నారాయణీయం దశక 45 - శ్రీకృష్ణస్య బాలలీలాః

అయి సబల మురారే పాణిజానుప్రచారైః కిమపి భవనభాగాన్ భూషయంతౌ భవంతౌ । చలితచరణకంజౌ మంజుమంజీరశింజా- శ్రవణకుతుకభాజౌ చేరతుశ్చారువేగాత్ ॥1॥

మృదు మృదు విహసంతావున్మిషద్దంతవంతౌ వదనపతితకేశౌ దృశ్యపాదాబ్జదేశౌ । భుజగలితకరాంతవ్యాలగత్కంకణాంకౌ మతిమహరతముచ్చైః పశ్యతాం విశ్వనృణామ్ ॥2॥

అనుసరతి జనౌఘే కౌతుకవ్యాకులాక్షే కిమపి కృతనినాదం వ్యాహసంతౌ ద్రవంతౌ । వలితవదనపద్మం పృష్ఠతో దత్తదృష్టీ కిమివ న విదధాథే కౌతుకం వాసుదేవ ॥3॥

ద్రుతగతిషు పతంతావుత్థితౌ లిప్తపంకౌ దివి మునిభిరపంకైః సస్మితం వంద్యమానౌ । ద్రుతమథ జననీభ్యాం సానుకంపం గృహీతౌ ముహురపి పరిరబ్ధౌ ద్రాగ్యువాం చుంబితౌ చ ॥4॥

స్నుతకుచభరమంకే ధారయంతీ భవంతం తరలమతి యశోదా స్తన్యదా ధన్యధన్యా । కపటపశుప మధ్యే ముగ్ధహాసాంకురం తే దశనముకులహృద్యం వీక్ష్య వక్త్రం జహర్ష ॥5॥

తదనుచరణచారీ దారకైస్సాకమారా- న్నిలయతతిషు ఖేలన్ బాలచాపల్యశాలీ । భవనశుకవిడాలాన్ వత్సకాంశ్చానుధావన్ కథమపి కృతహాసైర్గోపకైర్వారితోఽభూః ॥6॥

హలధరసహితస్త్వం యత్ర యత్రోపయాతో వివశపతితనేత్రాస్తత్ర తత్రైవ గోప్యః । విగలితగృహకృత్యా విస్మృతాపత్యభృత్యా మురహర ముహురత్యంతాకులా నిత్యమాసన్ ॥7॥

ప్రతినవనవనీతం గోపికాదత్తమిచ్ఛన్ కలపదముపగాయన్ కోమలం క్వాపి నృత్యన్ । సదయయువతిలోకైరర్పితం సర్పిరశ్నన్ క్వచన నవవిపక్వం దుగ్ధమప్యాపిబస్త్వమ్ ॥8॥