Vishnu · Traditional devotional text · Source: vignanam.org (Traditional devotional text (public-domain shlokas))
యస్మిన్నేతద్విభాతం యత ఇదమభవద్యేన చేదం య ఏత- ద్యోఽస్మాదుత్తీర్ణరూపః ఖలు సకలమిదం భాసితం యస్య భాసా । యో వాచాం దూరదూరే పునరపి మనసాం యస్య దేవా మునీంద్రాః నో విద్యుస్తత్త్వరూపం కిము పునరపరే కృష్ణ తస్మై నమస్తే ॥1॥
జన్మాథో కర్మ నామ స్ఫుటమిహ గుణదోషాదికం వా న యస్మిన్ లోకానామూతయే యః స్వయమనుభజతే తాని మాయానుసారీ । విభ్రచ్ఛక్తీరరూపోఽపి చ బహుతరరూపోఽవభాత్యద్భుతాత్మా తస్మై కైవల్యధామ్నే పరరసపరిపూర్ణాయ విష్ణో నమస్తే ॥2॥
నో తిర్యంచన్న మర్త్యం న చ సురమసురం న స్త్రియం నో పుంమాంసం న ద్రవ్యం కర్మ జాతిం గుణమపి సదసద్వాపి తే రూపమాహుః । శిష్టం యత్ స్యాన్నిషేధే సతి నిగమశతైర్లక్షణావృత్తితస్తత్ కృచ్ఛ్రేణావేద్యమానం పరమసుఖమయం భాతి తస్మై నమస్తే ॥3॥
మాయాయాం బింబితస్త్వం సృజసి మహదహంకారతన్మాత్రభేదై- ర్భూతగ్రామేంద్రియాద్యైరపి సకలజగత్స్వప్నసంకల్పకల్పమ్ । భూయః సంహృత్య సర్వం కమఠ ఇవ పదాన్యాత్మనా కాలశక్త్యా గంభీరే జాయమానే తమసి వితిమిరో భాసి తస్మై నమస్తే ॥4॥
శబ్దబ్రహ్మేతి కర్మేత్యణురితి భగవన్ కాల ఇత్యాలపంతి త్వామేకం విశ్వహేతుం సకలమయతయా సర్వథా కల్ప్యమానమ్ । వేదాంతైర్యత్తు గీతం పురుషపరచిదాత్మాభిధం తత్తు తత్త్వం ప్రేక్షామాత్రేణ మూలప్రకృతివికృతికృత్ కృష్ణ తస్మై నమస్తే ॥5॥
సత్త్వేనాసత్తయా వా న చ ఖలు సదసత్త్వేన నిర్వాచ్యరూపా ధత్తే యాసావవిద్యా గుణఫణిమతివద్విశ్వదృశ్యావభాసమ్ । విద్యాత్వం సైవ యాతా శ్రుతివచనలవైర్యత్కృపాస్యందలాభే సంసారారణ్యసద్యస్త్రుటనపరశుతామేతి తస్మై నమస్తే ॥6॥
భూషాసు స్వర్ణవద్వా జగతి ఘటశరావాదికే మృత్తికావ- త్తత్త్వే సంచింత్యమానే స్ఫురతి తదధునాప్యద్వితీయం వపుస్తే । స్వప్నద్రష్టుః ప్రబోధే తిమిరలయవిధౌ జీర్ణరజ్జోశ్చ యద్వ- ద్విద్యాలాభే తథైవ స్ఫుటమపి వికసేత్ కృష్ణ తస్మై నమస్తే ॥7॥
Offered for worship and study, not as prediction. Non-commercial.
More devotional texts
యద్భీత్యోదేతి సూర్యో దహతి చ దహనో వాతి వాయుస్తథాన్యే యద్భీతాః పద్మజాద్యాః పునరుచితబలీనాహరంతేఽనుకాలమ్ । యేనైవారోపితాః ప్రాఙ్నిజపదమపి తే చ్యావితారశ్చ పశ్చాత్ తస్మై విశ్వం నియంత్రే వయమపి భవతే కృష్ణ కుర్మః ప్రణామమ్ ॥8॥
త్రైలోక్యం భావయంతం త్రిగుణమయమిదం త్ర్యక్షరస్యైకవాచ్యం త్రీశానామైక్యరూపం త్రిభిరపి నిగమైర్గీయమానస్వరూపమ్ । తిస్రోవస్థా విదంతం త్రియుగజనిజుషం త్రిక్రమాక్రాంతవిశ్వం త్రైకాల్యే భేదహీనం త్రిభిరహమనిశం యోగభేదైర్భజే త్వామ్ ॥9॥
సత్యం శుద్ధం విబుద్ధం జయతి తవ వపుర్నిత్యముక్తం నిరీహం నిర్ద్వంద్వం నిర్వికారం నిఖిలగుణగణవ్యంజనాధారభూతమ్ । నిర్మూలం నిర్మలం తన్నిరవధిమహిమోల్లాసి నిర్లీనమంత- ర్నిస్సంగానాం మునీనాం నిరుపమపరమానందసాంద్రప్రకాశమ్ ॥10॥
దుర్వారం ద్వాదశారం త్రిశతపరిమిలత్షష్టిపర్వాభివీతం సంభ్రామ్యత్ క్రూరవేగం క్షణమను జగదాచ్ఛిద్య సంధావమానమ్ । చక్రం తే కాలరూపం వ్యథయతు న తు మాం త్వత్పదైకావలంబం విష్ణో కారుణ్యసింధో పవనపురపతే పాహి సర్వామయౌఘాత్ ॥11॥
Browse Related Categories: