Vishnu · Traditional devotional text · Source: vignanam.org (Traditional devotional text (public-domain shlokas))
ತ್ವತ್ಸೇವೋತ್ಕಸ್ಸೌಭರಿರ್ನಾಮ ಪೂರ್ವಂ ಕಾಲಿಂದ್ಯಂತರ್ದ್ವಾದಶಾಬ್ದಂ ತಪಸ್ಯನ್ । ಮೀನವ್ರಾತೇ ಸ್ನೇಹವಾನ್ ಭೋಗಲೋಲೇ ತಾರ್ಕ್ಷ್ಯಂ ಸಾಕ್ಷಾದೈಕ್ಷತಾಗ್ರೇ ಕದಾಚಿತ್ ॥1॥
ತ್ವದ್ವಾಹಂ ತಂ ಸಕ್ಷುಧಂ ತೃಕ್ಷಸೂನುಂ ಮೀನಂ ಕಂಚಿಜ್ಜಕ್ಷತಂ ಲಕ್ಷಯನ್ ಸಃ । ತಪ್ತಶ್ಚಿತ್ತೇ ಶಪ್ತವಾನತ್ರ ಚೇತ್ತ್ವಂ ಜಂತೂನ್ ಭೋಕ್ತಾ ಜೀವಿತಂ ಚಾಪಿ ಮೋಕ್ತಾ ॥2॥
Offered for worship and study, not as prediction. Non-commercial.
More devotional texts
ತಸ್ಮಿನ್ ಕಾಲೇ ಕಾಲಿಯಃ ಕ್ಷ್ವೇಲದರ್ಪಾತ್ ಸರ್ಪಾರಾತೇಃ ಕಲ್ಪಿತಂ ಭಾಗಮಶ್ನನ್ । ತೇನ ಕ್ರೋಧಾತ್ತ್ವತ್ಪದಾಂಭೋಜಭಾಜಾ ಪಕ್ಷಕ್ಷಿಪ್ತಸ್ತದ್ದುರಾಪಂ ಪಯೋಽಗಾತ್ ॥3॥
ಘೋರೇ ತಸ್ಮಿನ್ ಸೂರಜಾನೀರವಾಸೇ ತೀರೇ ವೃಕ್ಷಾ ವಿಕ್ಷತಾಃ ಕ್ಷ್ವೇಲವೇಗಾತ್ । ಪಕ್ಷಿವ್ರಾತಾಃ ಪೇತುರಭ್ರೇ ಪತಂತಃ ಕಾರುಣ್ಯಾರ್ದ್ರಂ ತ್ವನ್ಮನಸ್ತೇನ ಜಾತಮ್ ॥4॥
ಕಾಲೇ ತಸ್ಮಿನ್ನೇಕದಾ ಸೀರಪಾಣಿಂ ಮುಕ್ತ್ವಾ ಯಾತೇ ಯಾಮುನಂ ಕಾನನಾಂತಮ್ । ತ್ವಯ್ಯುದ್ದಾಮಗ್ರೀಷ್ಮಭೀಷ್ಮೋಷ್ಮತಪ್ತಾ ಗೋಗೋಪಾಲಾ ವ್ಯಾಪಿಬನ್ ಕ್ಷ್ವೇಲತೋಯಮ್ ॥5॥
ನಶ್ಯಜ್ಜೀವಾನ್ ವಿಚ್ಯುತಾನ್ ಕ್ಷ್ಮಾತಲೇ ತಾನ್ ವಿಶ್ವಾನ್ ಪಶ್ಯನ್ನಚ್ಯುತ ತ್ವಂ ದಯಾರ್ದ್ರಃ । ಪ್ರಾಪ್ಯೋಪಾಂತಂ ಜೀವಯಾಮಾಸಿಥ ದ್ರಾಕ್ ಪೀಯೂಷಾಂಭೋವರ್ಷಿಭಿಃ ಶ್ರೀಕಟಕ್ಷೈಃ ॥6॥
ಕಿಂ ಕಿಂ ಜಾತೋ ಹರ್ಷವರ್ಷಾತಿರೇಕಃ ಸರ್ವಾಂಗೇಷ್ವಿತ್ಯುತ್ಥಿತಾ ಗೋಪಸಂಘಾಃ । ದೃಷ್ಟ್ವಾಽಗ್ರೇ ತ್ವಾಂ ತ್ವತ್ಕೃತಂ ತದ್ವಿದಂತ- ಸ್ತ್ವಾಮಾಲಿಂಗನ್ ದೃಷ್ಟನಾನಾಪ್ರಭಾವಾಃ ॥7॥
ಗಾವಶ್ಚೈವಂ ಲಬ್ಧಜೀವಾಃ ಕ್ಷಣೇನ ಸ್ಫೀತಾನಂದಾಸ್ತ್ವಾಂ ಚ ದೃಷ್ಟ್ವಾ ಪುರಸ್ತಾತ್ । ದ್ರಾಗಾವವ್ರುಃ ಸರ್ವತೋ ಹರ್ಷಬಾಷ್ಪಂ ವ್ಯಾಮುಂಚಂತ್ಯೋ ಮಂದಮುದ್ಯನ್ನಿನಾದಾಃ ॥8॥
ರೋಮಾಂಚೋಽಯಂ ಸರ್ವತೋ ನಃ ಶರೀರೇ ಭೂಯಸ್ಯಂತಃ ಕಾಚಿದಾನಂದಮೂರ್ಛಾ । ಆಶ್ಚರ್ಯೋಽಯಂ ಕ್ಷ್ವೇಲವೇಗೋ ಮುಕುಂದೇ- ತ್ಯುಕ್ತೋ ಗೋಪೈರ್ನಂದಿತೋ ವಂದಿತೋಽಭೂಃ ॥9॥
ಏವಂ ಭಕ್ತಾನ್ ಮುಕ್ತಜೀವಾನಪಿ ತ್ವಂ ಮುಗ್ಧಾಪಾಂಗೈರಸ್ತರೋಗಾಂಸ್ತನೋಷಿ । ತಾದೃಗ್ಭೂತಸ್ಫೀತಕಾರುಣ್ಯಭೂಮಾ ರೋಗಾತ್ ಪಾಯಾ ವಾಯುಗೇಹಾಧಿವಾಸ ॥10॥
Browse Related Categories: