ನಾರಾಯಣೀಯಂ ದಶಕ 57 - ಪ್ರಲಂಬಾಸುರವಧಂ

ರಾಮಸಖಃ ಕ್ವಾಪಿ ದಿನೇ ಕಾಮದ ಭಗವನ್ ಗತೋ ಭವಾನ್ ವಿಪಿನಮ್ । ಸೂನುಭಿರಪಿ ಗೋಪಾನಾಂ ಧೇನುಭಿರಭಿಸಂವೃತೋ ಲಸದ್ವೇಷಃ ॥1॥

ಸಂದರ್ಶಯನ್ ಬಲಾಯ ಸ್ವೈರಂ ವೃಂದಾವನಶ್ರಿಯಂ ವಿಮಲಾಮ್ । ಕಾಂಡೀರೈಃ ಸಹ ಬಾಲೈರ್ಭಾಂಡೀರಕಮಾಗಮೋ ವಟಂ ಕ್ರೀಡನ್ ॥2॥

ತಾವತ್ತಾವಕನಿಧನಸ್ಪೃಹಯಾಲುರ್ಗೋಪಮೂರ್ತಿರದಯಾಲುಃ । ದೈತ್ಯಃ ಪ್ರಲಂಬನಾಮಾ ಪ್ರಲಂಬಬಾಹುಂ ಭವಂತಮಾಪೇದೇ ॥3॥

ಜಾನನ್ನಪ್ಯವಿಜಾನನ್ನಿವ ತೇನ ಸಮಂ ನಿಬದ್ಧಸೌಹಾರ್ದಃ । ವಟನಿಕಟೇ ಪಟುಪಶುಪವ್ಯಾಬದ್ಧಂ ದ್ವಂದ್ವಯುದ್ಧಮಾರಬ್ಧಾಃ ॥4॥

ಗೋಪಾನ್ ವಿಭಜ್ಯ ತನ್ವನ್ ಸಂಘಂ ಬಲಭದ್ರಕಂ ಭವತ್ಕಮಪಿ । ತ್ವದ್ಬಲಭೀರುಂ ದೈತ್ಯಂ ತ್ವದ್ಬಲಗತಮನ್ವಮನ್ಯಥಾ ಭಗವನ್ ॥5॥

ಕಲ್ಪಿತವಿಜೇತೃವಹನೇ ಸಮರೇ ಪರಯೂಥಗಂ ಸ್ವದಯಿತತರಮ್ । ಶ್ರೀದಾಮಾನಮಧತ್ಥಾಃ ಪರಾಜಿತೋ ಭಕ್ತದಾಸತಾಂ ಪ್ರಥಯನ್ ॥6॥

ಏವಂ ಬಹುಷು ವಿಭೂಮನ್ ಬಾಲೇಷು ವಹತ್ಸು ವಾಹ್ಯಮಾನೇಷು । ರಾಮವಿಜಿತಃ ಪ್ರಲಂಬೋ ಜಹಾರ ತಂ ದೂರತೋ ಭವದ್ಭೀತ್ಯಾ ॥7॥

ತ್ವದ್ದೂರಂ ಗಮಯಂತಂ ತಂ ದೃಷ್ಟ್ವಾ ಹಲಿನಿ ವಿಹಿತಗರಿಮಭರೇ । ದೈತ್ಯಃ ಸ್ವರೂಪಮಾಗಾದ್ಯದ್ರೂಪಾತ್ ಸ ಹಿ ಬಲೋಽಪಿ ಚಕಿತೋಽಭೂತ್ ॥8॥

ಉಚ್ಚತಯಾ ದೈತ್ಯತನೋಸ್ತ್ವನ್ಮುಖಮಾಲೋಕ್ಯ ದೂರತೋ ರಾಮಃ । ವಿಗತಭಯೋ ದೃಢಮುಷ್ಟ್ಯಾ ಭೃಶದುಷ್ಟಂ ಸಪದಿ ಪಿಷ್ಟವಾನೇನಂ ॥9॥