇಷು ತತ್ರ ರಜಕಂ ಕಂಚಿತ್ ಪಟೀಂ ಪ್ರಾರ್ಥಯನ್ । ಕಸ್ತೇ ದಾಸ್ಯತಿ ರಾಜಕೀಯವಸನಂ ಯಾಹೀತಿ ತೇನೋದಿತಃ ಸದ್ಯಸ್ತಸ್ಯ ಕರೇಣ ಶೀರ್ಷಮಹೃಥಾಃ ಸೋಽಪ್ಯಾಪ ಪುಣ್ಯಾಂ ಗತಿಮ್ ॥3॥

ಭೂಯೋ ವಾಯಕಮೇಕಮಾಯತಮತಿಂ ತೋಷೇಣ ವೇಷೋಚಿತಂ ದಾಶ್ವಾಂಸಂ ಸ್ವಪದಂ ನಿನೇಥ ಸುಕೃತಂ ಕೋ ವೇದ ಜೀವಾತ್ಮನಾಮ್ । ಮಾಲಾಭಿಃ ಸ್ತಬಕೈಃ ಸ್ತವೈರಪಿ ಪುನರ್ಮಾಲಾಕೃತಾ ಮಾನಿತೋ ಭಕ್ತಿಂ ತೇನ ವೃತಾಂ ದಿದೇಶಿಥ ಪರಾಂ ಲಕ್ಷ್ಮೀಂ ಚ ಲಕ್ಷ್ಮೀಪತೇ ॥4॥

ಕುಬ್ಜಾಮಬ್ಜವಿಲೋಚನಾಂ ಪಥಿಪುನರ್ದೃಷ್ಟ್ವಾಽಂಗರಾಗೇ ತಯಾ ದತ್ತೇ ಸಾಧು ಕಿಲಾಂಗರಾಗಮದದಾಸ್ತಸ್ಯಾ ಮಹಾಂತಂ ಹೃದಿ । ಚಿತ್ತಸ್ಥಾಮೃಜುತಾಮಥ ಪ್ರಥಯಿತುಂ ಗಾತ್ರೇಽಪಿ ತಸ್ಯಾಃ ಸ್ಫುಟಂ ಗೃಹ್ಣನ್ ಮಂಜು ಕರೇಣ ತಾಮುದನಯಸ್ತಾವಜ್ಜಗತ್ಸುಂದರೀಮ್ ॥5॥

ತಾವನ್ನಿಶ್ಚಿತವೈಭವಾಸ್ತವ ವಿಭೋ ನಾತ್ಯಂತಪಾಪಾ ಜನಾ ಯತ್ಕಿಂಚಿದ್ದದತೇ ಸ್ಮ ಶಕ್ತ್ಯನುಗುಣಂ ತಾಂಬೂಲಮಾಲ್ಯಾದಿಕಮ್ । ಗೃಹ್ಣಾನಃ ಕುಸುಮಾದಿ ಕಿಂಚನ ತದಾ ಮಾರ್ಗೇ ನಿಬದ್ಧಾಂಜಲಿ- ರ್ನಾತಿಷ್ಠಂ ಬತ ಹಾ ಯತೋಽದ್ಯ ವಿಪುಲಾಮಾರ್ತಿಂ ವ್ರಜಾಮಿ ಪ್ರಭೋ ॥6॥

ಏಷ್ಯಾಮೀತಿ ವಿಮುಕ್ತಯಾಽಪಿ ಭಗವನ್ನಾಲೇಪದಾತ್ರ್ಯಾ ತಯಾ ದೂರಾತ್ ಕಾತರಯಾ ನಿರೀಕ್ಷಿತಗತಿಸ್ತ್ವಂ ಪ್ರಾವಿಶೋ ಗೋಪುರಮ್ । ಆಘೋಷಾನುಮಿತತ್ವದಾಗಮಮಹಾಹರ್ಷೋಲ್ಲಲದ್ದೇವಕೀ- ವಕ್ಷೋಜಪ್ರಗಲತ್ಪಯೋರಸಮಿಷಾತ್ತ್ವತ್ಕೀರ್ತಿರಂತರ್ಗತಾ ॥7॥