ನಾರಾಯಣೀಯಂ ದಶಕ 66 - ಗೋಪೀಜನಾಹ್ಲಾದನಂ

ಉಪಯಾತಾನಾಂ ಸುದೃಶಾಂ ಕುಸುಮಾಯುಧಬಾಣಪಾತವಿವಶಾನಾಮ್ । ಅಭಿವಾಂಛಿತಂ ವಿಧಾತುಂ ಕೃತಮತಿರಪಿ ತಾ ಜಗಾಥ ವಾಮಮಿವ ॥1॥

ಗಗನಗತಂ ಮುನಿನಿವಹಂ ಶ್ರಾವಯಿತುಂ ಜಗಿಥ ಕುಲವಧೂಧರ್ಮಮ್ । ಧರ್ಮ್ಯಂ ಖಲು ತೇ ವಚನಂ ಕರ್ಮ ತು ನೋ ನಿರ್ಮಲಸ್ಯ ವಿಶ್ವಾಸ್ಯಮ್ ॥2॥

ಆಕರ್ಣ್ಯ ತೇ ಪ್ರತೀಪಾಂ ವಾಣೀಮೇಣೀದೃಶಃ ಪರಂ ದೀನಾಃ । ಮಾ ಮಾ ಕರುಣಾಸಿಂಧೋ ಪರಿತ್ಯಜೇತ್ಯತಿಚಿರಂ ವಿಲೇಪುಸ್ತಾಃ ॥3॥

ತಾಸಾಂ ರುದಿತೈರ್ಲಪಿತೈಃ ಕರುಣಾಕುಲಮಾನಸೋ ಮುರಾರೇ ತ್ವಮ್ । ತಾಭಿಸ್ಸಮಂ ಪ್ರವೃತ್ತೋ ಯಮುನಾಪುಲಿನೇಷು ಕಾಮಮಭಿರಂತುಮ್ ॥4॥

ಚಂದ್ರಕರಸ್ಯಂದಲಸತ್ಸುಂದರಯಮುನಾತಟಾಂತವೀಥೀಷು । ಗೋಪೀಜನೋತ್ತರೀಯೈರಾಪಾದಿತಸಂಸ್ತರೋ ನ್ಯಷೀದಸ್ತ್ವಮ್ ॥5॥

ಸುಮಧುರನರ್ಮಾಲಪನೈಃ ಕರಸಂಗ್ರಹಣೈಶ್ಚ ಚುಂಬನೋಲ್ಲಾಸೈಃ । ಗಾಢಾಲಿಂಗನಸಂಗೈಸ್ತ್ವಮಂಗನಾಲೋಕಮಾಕುಲೀಚಕೃಷೇ ॥6॥

ವಾಸೋಹರಣದಿನೇ ಯದ್ವಾಸೋಹರಣಂ ಪ್ರತಿಶ್ರುತಂ ತಾಸಾಮ್ । ತದಪಿ ವಿಭೋ ರಸವಿವಶಸ್ವಾಂತಾನಾಂ ಕಾಂತ ಸುಭ್ರುವಾಮದಧಾಃ ॥7॥

ಕಂದಲಿತಘರ್ಮಲೇಶಂ ಕುಂದಮೃದುಸ್ಮೇರವಕ್ತ್ರಪಾಥೋಜಮ್ । ನಂದಸುತ ತ್ವಾಂ ತ್ರಿಜಗತ್ಸುಂದರಮುಪಗೂಹ್ಯ ನಂದಿತಾ ಬಾಲಾಃ ॥8॥

ವಿರಹೇಷ್ವಂಗಾರಮಯಃ ಶೃಂಗಾರಮಯಶ್ಚ ಸಂಗಮೇ ಹಿ ತ್ವಂ ನಿತರಾಮಂಗಾರಮಯಸ್ತತ್ರ ಪುನಸ್ಸಂಗಮೇಽಪಿ ಚಿತ್ರಮಿದಮ್ ॥9॥