Vishnu · Traditional devotional text · Source: vignanam.org (Traditional devotional text (public-domain shlokas))
ముదా సురౌఘైస్త్వముదారసమ్మదై- రుదీర్య దామోదర ఇత్యభిష్టుతః । మృదుదరః స్వైరములూఖలే లగ- న్నదూరతో ద్వౌ కకుభావుదైక్షథాః ॥1॥
కుబేరసూనుర్నలకూబరాభిధః పరో మణిగ్రీవ ఇతి ప్రథాం గతః । మహేశసేవాధిగతశ్రియోన్మదౌ చిరం కిల త్వద్విముఖావఖేలతామ్ ॥2॥
Offered for worship and study, not as prediction. Non-commercial.
More devotional texts
సురాపగాయాం కిల తౌ మదోత్కటౌ సురాపగాయద్బహుయౌవతావృతౌ । వివాససౌ కేలిపరౌ స నారదో భవత్పదైకప్రవణో నిరైక్షత ॥3॥
భియా ప్రియాలోకముపాత్తవాససం పురో నిరీక్ష్యాపి మదాంధచేతసౌ । ఇమౌ భవద్భక్త్యుపశాంతిసిద్ధయే మునిర్జగౌ శాంతిమృతే కుతః సుఖమ్ ॥4॥
యువామవాప్తౌ కకుభాత్మతాం చిరం హరిం నిరీక్ష్యాథ పదం స్వమాప్నుతమ్ । ఇతీరేతౌ తౌ భవదీక్షణస్పృహాం గతౌ వ్రజాంతే కకుభౌ బభూవతుః ॥5॥
అతంద్రమింద్రద్రుయుగం తథావిధం సమేయుషా మంథరగామినా త్వయా । తిరాయితోలూఖలరోధనిర్ధుతౌ చిరాయ జీర్ణౌ పరిపాతితౌ తరూ ॥6॥
అభాజి శాఖిద్వితయం యదా త్వయా తదైవ తద్గర్భతలాన్నిరేయుషా । మహాత్విషా యక్షయుగేన తత్క్షణా- దభాజి గోవింద భవానపి స్తవైః ॥7॥
ఇహాన్యభక్తోఽపి సమేష్యతి క్రమాత్ భవంతమేతౌ ఖలు రుద్రసేవకౌ । మునిప్రసాదాద్భవ్దంఘ్రిమాగతౌ గతౌ వృణానౌ ఖలు భక్తిముత్తమామ్ ॥8॥
తతస్తరూద్దారణదారుణారవ- ప్రకంపిసంపాతిని గోపమండలే । విలజ్జితత్వజ్జననీముఖేక్షిణా వ్యమోక్షి నందేన భవాన్ విమోక్షదః ॥9॥
మహీరుహోర్మధ్యగతో బతార్భకో హరేః ప్రభావాదపరిక్షతోఽధునా । ఇతి బ్రువాణైర్గమితో గృహం భవాన్ మరుత్పురాధీశ్వర పాహి మాం గదాత్ ॥10॥
Browse Related Categories: