ನಾರಾಯಣೀಯಂ ದಶಕ 59 - ವೇಣುಗಾನವರ್ಣನಂ

ತ್ವದ್ವಪುರ್ನವಕಲಾಯಕೋಮಲಂ ಪ್ರೇಮದೋಹನಮಶೇಷಮೋಹನಮ್ । ಬ್ರಹ್ಮ ತತ್ತ್ವಪರಚಿನ್ಮುದಾತ್ಮಕಂ ವೀಕ್ಷ್ಯ ಸಮ್ಮುಮುಹುರನ್ವಹಂ ಸ್ತ್ರಿಯಃ ॥1॥

ಮನ್ಮಥೋನ್ಮಥಿತಮಾನಸಾಃ ಕ್ರಮಾತ್ತ್ವದ್ವಿಲೋಕನರತಾಸ್ತತಸ್ತತಃ । ಗೋಪಿಕಾಸ್ತವ ನ ಸೇಹಿರೇ ಹರೇ ಕಾನನೋಪಗತಿಮಪ್ಯಹರ್ಮುಖೇ ॥2॥

ನಿರ್ಗತೇ ಭವತಿ ದತ್ತದೃಷ್ಟಯಸ್ತ್ವದ್ಗತೇನ ಮನಸಾ ಮೃಗೇಕ್ಷಣಾಃ । ವೇಣುನಾದಮುಪಕರ್ಣ್ಯ ದೂರತಸ್ತ್ವದ್ವಿಲಾಸಕಥಯಾಽಭಿರೇಮಿರೇ ॥3॥

ಕಾನನಾಂತಮಿತವಾನ್ ಭವಾನಪಿ ಸ್ನಿಗ್ಧಪಾದಪತಲೇ ಮನೋರಮೇ । ವ್ಯತ್ಯಯಾಕಲಿತಪಾದಮಾಸ್ಥಿತಃ ಪ್ರತ್ಯಪೂರಯತ ವೇಣುನಾಲಿಕಾಮ್ ॥4॥

ಮಾರಬಾಣಧುತಖೇಚರೀಕುಲಂ ನಿರ್ವಿಕಾರಪಶುಪಕ್ಷಿಮಂಡಲಮ್ । ದ್ರಾವಣಂ ಚ ದೃಷದಾಮಪಿ ಪ್ರಭೋ ತಾವಕಂ ವ್ಯಜನಿ ವೇಣುಕೂಜಿತಮ್ ॥5॥

ವೇಣುರಂಧ್ರತರಲಾಂಗುಲೀದಲಂ ತಾಲಸಂಚಲಿತಪಾದಪಲ್ಲವಮ್ । ತತ್ ಸ್ಥಿತಂ ತವ ಪರೋಕ್ಷಮಪ್ಯಹೋ ಸಂವಿಚಿಂತ್ಯ ಮುಮುಹುರ್ವ್ರಜಾಂಗನಾಃ ॥6॥

ನಿರ್ವಿಶಂಕಭವದಂಗದರ್ಶಿನೀಃ ಖೇಚರೀಃ ಖಗಮೃಗಾನ್ ಪಶೂನಪಿ । ತ್ವತ್ಪದಪ್ರಣಯಿ ಕಾನನಂ ಚ ತಾಃ ಧನ್ಯಧನ್ಯಮಿತಿ ನನ್ವಮಾನಯನ್ ॥7॥

ಆಪಿಬೇಯಮಧರಾಮೃತಂ ಕದಾ ವೇಣುಭುಕ್ತರಸಶೇಷಮೇಕದಾ । ದೂರತೋ ಬತ ಕೃತಂ ದುರಾಶಯೇತ್ಯಾಕುಲಾ ಮುಹುರಿಮಾಃ ಸಮಾಮುಹನ್ ॥8॥

ಪ್ರತ್ಯಹಂ ಚ ಪುನರಿತ್ಥಮಂಗನಾಶ್ಚಿತ್ತಯೋನಿಜನಿತಾದನುಗ್ರಹಾತ್ । ಬದ್ಧರಾಗವಿವಶಾಸ್ತ್ವಯಿ ಪ್ರಭೋ ನಿತ್ಯಮಾಪುರಿಹ ಕೃತ್ಯಮೂಢತಾಮ್ ॥9॥