মণিকর্ণিকাষ্টকম্

tvattīrē maṇikarṇikē hariharau sāyujyamuktipradau vādantau kurutaḥ parasparamubhau jantōḥ prayāṇōtsavē । madrūpō manujō'yamastu hariṇā prōktaḥ śivastatkṣaṇā- ttanmadhyādbhṛgulāñChanō garuḍagaḥ pītāmbarō nirgataḥ ॥ 1 ॥

indrādyāstridaśāḥ patanti niyataṃ bhōgakṣayē yē puna- rjāyantē manujāstatōpi paśavaḥ kīṭāḥ pataṅgādayaḥ । yē mātarmaṇikarṇikē tava jalē majjanti niṣkalmaṣāḥ sāyujyē'pi kirīṭakaustubhadharā nārāyaṇāḥ syurnarāḥ ॥ 2 ॥

kāśī dhanyatamā vimuktanagarī sālaṅkṛtā gaṅgayā tatrēyaṃ maṇikarṇikā sukhakarī muktirhi tatkiṅkarī । svarlōkastulitaḥ sahaiva vibudhaiḥ kāśyā samaṃ brahmaṇā kāśī kṣōṇitalē sthitā gurutarā svargō laghutvaṃ gataḥ ॥ 3 ॥

gaṅgātīramanuttamaṃ hi sakalaṃ tatrāpi kāśyuttamā tasyāṃ sā maṇikarṇikōttamatamā yētrēśvarō muktidaḥ । dēvānāmapi durlabhaṃ sthalamidaṃ pāpaughanāśakṣamaṃ pūrvōpārjitapuṇyapuñjagamakaṃ puṇyairjanaiḥ prāpyatē ॥ 4 ॥

duḥkhāmbhōdhigatō hi jantunivahastēṣāṃ kathaṃ niṣkṛtiḥ jñātvā taddhi viriñchinā virachitā vārāṇasī śarmadā । lōkāḥsvargasukhāstatō'pi laghavō bhōgāntapātapradāḥ kāśī muktipurī sadā śivakarī dharmārthamōkṣapradā ॥ 5 ॥

ēkō vēṇudharō dharādharadharaḥ śrīvatsabhūṣādharaḥ yō'pyēkaḥ kila śaṅkarō viṣadharō gaṅgādharō mādhavaḥ । yē mātarmaṇikarṇikē tava jalē majjanti tē mānavāḥ rudrā vā harayō bhavanti bahavastēṣāṃ bahutvaṃ katham ॥ 6 ॥

tvattīrē maraṇaṃ tu maṅgaḻakaraṃ dēvairapi ślāghyatē śakrastaṃ manujaṃ sahasranayanairdraṣṭuṃ sadā tatparaḥ । āyāntaṃ savitā sahasrakiraṇaiḥ pratyudgatō'bhūtsadā puṇyō'sau vṛṣagō'thavā garuḍagaḥ kiṃ mandiraṃ yāsyati ॥ 7 ॥