ನಾರಾಯಣೀಯಂ ದಶಕ 26 - ಗಜೇಂದ್ರಮೋಕ್ಷಂ

ಇಂದ್ರದ್ಯುಮ್ನಃ ಪಾಂಡ್ಯಖಂಡಾಧಿರಾಜ- ಸ್ತ್ವದ್ಭಕ್ತಾತ್ಮಾ ಚಂದನಾದ್ರೌ ಕದಾಚಿತ್ । ತ್ವತ್ ಸೇವಾಯಾಂ ಮಗ್ನಧೀರಾಲುಲೋಕೇ ನೈವಾಗಸ್ತ್ಯಂ ಪ್ರಾಪ್ತಮಾತಿಥ್ಯಕಾಮಮ್ ॥1॥

ಕುಂಭೋದ್ಭೂತಿಃ ಸಂಭೃತಕ್ರೋಧಭಾರಃ ಸ್ತಬ್ಧಾತ್ಮಾ ತ್ವಂ ಹಸ್ತಿಭೂಯಂ ಭಜೇತಿ । ಶಪ್ತ್ವಾಽಥೈನಂ ಪ್ರತ್ಯಗಾತ್ ಸೋಽಪಿ ಲೇಭೇ ಹಸ್ತೀಂದ್ರತ್ವಂ ತ್ವತ್ಸ್ಮೃತಿವ್ಯಕ್ತಿಧನ್ಯಮ್ ॥2॥

ದಗ್ಧಾಂಭೋಧೇರ್ಮಧ್ಯಭಾಜಿ ತ್ರಿಕೂಟೇ ಕ್ರೀಡಂಛೈಲೇ ಯೂಥಪೋಽಯಂ ವಶಾಭಿಃ । ಸರ್ವಾನ್ ಜಂತೂನತ್ಯವರ್ತಿಷ್ಟ ಶಕ್ತ್ಯಾ ತ್ವದ್ಭಕ್ತಾನಾಂ ಕುತ್ರ ನೋತ್ಕರ್ಷಲಾಭಃ ॥3॥

ಸ್ವೇನ ಸ್ಥೇಮ್ನಾ ದಿವ್ಯದೇಶತ್ವಶಕ್ತ್ಯಾ ಸೋಽಯಂ ಖೇದಾನಪ್ರಜಾನನ್ ಕದಾಚಿತ್ । ಶೈಲಪ್ರಾಂತೇ ಘರ್ಮತಾಂತಃ ಸರಸ್ಯಾಂ ಯೂಥೈಸ್ಸಾರ್ಧಂ ತ್ವತ್ಪ್ರಣುನ್ನೋಽಭಿರೇಮೇ ॥4॥

ಹೂಹೂಸ್ತಾವದ್ದೇವಲಸ್ಯಾಪಿ ಶಾಪಾತ್ ಗ್ರಾಹೀಭೂತಸ್ತಜ್ಜಲೇ ಬರ್ತಮಾನಃ । ಜಗ್ರಾಹೈನಂ ಹಸ್ತಿನಂ ಪಾದದೇಶೇ ಶಾಂತ್ಯರ್ಥಂ ಹಿ ಶ್ರಾಂತಿದೋಽಸಿ ಸ್ವಕಾನಾಮ್ ॥5॥

ತ್ವತ್ಸೇವಾಯಾ ವೈಭವಾತ್ ದುರ್ನಿರೋಧಂ ಯುಧ್ಯಂತಂ ತಂ ವತ್ಸರಾಣಾಂ ಸಹಸ್ರಮ್ । ಪ್ರಾಪ್ತೇ ಕಾಲೇ ತ್ವತ್ಪದೈಕಾಗ್ರ್ಯಸಿಧ್ಯೈ ನಕ್ರಾಕ್ರಾಂತಂ ಹಸ್ತಿವರ್ಯಂ ವ್ಯಧಾಸ್ತ್ವಮ್ ॥6॥

ಆರ್ತಿವ್ಯಕ್ತಪ್ರಾಕ್ತನಜ್ಞಾನಭಕ್ತಿಃ ಶುಂಡೋತ್ಕ್ಷಿಪ್ತೈಃ ಪುಂಡರೀಕೈಃ ಸಮರ್ಚನ್ । ಪೂರ್ವಾಭ್ಯಸ್ತಂ ನಿರ್ವಿಶೇಷಾತ್ಮನಿಷ್ಠಂ ಸ್ತೋತ್ರಂ ಶ್ರೇಷ್ಠಂ ಸೋಽನ್ವಗಾದೀತ್ ಪರಾತ್ಮನ್ ॥7॥

ಶ್ರುತ್ವಾ ಸ್ತೋತ್ರಂ ನಿರ್ಗುಣಸ್ಥಂ ಸಮಸ್ತಂ ಬ್ರಹ್ಮೇಶಾದ್ಯೈರ್ನಾಹಮಿತ್ಯಪ್ರಯಾತೇ । ಸರ್ವಾತ್ಮಾ ತ್ವಂ ಭೂರಿಕಾರುಣ್ಯವೇಗಾತ್ ತಾರ್ಕ್ಷ್ಯಾರೂಢಃ ಪ್ರೇಕ್ಷಿತೋಽಭೂಃ ಪುರಸ್ತಾತ್ ॥8॥