Narayaniyam Dashaka 83

രാമേഽഥ ഗോകുലഗതേ പ്രമദാപ്രസക്തേ ഹൂതാനുപേതയമുനാദമനേ മദാംധേ । സ്വൈരം സമാരമതി സേവകവാദമൂഢോ ദൂതം ന്യയുംക്ത തവ പൌംഡ്രകവാസുദേവഃ ॥1॥

നാരായണോഽഹമവതീര്ണ ഇഹാസ്മി ഭൂമൌ ധത്സേ കില ത്വമപി മാമകലക്ഷണാനി । ഉത്സൃജ്യ താനി ശരണം വ്രജ മാമിതി ത്വാം ദൂതോ ജഗാദ സകലൈര്ഹസിതഃ സഭായാമ് ॥2॥

ദൂതേഽഥ യാതവതി യാദവസൈനികൈസ്ത്വം യാതോ ദദര്ശിഥ വപുഃ കില പൌംഡ്രകീയമ് । താപേന വക്ഷസി കൃതാംകമനല്പമൂല്യ- ശ്രീകൌസ്തുഭം മകരകുംഡലപീതചേലമ് ॥3॥

കാലായസം നിജസുദര്ശനമസ്യതോഽസ്യ കാലാനലോത്കരകിരേണ സുദര്ശനേന । ശീര്ഷം ചകര്തിഥ മമര്ദിഥ ചാസ്യ സേനാം തന്മിത്രകാശിപശിരോഽപി ചകര്ഥ കാശ്യാമ് ॥4॥

ജാല്യേന ബാലകഗിരാഽപി കിലാഹമേവ ശ്രീവാസുദേവ ഇതി രൂഢമതിശ്ചിരം സഃ । സായുജ്യമേവ ഭവദൈക്യധിയാ ഗതോഽഭൂത് കോ നാമ കസ്യ സുകൃതം കഥമിത്യവേയാത് ॥5॥

കാശീശ്വരസ്യ തനയോഽഥ സുദക്ഷിണാഖ്യഃ ശർവം പ്രപൂജ്യ ഭവതേ വിഹിതാഭിചാരഃ । കൃത്യാനലം കമപി ബാണ്രരണാതിഭീതൈ- ര്ഭൂതൈഃ കഥംചന വൃതൈഃ സമമഭ്യമുംചത് ॥6॥

താലപ്രമാണചരണാമഖിലം ദഹംതീം കൃത്യാം വിലോക്യ ചകിതൈഃ കഥിതോഽപി പൌരൈഃ । ദ്യൂതോത്സവേ കിമപി നോ ചലിതോ വിഭോ ത്വം പാര്ശ്വസ്ഥമാശു വിസസര്ജിഥ കാലചക്രമ് ॥7॥

അഭ്യാപതത്യമിതധാമ്നി ഭവന്മഹാസ്ത്രേ ഹാ ഹേതി വിദ്രുതവതീ ഖലു ഘോരകൃത്യാ। രോഷാത് സുദക്ഷിണമദക്ഷിണചേഷ്ടിതം തം പുപ്ലോഷ ചക്രമപി കാശിപുരീമധാക്ഷീത് ॥8॥