Sankshepa Ramayanam

buddhimān nītimān vāgmī śrīmān śatrunibarhaṇaḥ । vipulāṃsō mahābāhuḥ kambugrīvō mahāhanuḥ ॥ 9 ॥

mahōraskō mahēṣvāsō gūḍhajatrurarindamaḥ । ājānubāhuḥ suśirāḥ sulalāṭaḥ suvikramaḥ ॥ 10 ॥

samaḥ samavibhaktāṅgaḥ snigdhavarṇaḥ pratāpavān । pīnavakṣā viśālākṣō lakṣmīvān śubhalakṣaṇaḥ ॥ 11 ॥

dharmajñaḥ satyasandhaścha prajānāṃ cha hitē rataḥ । yaśasvī jñānasampannaḥ śuchirvaśyaḥ samādhimān ॥ 12 ॥

prajāpatisamaḥ śrīmān dhātā ripuniṣūdanaḥ । rakṣitā jīvalōkasya dharmasya parirakṣitā ॥ 13 ॥

rakṣitā svasya dharmasya svajanasya cha rakṣitā । vēdavēdāṅgatattvajñō dhanurvēdē cha niṣṭhitaḥ ॥ 14 ॥

sarvaśāstrārthatattvajñō smṛtimānpratibhānavān । sarvalōkapriyaḥ sādhuradīnātmā vichakṣaṇaḥ ॥ 15 ॥

sarvadābhigataḥ sadbhiḥ samudra iva sindhubhiḥ । āryaḥ sarvasamaśchaiva sadaikapriyadarśanaḥ ॥ 16 ॥

sa cha sarvaguṇōpētaḥ kausalyānandavardhanaḥ । samudra iva gāmbhīryē dhairyēṇa himavāniva ॥ 17 ॥

viṣṇunā sadṛśō vīryē sōmavatpriyadarśanaḥ । kālāgnisadṛśaḥ krōdhē kṣamayā pṛthivīsamaḥ ॥ 18 ॥

dhanadēna samastyāgē satyē dharma ivāparaḥ । tamēvaṃ guṇasampannaṃ rāmaṃ satyaparākramam ॥ 19 ॥

jyēṣṭhaṃ śrēṣṭhaguṇairyuktaṃ priyaṃ daśarathaḥ sutam । prakṛtīnāṃ hitairyuktaṃ prakṛti priya kāmyayā ॥ 20 ॥

yauvarājyēna saṃyōktumaichChatprītyā mahīpatiḥ । tasyābhiṣēkasambhārān dṛṣṭvā bhāryā'tha kaikayī ॥ 21 ॥

pūrvaṃ dattavarā dēvī varamēnamayāchata । vivāsanaṃ cha rāmasya bharatasyābhiṣēchanam ॥ 22 ॥

sa satyavachanādrājā dharmapāśēna saṃyataḥ । vivāsayāmāsa sutaṃ rāmaṃ daśarathaḥ priyam ॥ 23 ॥

sa jagāma vanaṃ vīraḥ pratijñāmanupālayan । piturvachananirdēśātkaikēyyāḥ priyakāraṇāt ॥ 24 ॥

taṃ vrajantaṃ priyō bhrātā lakṣmaṇō'nujagāma ha । snēhādvinayasampannaḥ sumitrānandavardhanaḥ ॥ 25 ॥

bhrātaraṃ dayitō bhrātuḥ saubhrātramanudarśayan । rāmasya dayitā bhāryā nityaṃ prāṇasamāhitā ॥ 26 ॥

janakasya kulē jātā dēvamāyēva nirmitā । sarvalakṣaṇasampannā nārīṇāmuttamā vadhūḥ ॥ 27 ॥

sītā'pyanugatā rāmaṃ śaśinaṃ rōhiṇī yathā । paurairanugatō dūraṃ pitrā daśarathēna cha ॥ 28 ॥

śṛṅgibērapurē sūtaṃ gaṅgākūlē vyasarjayat । guhamāsādya dharmātmā niṣādādhipatiṃ priyam ॥ 29 ॥

guhēna sahitō rāmaḥ lakṣmaṇēna cha sītayā । tē vanēna vanaṃ gatvā nadīstīrtvā bahūdakāḥ ॥ 30 ॥

chitrakūṭamanuprāpya bharadvājasya śāsanāt । ramyamāvasathaṃ kṛtvā ramamāṇā vanē trayaḥ ॥ 31 ॥

dēvagandharvasaṅkāśāstatra tē nyavasansukham । chitrakūṭaṃ gatē rāmē putraśōkāturastathā ॥ 32 ॥

rājā daśarathaḥ svargaṃ jagāma vilapansutam । mṛtē tu tasminbharatō vasiṣṭhapramukhairdvijaiḥ ॥ 33 ॥

niyujyamānō rājyāya naichChadrājyaṃ mahābalaḥ । sa jagāma vanaṃ vīrō rāmapādaprasādakaḥ ॥ 34 ॥

gatvā tu sa mahātmānaṃ rāmaṃ satyaparākramam । ayāchadbhrātaraṃ rāmaṃ āryabhāvapuraskṛtaḥ ॥ 35 ॥

tvamēva rājā dharmajña iti rāmaṃ vachō'bravīt । rāmō'pi paramōdāraḥ sumukhassumahāyaśāḥ ॥ 36 ॥

na chaichChatpiturādēśādrājyaṃ rāmō mahābalaḥ । pādukē chāsya rājyāya nyāsaṃ dattvā punaḥ punaḥ ॥ 37 ॥

nivartayāmāsa tatō bharataṃ bharatāgrajaḥ । sa kāmamanavāpyaiva rāmapādāvupaspṛśan ॥ 38 ॥

nandigrāmē'karōdrājyaṃ rāmāgamanakāṅkṣayā । gatē tu bharatē śrīmān satyasandhō jitēndriyaḥ ॥ 39 ॥

rāmastu punarālakṣya nāgarasya janasya cha । tatrāgamanamēkāgrō daṇḍakānpravivēśa ha ॥ 40 ॥

praviśya tu mahāraṇyaṃ rāmō rājīvalōchanaḥ । virādhaṃ rākṣasaṃ hatvā śarabhaṅgaṃ dadarśa ha ॥ 41 ॥

sutīkṣṇaṃ chāpyagastyaṃ cha agastyabhrātaraṃ tathā । agastyavachanāchchaiva jagrāhaindraṃ śarāsanam ॥ 42 ॥

khaḍgaṃ cha paramaprītastūṇī chākṣayasāyakau । vasatastasya rāmasya vanē vanacharaiḥ saha ॥ 43 ॥

ṛṣayō'bhyāgamansarvē vadhāyāsurarakṣasām । sa tēṣāṃ pratiśuśrāva rākṣasānāṃ tathā vanē ॥ 44 ॥

pratijñātaścha rāmēṇa vadhaḥ saṃyati rakṣasām । ṛṣīṇāmagnikalpānāṃ daṇḍakāraṇyavāsinām ॥ 45 ॥

tēna tatraiva vasatā janasthānanivāsinī । virūpitā śūrpaṇakhā rākṣasī kāmarūpiṇī ॥ 46 ॥

tataḥ śūrpaṇakhāvākyādudyuktānsarvarākṣasān । kharaṃ triśirasaṃ chaiva dūṣaṇaṃ chaiva rākṣasam ॥ 47 ॥

nijaghāna raṇē rāmastēṣāṃ chaiva padānugān । vanē tasminnivasatā janasthānanivāsinām ॥ 48 ॥

rakṣasāṃ nihatānyāsansahasrāṇi chaturdaśa । tatō jñātivadhaṃ śrutvā rāvaṇaḥ krōdhamūrChitaḥ ॥ 49 ॥

sahāyaṃ varayāmāsa mārīchaṃ nāma rākṣasam । vāryamāṇaḥ subahuśō mārīchēna sa rāvaṇaḥ ॥ 50 ॥

na virōdhō balavatā kṣamō rāvaṇa tēna tē । anādṛtya tu tadvākyaṃ rāvaṇaḥ kālachōditaḥ ॥ 51 ॥

jagāma sahamārīchaḥ tasyāśramapadaṃ tadā । tēna māyāvinā dūramapavāhya nṛpātmajau ॥ 52 ॥

jahāra bhāryāṃ rāmasya gṛdhraṃ hatvā jaṭāyuṣam । gṛdhraṃ cha nihataṃ dṛṣṭvā hṛtāṃ śrutvā cha maithilīm ॥ 53 ॥

rāghavaḥ śōkasantaptō vilalāpākulēndriyaḥ । tatastēnaiva śōkēna gṛdhraṃ dagdhvā jaṭāyuṣam ॥ 54 ॥

mārgamāṇō vanē sītāṃ rākṣasaṃ sandadarśa ha । kabandhaṃ nāma rūpēṇa vikṛtaṃ ghōradarśanam ॥ 55 ॥

taṃ nihatya mahābāhuḥ dadāha svargataścha saḥ । sa chāsya kathayāmāsa śabarīṃ dharmachāriṇīm ॥ 56 ॥

śramaṇīṃ dharmanipuṇāmabhigachChēti rāghavam । sō'bhyagachChanmahātējāḥ śabarīṃ śatrusūdanaḥ ॥ 57 ॥

śabaryā pūjitaḥ samyagrāmō daśarathātmajaḥ । pampātīrē hanumatā saṅgatō vānarēṇa ha ॥ 58 ॥

hanumadvachanāchchaiva sugrīvēṇa samāgataḥ । sugrīvāya cha tatsarvaṃ śaṃsadrāmō mahābalaḥ ॥ 59 ॥

āditastadyathāvṛttaṃ sītayāścha viśēṣataḥ । sugrīvaśchāpi tatsarvaṃ śrutvā rāmasya vānaraḥ ॥ 60 ॥

chakāra sakhyaṃ rāmēṇa prītaśchaivāgnisākṣikam । tatō vānararājēna vairānukathanaṃ prati ॥ 61 ॥

rāmāyāvēditaṃ sarvaṃ praṇayādduḥkhitēna cha । pratijñātaṃ cha rāmēṇa tadā vālivadhaṃ prati ॥ 62 ॥

vālinaścha balaṃ tatra kathayāmāsa vānaraḥ । sugrīvaḥ śaṅkitaśchāsīnnityaṃ vīryēṇa rāghavē ॥ 63 ॥

rāghavaḥ pratyayārthaṃ tu dundubhēḥ kāyamuttamam । darśayāmāsa sugrīvō mahāparvata sannibham ॥ 64 ॥

utsmayitvā mahābāhuḥ prēkṣya chāsthi mahābalaḥ । pādāṅguṣṭhēna chikṣēpa sampūrṇaṃ daśayōjanam ॥ 65 ॥

bibhēda cha punaḥ sālānsaptaikēna mahēṣuṇā । giriṃ rasātalaṃ chaiva janayan pratyayaṃ tadā ॥ 66 ॥

tataḥ prītamanāstēna viśvastaḥ sa mahākapiḥ । kiṣkindhāṃ rāmasahitō jagāma cha guhāṃ tadā ॥ 67 ॥

tatō'garjaddharivaraḥ sugrīvō hēmapiṅgaḻaḥ । tēna nādēna mahatā nirjagāma harīśvaraḥ ॥ 68 ॥

anumānya tadā tārāṃ sugrīvēṇa samāgataḥ । nijaghāna cha tatrainaṃ śarēṇaikēna rāghavaḥ ॥ 69 ॥

tataḥ sugrīvavachanāddhatvā vālinamāhavē । sugrīvamēva tadrājyē rāghavaḥ pratyapādayat ॥ 70 ॥

sa cha sarvānsamānīya vānarānvānararṣabhaḥ । diśaḥ prasthāpayāmāsa didṛkṣurjanakātmajām ॥ 71 ॥

tatō gṛdhrasya vachanātsampātērhanumānbalī । śatayōjanavistīrṇaṃ pupluvē lavaṇārṇavam ॥ 72 ॥

tatra laṅkāṃ samāsādya purīṃ rāvaṇapālitām । dadarśa sītāṃ dhyāyantīṃ aśōkavanikāṃ gatām ॥ 73 ॥

nivēdayitvā'bhijñānaṃ pravṛttiṃ cha nivēdya cha । samāśvāsya cha vaidēhīṃ mardayāmāsa tōraṇam ॥ 74 ॥

pañcha sēnāgragānhatvā sapta mantrisutānapi । śūramakṣaṃ cha niṣpiṣya grahaṇaṃ samupāgamat ॥ 75 ॥

astrēṇōnmuktamātmānaṃ jñātvā paitāmahādvarāt । marṣayanrākṣasānvīrō yantriṇastānyadṛchChayā ॥ 76 ॥

tatō dagdhvā purīṃ laṅkāṃ ṛtē sītāṃ cha maithilīm । rāmāya priyamākhyātuṃ punarāyānmahākapiḥ ॥ 77 ॥

sō'bhigamya mahātmānaṃ kṛtvā rāmaṃ pradakṣiṇam । nyavēdayadamēyātmā dṛṣṭā sītēti tattvataḥ ॥ 78 ॥

tataḥ sugrīvasahitō gatvā tīraṃ mahōdadhēḥ । samudraṃ kṣōbhayāmāsa śarairādityasannibhaiḥ ॥ 79 ॥

darśayāmāsa chātmānaṃ samudraḥ saritāṃ patiḥ । samudravachanāchchaiva nalaṃ sētumakārayat ॥ 80 ॥

tēna gatvā purīṃ laṅkāṃ hatvā rāvaṇamāhavē । rāmaḥ sītāmanuprāpya parāṃ vrīḍāmupāgamat ॥ 81 ॥

tāmuvācha

tatō rāmaḥ paruṣaṃ janasaṃsadi । amṛṣyamāṇā sā sītā vivēśa jvalanaṃ satī ॥ 82

tatō'gnivachanātsītāṃ jñātvā vigatakalmaṣām । babhau rāmaḥ samprahṛṣṭaḥ pūjitaḥ sarvadaivataiḥ ॥ 83 ॥

karmaṇā tēna mahatā trailōkyaṃ sacharācharam । sadēvarṣigaṇaṃ tuṣṭaṃ rāghavasya mahātmanaḥ ॥ 84 ॥

abhiṣichya cha laṅkāyāṃ rākṣasēndraṃ vibhīṣaṇam । kṛtakṛtyastadā rāmō vijvaraḥ pramumōda ha ॥ 85 ॥

dēvatābhyō varaṃ prāpya samutthāpya cha vānarān । ayōdhyāṃ prasthitō rāmaḥ puṣpakēṇa suhṛdvṛtaḥ ॥ 86 ॥

bharadvājāśramaṃ gatvā rāmaḥ satyaparākramaḥ । bharatasyāntikaṃ rāmō hanūmantaṃ vyasarjayat ॥ 87 ॥

punarākhyāyikāṃ jalpansugrīvasahitaścha saḥ । puṣpakaṃ tatsamāruhya nandigrāmaṃ yayau tadā ॥ 88 ॥

nandigrāmē jaṭāṃ hitvā bhrātṛbhiḥ sahitō'naghaḥ । rāmaḥ sītāmanuprāpya rājyaṃ punaravāptavān ॥ 89 ॥

prahṛṣṭamuditō lōkastuṣṭaḥ puṣṭaḥ sudhārmikaḥ । nirāmayō hyarōgaścha durbhikṣa bhayavarjitaḥ ॥ 90 ॥

na putramaraṇaṃ kiñchiddrakṣyanti puruṣāḥ kvachit । nāryaśchāvidhavā nityaṃ bhaviṣyanti pativratāḥ ॥ 91 ॥

na chāgnijaṃ bhayaṃ kiñchinnāpsu majjanti jantavaḥ । na vātajaṃ bhayaṃ kiñchinnāpi jvarakṛtaṃ tathā ॥ 92 ॥

na chāpi kṣudbhayaṃ tatra na taskarabhayaṃ tathā । nagarāṇi cha rāṣṭrāṇi dhanadhānyayutāni cha ॥ 93 ॥

nityaṃ pramuditāḥ sarvē yathā kṛtayugē tathā । aśvamēdhaśatairiṣṭvā tathā bahusuvarṇakaiḥ ॥ 94 ॥

gavāṃ kōṭyayutaṃ datvā brahmalōkaṃ prayāsyati । asaṅkhyēyaṃ dhanaṃ datvā brāhmaṇēbhyō mahāyaśāḥ ॥ 95 ॥

rājavaṃśān śataguṇān sthāpayiṣyati rāghavaḥ । chāturvarṇyaṃ cha lōkē'smin svē svē dharmē niyōkṣyati ॥ 96 ॥

daśavarṣasahasrāṇi daśavarṣaśatāni cha । rāmō rājyamupāsitvā brahmalōkaṃ gamiṣyati ॥ 97 ॥

idaṃ pavitraṃ pāpaghnaṃ puṇyaṃ vēdaiścha sammitam । yaḥ paṭhēdrāmacharitaṃ sarvapāpaiḥ pramuchyatē ॥ 98 ॥

ētadākhyānamāyuṣyaṃ paṭhanrāmāyaṇaṃ naraḥ । saputrapautraḥ sagaṇaḥ prētya svargē mahīyatē ॥ 99 ॥

paṭhan dvijō vāgṛṣabhatvamīyāt syāt kṣatriyō bhūmipatitvamīyāt । vaṇigjanaḥ paṇyaphalatvamīyāt janaścha śūdrō'pi mahattvamīyāt ॥ 100 ॥

ityārṣē śrīmadrāmāyaṇē vālmīkīyē ādikāvyē bālakāṇḍē nāradavākyaṃ nāma prathamaḥ sargaḥ ॥

Browse Related Categories: