యమ అష్టకం

సావిత్ర్యువాచ

తపసా ధర్మమారాధ్య పుష్కరే భాస్కరః పురా । ధర్మం సూర్యఃసుతం ప్రాప ధర్మరాజం నమామ్యహమ్ ॥ 1

సమతా సర్వభూతేషు యస్య సర్వస్య సాక్షిణః । అతో యన్నామ శమనమితి తం ప్రణమామ్యహమ్ ॥ 2 ॥

యేనాంతశ్చ కృతో విశ్వే సర్వేషాం జీవినాం పరమ్ । కామానురూపం కాలేన తం కృతాంతం నమామ్యహమ్ ॥ 3 ॥

బిభర్తి దండం దండాయ పాపినాం శుద్ధిహేతవే । నమామి తం దండధరం యః శాస్తా సర్వజీవినామ్ ॥ 4 ॥

విశ్వం చ కలయత్యేవ యః సర్వేషు చ సంతతమ్ । అతీవ దుర్నివార్యం చ తం కాలం ప్రణమామ్యహమ్ ॥ 5 ॥

తపస్వీ బ్రహ్మనిష్ఠో యః సంయమీ సంజితేంద్రియః । జీవానాం కర్మఫలదస్తం యమం ప్రణమామ్యహమ్ ॥ 6 ॥

స్వాత్మారామశ్చ సర్వజ్ఞో మిత్రం పుణ్యకృతాం భవేత్ । పాపినాం క్లేశదో యస్తం పుణ్యమిత్రం నమామ్యహమ్ ॥ 7 ॥

యజ్జన్మ బ్రహ్మణోంఽశేన జ్వలంతం బ్రహ్మతేజసా । యో ధ్యాయతి పరం బ్రహ్మ తమీశం ప్రణమామ్యహమ్ ॥ 8 ॥

ఇత్యుక్త్వా సా చ సావిత్రీ ప్రణనామ యమం మునే । యమస్తాం శక్తిభజనం కర్మపాకమువాచ హ ॥ 9 ॥