Ganesha · Traditional devotional text · Source: vignanam.org (Traditional devotional text (public-domain shlokas))
സർവേ ഉചുഃ । യതോഽനംതശക്തേരനംതാശ്ച ജീവാ യതോ നിര്ഗുണാദപ്രമേയാ ഗുണാസ്തേ । യതോ ഭാതി സർവം ത്രിധാ ഭേദഭിന്നം സദാ തം ഗണേശം നമാമോ ഭജാമഃ ॥ 1 ॥
യതശ്ചാവിരാസീജ്ജഗത്സർവമേത- -ത്തഥാബ്ജാസനോ വിശ്വഗോ വിശ്വഗോപ്താ । തഥേംദ്രാദയോ ദേവസംഘാ മനുഷ്യാഃ സദാ തം ഗണേശം നമാമോ ഭജാമഃ ॥ 2 ॥
യതോ വഹ്നിഭാനൂ ഭവോ ഭൂര്ജലം ച യതഃ സാഗരാശ്ചംദ്രമാ വ്യോമ വായുഃ । യതഃ സ്ഥാവരാ ജംഗമാ വൃക്ഷസംഘാഃ സദാ തം ഗണേശം നമാമോ ഭജാമഃ ॥ 3 ॥
യതോ ദാനവാഃ കിന്നരാ യക്ഷസംഘാ യതശ്ചാരണാ വാരണാഃ ശ്വാപദാശ്ച । യതഃ പക്ഷികീടാ യതോ വീരുധശ്ച സദാ തം ഗണേശം നമാമോ ഭജാമഃ ॥ 4 ॥
യതോ ബുദ്ധിരജ്ഞാനനാശോ മുമുക്ഷോ- -ര്യതഃ സംപദോ ഭക്തസംതോഷദാഃ സ്യുഃ । യതോ വിഘ്നനാശോ യതഃ കാര്യസിദ്ധിഃ സദാ തം ഗണേശം നമാമോ ഭജാമഃ ॥ 5 ॥
യതഃ പുത്രസംപദ്യതോ വാംഛിതാര്ഥോ യതോഽഭക്തവിഘ്നാസ്തഥാഽനേകരൂപാഃ । യതഃ ശോകമോഹൌ യതഃ കാമ ഏവ സദാ തം ഗണേശം നമാമോ ഭജാമഃ ॥ 6 ॥
യതോഽനംതശക്തിഃ സ ശേഷോ ബഭൂവ ധരാധാരണേഽനേകരൂപേ ച ശക്തഃ । യതോഽനേകധാ സ്വര്ഗലോകാ ഹി നാനാ സദാ തം ഗണേശം നമാമോ ഭജാമഃ ॥ 7 ॥
യതോ വേദവാചോ വികുംഠാ മനോഭിഃ സദാ നേതി നേതീതി യത്താ ഗൃണംതി । പരബ്രഹ്മരൂപം ചിദാനംദഭൂതം സദാ തം ഗണേശം നമാമോ ഭജാമഃ ॥ 8 ॥
Offered for worship and study, not as prediction. Non-commercial.
More devotional texts
ശ്രീഗണേശ ഉവാച
പുനരൂചേ ഗണാധീശഃ സ്തോത്രമേതത്പഠേന്നരഃ । ത്രിസംധ്യം ത്രിദിനം തസ്യ സർവകാര്യം ഭവിഷ്യതി ॥ 9
യോ ജപേദഷ്ടദിവസം ശ്ലോകാഷ്ടകമിദം ശുഭമ് । അഷ്ടവാരം ചതുര്ഥ്യാം തു സോഽഷ്ടസിദ്ധീരവാപ്നുയാത് ॥ 10 ॥
യഃ പഠേന്മാസമാത്രം തു ദശവാരം ദിനേ ദിനേ । സ മോചയേദ്ബംധഗതം രാജവധ്യം ന സംശയഃ ॥ 11 ॥
വിദ്യാകാമോ ലഭേദ്വിദ്യാം പുത്രാര്ഥീ പുത്രമാപ്നുയാത് । വാംഛിതാഁല്ലഭതേ സർവാനേകവിംശതിവാരതഃ ॥ 12 ॥
യോ ജപേത്പരയാ ഭക്ത്യാ ഗജാനനപരോ നരഃ । ഏവമുക്ത്വാ തതോ ദേവശ്ചാംതര്ധാനം ഗതഃ പ്രഭുഃ ॥ 13 ॥
ഇതി ശ്രീഗണേശപുരാണേ ഉപാസനാഖംഡേ ശ്രീഗണേശാഷ്ടകമ് ।
Browse Related Categories: