Vishnu · Traditional devotional text · Source: vignanam.org (Traditional devotional text (public-domain shlokas))
ത്രിദിവവര്ധകിവര്ധിതകൌശലം ത്രിദശദത്തസമസ്തവിഭൂതിമത് । ജലധിമധ്യഗതം ത്വമഭൂഷയോ നവപുരം വപുരംചിതരോചിഷാ ॥1॥
ദദുഷി രേവതഭൂഭൃതി രേവതീം ഹലഭൃതേ തനയാം വിധിശാസനാത് । മഹിതമുത്സവഘോഷമപൂപുഷഃ സമുദിതൈര്മുദിതൈഃ സഹ യാദവൈഃ ॥2॥
Offered for worship and study, not as prediction. Non-commercial.
More devotional texts
അഥ വിദര്ഭസുതാം ഖലു രുക്മിണീം പ്രണയിനീം ത്വയി ദേവ സഹോദരഃ । സ്വയമദിത്സത ചേദിമഹീഭുജേ സ്വതമസാ തമസാധുമുപാശ്രയന് ॥3॥
ചിരധൃതപ്രണയാ ത്വയി ബാലികാ സപദി കാംക്ഷിതഭംഗസമാകുലാ । തവ നിവേദയിതും ദ്വിജമാദിശത് സ്വകദനം കദനംഗവിനിര്മിതമ് ॥4॥
ദ്വിജസുതോഽപി ച തൂര്ണമുപായയൌ തവ പുരം ഹി ദുരാശദുരാസദമ് । മുദമവാപ ച സാദരപൂജിതഃ സ ഭവതാ ഭവതാപഹൃതാ സ്വയമ് ॥5॥
സ ച ഭവംതമവോചത കുംഡിനേ നൃപസുതാ ഖലു രാജതി രുക്മിണീ । ത്വയി സമുത്സുകയാ നിജധീരതാരഹിതയാ ഹി തയാ പ്രഹിതോഽസ്മ്യഹമ് ॥6॥
തവ ഹൃതാഽസ്മി പുരൈവ ഗുണൈരഹം ഹരതി മാം കില ചേദിനൃപോഽധുനാ । അയി കൃപാലയ പാലയ മാമിതി പ്രജഗദേ ജഗദേകപതേ തയാ ॥7॥
അശരണാം യദി മാം ത്വമുപേക്ഷസേ സപദി ജീവിതമേവ ജഹാമ്യഹമ് । ഇതി ഗിരാ സുതനോരതനോത് ഭൃശം സുഹൃദയം ഹൃദയം തവ കാതരമ് ॥8॥
അകഥയസ്ത്വമഥൈനമയേ സഖേ തദധികാ മമ മന്മഥവേദനാ । നൃപസമക്ഷമുപേത്യ ഹരാമ്യഹം തദയി താം ദയിതാമസിതേക്ഷണാമ് ॥9॥
പ്രമുദിതേന ച തേന സമം തദാ രഥഗതോ ലഘു കുംഡിനമേയിവാന് । ഗുരുമരുത്പുരനായക മേ ഭവാന് വിതനുതാം തനുതാം നിഖിലാപദാമ് ॥10॥
Browse Related Categories: