Vishnu · Traditional devotional text · Source: vignanam.org (Traditional devotional text (public-domain shlokas))
నిశమయ్య తవాథ యానవార్తాం భృశమార్తాః పశుపాలబాలికాస్తాః । కిమిదం కిమిదం కథం న్వితీమాః సమవేతాః పరిదేవితాన్యకుర్వన్ ॥1॥
కరుణానిధిరేష నందసూనుః కథమస్మాన్ విసృజేదనన్యనాథాః । బత నః కిము దైవమేవమాసీదితి తాస్త్వద్గతమానసా విలేపుః ॥2॥
Offered for worship and study, not as prediction. Non-commercial.
More devotional texts
చరమప్రహరే ప్రతిష్ఠమానః సహ పిత్రా నిజమిత్రమండలైశ్చ । పరితాపభరం నితంబినీనాం శమయిష్యన్ వ్యముచః సఖాయమేకమ్ ॥3॥
అచిరాదుపయామి సన్నిధిం వో భవితా సాధు మయైవ సంగమశ్రీః । అమృతాంబునిధౌ నిమజ్జయిష్యే ద్రుతమిత్యాశ్వసితా వధూరకార్షీః ॥4॥
సవిషాదభరం సయాచ్ఞముచ్చైః అతిదూరం వనితాభిరీక్ష్యమాణః । మృదు తద్దిశి పాతయన్నపాంగాన్ సబలోఽక్రూరరథేన నిర్గతోఽభూః ॥5॥
అనసా బహులేన వల్లవానాం మనసా చానుగతోఽథ వల్లభానామ్ । వనమార్తమృగం విషణ్ణవృక్షం సమతీతో యమునాతటీమయాసీః ॥6॥
నియమాయ నిమజ్య వారిణి త్వామభివీక్ష్యాథ రథేఽపి గాందినేయః । వివశోఽజని కిం న్విదం విభోస్తే నను చిత్రం త్వవలోకనం సమంతాత్ ॥7॥
పునరేష నిమజ్య పుణ్యశాలీ పురుషం త్వాం పరమం భుజంగభోగే । అరికంబుగదాంబుజైః స్ఫురంతం సురసిద్ధౌఘపరీతమాలులోకే ॥8॥
స తదా పరమాత్మసౌఖ్యసింధౌ వినిమగ్నః ప్రణువన్ ప్రకారభేదైః । అవిలోక్య పునశ్చ హర్షసింధోరనువృత్త్యా పులకావృతో యయౌ త్వామ్ ॥9॥
కిము శీతలిమా మహాన్ జలే యత్ పులకోఽసావితి చోదితేన తేన । అతిహర్షనిరుత్తరేణ సార్ధం రథవాసీ పవనేశ పాహి మాం త్వమ్ ॥10॥
Browse Related Categories: