ನಾರಾಯಣೀಯಂ ದಶಕ 10 - ಸೃಷ್ಟಿವೈವಿಧ್ಯಂ

ವೈಕುಂಠ ವರ್ಧಿತಬಲೋಽಥ ಭವತ್ಪ್ರಸಾದಾ- ದಂಭೋಜಯೋನಿರಸೃಜತ್ ಕಿಲ ಜೀವದೇಹಾನ್ । ಸ್ಥಾಸ್ನೂನಿ ಭೂರುಹಮಯಾನಿ ತಥಾ ತಿರಶ್ಚಾಂ ಜಾತಿಂ ಮನುಷ್ಯನಿವಹಾನಪಿ ದೇವಭೇದಾನ್ ॥1॥

ಮಿಥ್ಯಾಗ್ರಹಾಸ್ಮಿಮತಿರಾಗವಿಕೋಪಭೀತಿ- ರಜ್ಞಾನವೃತ್ತಿಮಿತಿ ಪಂಚವಿಧಾಂ ಸ ಸೃಷ್ಟ್ವಾ । ಉದ್ದಾಮತಾಮಸಪದಾರ್ಥವಿಧಾನದೂನ - ಸ್ತೇನೇ ತ್ವದೀಯಚರಣಸ್ಮರಣಂ ವಿಶುದ್ಧ್ಯೈ ॥2॥

ತಾವತ್ ಸಸರ್ಜ ಮನಸಾ ಸನಕಂ ಸನಂದಂ ಭೂಯಃ ಸನಾತನಮುನಿಂ ಚ ಸನತ್ಕುಮಾರಮ್ । ತೇ ಸೃಷ್ಟಿಕರ್ಮಣಿ ತು ತೇನ ನಿಯುಜ್ಯಮಾನಾ- ಸ್ತ್ವತ್ಪಾದಭಕ್ತಿರಸಿಕಾ ಜಗೃಹುರ್ನ ವಾಣೀಮ್ ॥3॥

ತಾವತ್ ಪ್ರಕೋಪಮುದಿತಂ ಪ್ರತಿರುಂಧತೋಽಸ್ಯ ಭ್ರೂಮಧ್ಯತೋಽಜನಿ ಮೃಡೋ ಭವದೇಕದೇಶಃ । ನಾಮಾನಿ ಮೇ ಕುರು ಪದಾನಿ ಚ ಹಾ ವಿರಿಂಚೇ- ತ್ಯಾದೌ ರುರೋದ ಕಿಲ ತೇನ ಸ ರುದ್ರನಾಮಾ ॥4॥

ಏಕಾದಶಾಹ್ವಯತಯಾ ಚ ವಿಭಿನ್ನರೂಪಂ ರುದ್ರಂ ವಿಧಾಯ ದಯಿತಾ ವನಿತಾಶ್ಚ ದತ್ವಾ । ತಾವಂತ್ಯದತ್ತ ಚ ಪದಾನಿ ಭವತ್ಪ್ರಣುನ್ನಃ ಪ್ರಾಹ ಪ್ರಜಾವಿರಚನಾಯ ಚ ಸಾದರಂ ತಮ್ ॥5॥

ರುದ್ರಾಭಿಸೃಷ್ಟಭಯದಾಕೃತಿರುದ್ರಸಂಘ- ಸಂಪೂರ್ಯಮಾಣಭುವನತ್ರಯಭೀತಚೇತಾಃ । ಮಾ ಮಾ ಪ್ರಜಾಃ ಸೃಜ ತಪಶ್ಚರ ಮಂಗಲಾಯೇ- ತ್ಯಾಚಷ್ಟ ತಂ ಕಮಲಭೂರ್ಭವದೀರಿತಾತ್ಮಾ ॥6॥

ತಸ್ಯಾಥ ಸರ್ಗರಸಿಕಸ್ಯ ಮರೀಚಿರತ್ರಿ- ಸ್ತತ್ರಾಙಿಗರಾಃ ಕ್ರತುಮುನಿಃ ಪುಲಹಃ ಪುಲಸ್ತ್ಯಃ । ಅಂಗಾದಜಾಯತ ಭೃಗುಶ್ಚ ವಸಿಷ್ಠದಕ್ಷೌ ಶ್ರೀನಾರದಶ್ಚ ಭಗವನ್ ಭವದಂಘ್ರಿದಾಸಃ ॥7॥

ಧರ್ಮಾದಿಕಾನಭಿಸೃಜನ್ನಥ ಕರ್ದಮಂ ಚ ವಾಣೀಂ ವಿಧಾಯ ವಿಧಿರಂಗಜಸಂಕುಲೋಽಭೂತ್ । ತ್ವದ್ಬೋಧಿತೈಸ್ಸನಕದಕ್ಷಮುಖೈಸ್ತನೂಜೈ- ರುದ್ಬೋಧಿತಶ್ಚ ವಿರರಾಮ ತಮೋ ವಿಮುಂಚನ್ ॥8॥