శ్రీ కృష్ణ కృపా కటాక్ష స్తోత్రం

శ్రీకృష్ణ ప్రార్థనా మూకం కరోతి వాచాలం పంగు లంఘయతే గిరిం। యత్కృపా తమహం వందే పరమానంద మాధవం॥ నాహం వసామి వైకుంఠే యోగినాం హృదయే న చ। మద్భక్తా యత్ర గాయంతి తత్ర తిష్ఠామి నారద॥

అథ శ్రీ కృష్ణ కృపా కటాక్ష స్తోత్ర ॥

భజే వ్రజైకమండనం సమస్తపాపఖండనం స్వభక్తచిత్తరంజనం సదైవ నందనందనమ్ । సుపిచ్ఛగుచ్ఛమస్తకం సునాదవేణుహస్తకం అనంగరంగసాగరం నమామి కృష్ణనాగరమ్ ॥

మనోజగర్వమోచనం విశాలలోలలోచనం విధూతగోపశోచనం నమామి పద్మలోచనమ్ । కరారవిందభూధరం స్మితావలోకసుందరం మహేంద్రమానదారణం నమామి కృష్ణ వారణమ్ ॥

కదంబసూనకుండలం సుచారుగండమండలం వ్రజాంగనైకవల్లభం నమామి కృష్ణదుర్లభమ్ । యశోదయా సమోదయా సగోపయా సనందయా యుతం సుఖైకదాయకం నమామి గోపనాయకమ్ ॥

సదైవ పాదపంకజం మదీయ మానసే నిజం దధానముక్తమాలకం నమామి నందబాలకమ్ । సమస్తదోషశోషణం సమస్తలోకపోషణం సమస్తగోపమానసం నమామి నందలాలసమ్ ॥

భువో భరావతారకం భవాబ్ధికర్ణధారకం యశోమతీకిశోరకం నమామి చిత్తచోరకమ్ । దృగంతకాంతభంగినం సదా సదాలిసంగినం దినే-దినే నవం-నవం నమామి నందసంభవమ్ ॥

గుణాకరం సుఖాకరం కృపాకరం కృపాపరం సురద్విషన్నికందనం నమామి గోపనందనమ్ । నవీన గోపనాగరం నవీనకేలి-లంపటం నమామి మేఘసుందరం తడిత్ప్రభాలసత్పటమ్ ॥