Sri Krishna · Traditional devotional text · Source: vignanam.org (Traditional devotional text (public-domain shlokas))
॥ ഷഷ്ഠഃ സര്ഗഃ ॥ ॥ കുംഠവൈകുംഠഃ ॥
അഥ താം ഗംതുമശക്താം ചിരമനുരക്താം ലതാഗൃഹേ ദൃഷ്ട്വാ । തച്ചരിതം ഗോവിംദേ മനസിജമംദേ സഖീ പ്രാഹ ॥ 37 ॥
Offered for worship and study, not as prediction. Non-commercial.
More devotional texts
॥ ഗീതം 12 ॥
പശ്യതി ദിശി ദിശി രഹസി ഭവംതമ് । തദധരമധുരമധൂനി പിബംതമ് ॥ നാഥ ഹരേ ജഗന്നാഥ ഹരേ സീദതി രാധാ വാസഗൃഹേ - ധ്രുവമ് ॥ 1 ॥
ത്വദഭിസരണരഭസേന വലംതീ । പതതി പദാനി കിയംതി ചലംതീ ॥ 2 ॥
വിഹിതവിശദബിസകിസലയവലയാ । ജീവതി പരമിഹ തവ രതികലയാ ॥ 3 ॥
മുഹുരവലോകിതമംഡനലീലാ । മധുരിപുരഹമിതി ഭാവനശീലാ ॥ 4 ॥
ത്വരിതമുപൈതി ന കഥമഭിസാരമ് । ഹരിരിതി വദതി സഖീമനുവാരമ് ॥ 5 ॥
ശ്ലിഷ്യതി ചുംബതി ജലധരകല്പമ് । ഹരിരുപഗത ഇതി തിമിരമനല്പമ് ॥ 6 ॥
ഭവതി വിലംബിനി വിഗലിതലജ്ജാ । വിലപതി രോദിതി വാസകസജ്ജാ ॥ 7 ॥
ശ്രീജയദേവകവേരിദമുദിതമ് । രസികജനം തനുതാമതിമുദിതമ് ॥ 8 ॥
വിപുലപുലകപാലിഃ സ്ഫീതസീത്കാരമംത-ര്ജനിതജഡിമകാകുവ്യാകുലം വ്യാഹരംതീ । തവ കിതവ വിധത്തേഽമംദകംദര്പചിംതാം രസജലധിനിമഗ്നാ ധ്യാനലഗ്നാ മൃഗാക്ഷീ ॥ 38 ॥
അംഗേഷ്വാഭരണം കരോതി ബഹുശഃ പത്രേഽപി സംചാരിണി പ്രാപ്തം ത്വാം പരിശംകതേ വിതനുതേ ശയ്യാം ചിരം ധ്യായതി । ഇത്യാകല്പവികല്പതല്പരചനാസംകല്പലീലാശത-വ്യാസക്താപി വിനാ ത്വയാ വരതനുര്നൈഷാ നിശാം നേഷ്യതി ॥ 39 ॥
കിം വിശ്രാമ്യസി കൃഷ്ണഭോഗിഭവനേ ഭാംഡീരഭൂമീരുഹി ഭ്രാത ര്യാഹി നദൃഷ്ടിഗോചരമിതസ്സാനംദനംദാസ്പദമ്। രധായാവചനം തദധ്വഗമുഖാന്നംദാംതികേഗോപതോ ഗോവിംദസ്യജയംതി സായമതിഥിപ്രാശസ്ത്യഗര്ഭാഗിരഃ॥ 40 ॥
॥ ഇതി ഗീതഗോവിംദേ വാസകസജ്ജാവര്ണനേ കുംഠവൈകുംഠോ നാമ ഷഷ്ഠഃ സര്ഗഃ ॥
Browse Related Categories: