Adi Shankaracharya · Traditional devotional text · Source: vignanam.org (Traditional devotional text (public-domain shlokas))
నిరుపమనిత్యనిరంశకేఽప్యఖండే – మయి చితి సర్వవికల్పనాదిశూన్యే । ఘటయతి జగదీశజీవభేదం – త్వఘటితఘటనాపటీయసీ మాయా ॥ 1 ॥
శ్రుతిశతనిగమాంతశోధకాన- ప్యహహ ధనాదినిదర్శనేన సద్యః । కలుషయతి చతుష్పదాద్యభిన్నా- నఘటితఘటనాపటీయసీ మాయా ॥ 2 ॥
సుఖచిదఖండవిబోధమద్వితీయం – వియదనలాదివినిర్మితే నియోజ్య । భ్రమయతి భవసాగరే నితాంతం – త్వఘటితఘటనాపటీయసీ మాయా ॥ 3 ॥
అపగతగుణవర్ణజాతిభేదే – సుఖచితి విప్రవిడాద్యహంకృతిం చ । స్ఫుటయతి సుతదారగేహమోహం – త్వఘటితఘటనాపటీయసీ మాయా ॥ 4 ॥
విధిహరిహరవిభేదమప్యఖండే – బత విరచయ్య బుధానపి ప్రకామమ్ । భ్రమయతి హరిహరభేదభావా- నఘటితఘటనాపటీయసీ మాయా ॥ 5 ॥
Browse Related Categories:
Offered for worship and study, not as prediction. Non-commercial.