ನಾರಾಯಣೀಯಂ ದಶಕ 96 - ಭಗವದ್ವಿಭೂತಯಃ ತಥಾ ಜ್ಞಾನಕರ್ಮಭಕ್ತಿಯೋಗಾಃ

ಧರ್ಮಂ ವರ್ಣಾಶ್ರಮಾಣಾಂ ಶ್ರುತಿಪಥವಿಹಿತಂ ತ್ವತ್ಪರತ್ವೇನ ಭಕ್ತ್ಯಾ ಕುರ್ವಂತೋಽಂತರ್ವಿರಾಗೇ ವಿಕಸತಿ ಶನಕೈಃ ಸಂತ್ಯಜಂತೋ ಲಭಂತೇ । ಸತ್ತಾಸ್ಫೂರ್ತಿಪ್ರಿಯತ್ವಾತ್ಮಕಮಖಿಲಪದಾರ್ಥೇಷು ಭಿನ್ನೇಷ್ವಭಿನ್ನಂ ನಿರ್ಮೂಲಂ ವಿಶ್ವಮೂಲಂ ಪರಮಮಹಮಿತಿ ತ್ವದ್ವಿಬೋಧಂ ವಿಶುದ್ಧಮ್ ॥3॥

ಜ್ಞಾನಂ ಕರ್ಮಾಪಿ ಭಕ್ತಿಸ್ತ್ರಿತಯಮಿಹ ಭವತ್ಪ್ರಾಪಕಂ ತತ್ರ ತಾವ- ನ್ನಿರ್ವಿಣ್ಣಾನಾಮಶೇಷೇ ವಿಷಯ ಇಹ ಭವೇತ್ ಜ್ಞಾನಯೋಗೇಽಧಿಕಾರಃ । ಸಕ್ತಾನಾಂ ಕರ್ಮಯೋಗಸ್ತ್ವಯಿ ಹಿ ವಿನಿಹಿತೋ ಯೇ ತು ನಾತ್ಯಂತಸಕ್ತಾಃ ನಾಪ್ಯತ್ಯಂತಂ ವಿರಕ್ತಾಸ್ತ್ವಯಿ ಚ ಧೃತರಸಾ ಭಕ್ತಿಯೋಗೋ ಹ್ಯಮೀಷಾಮ್ ॥4॥

ಜ್ಞಾನಂ ತ್ವದ್ಭಕ್ತತಾಂ ವಾ ಲಘು ಸುಕೃತವಶಾನ್ಮರ್ತ್ಯಲೋಕೇ ಲಭಂತೇ ತಸ್ಮಾತ್ತತ್ರೈವ ಜನ್ಮ ಸ್ಪೃಹಯತಿ ಭಗವನ್ ನಾಕಗೋ ನಾರಕೋ ವಾ । ಆವಿಷ್ಟಂ ಮಾಂ ತು ದೈವಾದ್ಭವಜಲನಿಧಿಪೋತಾಯಿತೇ ಮರ್ತ್ಯದೇಹೇ ತ್ವಂ ಕೃತ್ವಾ ಕರ್ಣಧಾರಂ ಗುರುಮನುಗುಣವಾತಾಯಿತಸ್ತಾರಯೇಥಾಃ ॥5॥

ಅವ್ಯಕ್ತಂ ಮಾರ್ಗಯಂತಃ ಶ್ರುತಿಭಿರಪಿ ನಯೈಃ ಕೇವಲಜ್ಞಾನಲುಬ್ಧಾಃ ಕ್ಲಿಶ್ಯಂತೇಽತೀವ ಸಿದ್ಧಿಂ ಬಹುತರಜನುಷಾಮಂತ ಏವಾಪ್ನುವಂತಿ । ದೂರಸ್ಥಃ ಕರ್ಮಯೋಗೋಽಪಿ ಚ ಪರಮಫಲೇ ನನ್ವಯಂ ಭಕ್ತಿಯೋಗ- ಸ್ತ್ವಾಮೂಲಾದೇವ ಹೃದ್ಯಸ್ತ್ವರಿತಮಯಿ ಭವತ್ಪ್ರಾಪಕೋ ವರ್ಧತಾಂ ಮೇ ॥6॥

ಜ್ಞಾನಾಯೈವಾತಿಯತ್ನಂ ಮುನಿರಪವದತೇ ಬ್ರಹ್ಮತತ್ತ್ವಂ ತು ಶೃಣ್ವನ್ ಗಾಢಂ ತ್ವತ್ಪಾದಭಕ್ತಿಂ ಶರಣಮಯತಿ ಯಸ್ತಸ್ಯ ಮುಕ್ತಿಃ ಕರಾಗ್ರೇ । ತ್ವದ್ಧ್ಯಾನೇಽಪೀಹ ತುಲ್ಯಾ ಪುನರಸುಕರತಾ ಚಿತ್ತಚಾಂಚಲ್ಯಹೇತೋ- ರಭ್ಯಾಸಾದಾಶು ಶಕ್ಯಂ ತದಪಿ ವಶಯಿತುಂ ತ್ವತ್ಕೃಪಾಚಾರುತಾಭ್ಯಾಮ್ ॥7॥

ನಿರ್ವಿಣ್ಣಃ ಕರ್ಮಮಾರ್ಗೇ ಖಲು ವಿಷಮತಮೇ ತ್ವತ್ಕಥಾದೌ ಚ ಗಾಢಂ ಜಾತಶ್ರದ್ಧೋಽಪಿ ಕಾಮಾನಯಿ ಭುವನಪತೇ ನೈವ ಶಕ್ನೋಮಿ ಹಾತುಮ್ । ತದ್ಭೂಯೋ ನಿಶ್ಚಯೇನ ತ್ವಯಿ ನಿಹಿತಮನಾ ದೋಷಬುದ್ಧ್ಯಾ ಭಜಂಸ್ತಾನ್ ಪುಷ್ಣೀಯಾಂ ಭಕ್ತಿಮೇವ ತ್ವಯಿ ಹೃದಯಗತೇ ಮಂಕ್ಷು ನಂಕ್ಷ್ಯಂತಿ ಸಂಗಾಃ ॥8॥

ಕಶ್ಚಿತ್ ಕ್ಲೇಶಾರ್ಜಿತಾರ್ಥಕ್ಷಯವಿಮಲಮತಿರ್ನುದ್ಯಮಾನೋ ಜನೌಘೈಃ ಪ್ರಾಗೇವಂ ಪ್ರಾಹ ವಿಪ್ರೋ ನ ಖಲು ಮಮ ಜನಃ ಕಾಲಕರ್ಮಗ್ರಹಾ ವಾ। ಚೇತೋ ಮೇ ದುಃಖಹೇತುಸ್ತದಿಹ ಗುಣಗಣಂ ಭಾವಯತ್ಸರ್ವಕಾರೀ- ತ್ಯುಕ್ತ್ವಾ ಶಾಂತೋ ಗತಸ್ತ್ವಾಂ ಮಮ ಚ ಕುರು ವಿಭೋ ತಾದೃಶೀ ಚಿತ್ತಶಾಂತಿಮ್ ॥9॥

ಐಲಃ ಪ್ರಾಗುರ್ವಶೀಂ ಪ್ರತ್ಯತಿವಿವಶಮನಾಃ ಸೇವಮಾನಶ್ಚಿರಂ ತಾಂ ಗಾಢಂ ನಿರ್ವಿದ್ಯ ಭೂಯೋ ಯುವತಿಸುಖಮಿದಂ ಕ್ಷುದ್ರಮೇವೇತಿ ಗಾಯನ್ । ತ್ವದ್ಭಕ್ತಿಂ ಪ್ರಾಪ್ಯ ಪೂರ್ಣಃ ಸುಖತರಮಚರತ್ತದ್ವದುದ್ಧೂತಸಂಗಂ ಭಕ್ತೋತ್ತಂಸಂ ಕ್ರಿಯಾ ಮಾಂ ಪವನಪುರಪತೇ ಹಂತ ಮೇ ರುಂಧಿ ರೋಗಾನ್ ॥10॥

Browse Related Categories: