মণিদ্বীপ বর্ণন - 2 (দেবী ভাগবতম্)

sandhyāmātā satī haṃsī mardikā vajrikā parā । dēvamātā bhagavatī dēvakī kamalāsanā ॥ 9 ॥

trimukhī saptamukhyanyā surāsuravimardinī । lambōṣṭī chōrdhvakēśī cha bahuśīrṣā vṛkōdarī ॥ 10 ॥

ratharēkhāhvayā paśchāchChaśirēkhā tathā parā । gaganavēgā pavanavēgā chaiva tataḥ param ॥ 11 ॥

agrē bhuvanapālā syāttatpaśchānmadanāturā । anaṅgānaṅgamathanā tathaivānaṅgamēkhalā ॥ 12 ॥

anaṅgakusumā paśchādviśvarūpā surādikā । kṣayaṅkarī bhavēchChakti rakṣōbhyā cha tataḥ param ॥ 13 ॥

satyavādinyatha prōktā bahurūpā śuchivratā । udārākhyā cha vāgīśī chatuṣṣaṣṭimitāḥ smṛtāḥ ॥ 14 ॥

jvalajjihvānanāḥ sarvāvamantyō vahnimulbaṇam । jalaṃ pibāmaḥ sakalaṃ saṃharāmōvibhāvasum ॥ 15 ॥

pavanaṃ stambhayāmōdya bhakṣayāmō'khilaṃ jagat । iti vāchaṃ saṅgiratē krōdha saṃraktalōchanāḥ ॥ 16 ॥

chāpabāṇadharāḥ sarvāyuddhāyaivōtsukāḥ sadā । daṃṣṭrā kaṭakaṭārāvairbadhirīkṛta diṅmukhāḥ ॥ 17 ॥

piṅgōrdhvakēśyaḥ samprōktāśchāpabāṇakarāḥ sadā । śatākṣauhiṇikā sēnāpyēkaikasyāḥ prakīrtitā ॥ 18 ॥

ēkaika śaktēḥ sāmarthyaṃ lakṣabrahmāṇḍanāśanē । śatākṣauhiṇikāsēnā tādṛśī nṛpa sattama ॥ 19 ॥

kiṃ na kuryājjagatyasminnaśakyaṃ vaktumēva tat । sarvāpi yuddhasāmagrī tasminsālē sthitā munē ॥ 20 ॥

rathānāṃ gaṇanā nāsti hayānāṃ kariṇāṃ tathā ॥ śastrāṇāṃ gaṇanā tadvadgaṇānāṃ gaṇanā tathā ॥ 21 ॥

padmarāgamayādagrē gōmēdamaṇinirmitaḥ । daśayōjanadairghyēṇa prākārō vartatē mahān ॥ 22 ॥

bhāsvajjapāprasūnābhō madhyabhūstasya tādṛśī । gōmēdakalpitānyēva tadvāsi sadanāni cha ॥ 23 ॥

pakṣiṇaḥ stambhavaryāścha vṛkṣāvāpyaḥ sarāṃsi cha । gōmēdakalpitā ēva kuṅkumāruṇavigrahāḥ ॥ 24 ॥

tanmadhyasthā mahādēvyō dvātriṃśachChaktayaḥ smṛtāḥ । nānā śastrapraharaṇā gōmēdamaṇibhūṣitāḥ ॥ 25 ॥

pratyēka lōka vāsinyaḥ parivārya samantataḥ । gōmēdasālē sannaddhā piśāchavadanā nṛpa ॥ 26 ॥

svarlōkavāsibhirnityaṃ pūjitāśchakrabāhavaḥ । krōdharaktēkṣaṇā bhindhi pacha chChindhi dahēti cha ॥ 27 ॥

vadanti satataṃ vāchaṃ yuddhōtsukahṛdantarāḥ । ēkaikasyā mahāśaktērdaśākṣauhiṇikā matā ॥ 28 ॥

sēnā tatrāpyēkaśaktirlakṣabrahmāṇḍanāśinī । tādṛśīnāṃ mahāsēnā varṇanīyā kathaṃ nṛpa ॥ 29 ॥

rathānāṃ naiva gaṇānā vāhanānāṃ tathaiva cha । sarvayuddhasamārambhastatra dēvyā virājatē ॥ 30 ॥

tāsāṃ nāmāni vakṣyāmi pāpanāśakarāṇi cha । vidyā hrī puṣṭa yaḥ prajñā sinīvālī kuhūstathā ॥ 31 ॥

rudrāvīryā prabhānandā pōṣiṇī ṛddhidā śubhā । kālarātrirmahārātrirbhadrakālī kapardinī ॥ 32 ॥

vikṛtirdaṇḍimuṇḍinyau sēndukhaṇḍā śikhaṇḍinī । niśumbhaśumbhamathinī mahiṣāsuramardinī ॥ 33 ॥

indrāṇī chaiva rudrāṇī śaṅkarārdhaśarīriṇī । nārī nārāyaṇī chaiva triśūlinyapi pālinī ॥ 34 ॥

ambikāhlādinī paśchādityēvaṃ śaktayaḥ smṛtāḥ । yadyētāḥ kupitā dēvyastadā brahmāṇḍanāśanam ॥ 35 ॥

parājayō na chaitāsāṃ kadāchitkvachidasti hi । gōmēdakamayādagrē sadvajramaṇinirmitaḥ ॥ 36 ॥

daśayōjana tuṅgō'sau gōpuradvārasaṃyutaḥ । kapāṭaśṛṅkhalābaddhō navavṛkṣa samujjvalaḥ ॥ 37 ॥

sālastanmadhyabhūmyādi sarvaṃ hīramayaṃ smṛtam । gṛhāṇivīthayō rathyā mahāmārgāṃ gaṇāni cha ॥ 38 ॥

vṛkṣālavāla taravaḥ sāraṅgā api tādṛśāḥ । dīrghikāśrēṇayōvāpyastaḍāgāḥ kūpa saṃyutāḥ ॥ 39 ॥

tatra śrībhuvanēśvaryā vasanti parichārikāḥ । ēkaikā lakṣadāsībhiḥ sēvitā madagarvitāḥ ॥ 40 ॥

tālavṛntadharāḥ kāśchichchaṣakāḍhya karāmbujāḥ । kāśchittāmbūlapātrāṇi dhārayantyō'tigarvitāḥ ॥ 41 ॥

kāśchittachChatradhāriṇyaśchāmarāṇāṃ vidhārikāḥ । nānā vastradharāḥ kāśchitkāśchitpuṣpa karāmbujāḥ ॥ 42 ॥

nānādarśakarāḥ kāśchitkāśchitkuṅkumalēpanam । dhārayantyaḥ kajjalaṃ cha sindūra chaṣakaṃ parāḥ ॥ 43 ॥

kāśchichchitraka nirmātryaḥ pāda saṃvāhanē ratāḥ । kāśchittu bhūṣākāriṇyō nānā bhūṣādharāḥ parāḥ ॥ 44 ॥

puṣpabhūṣaṇa nirmātryaḥ puṣpaśṛṅgārakārikāḥ । nānā vilāsachaturā bahvya ēvaṃ vidhāḥ parāḥ ॥ 45 ॥

nibaddha paridhānīyā yuvatyaḥ sakalā api । dēvī kṛpā lēśavaśāttuchChīkṛta jagattrayāḥ ॥ 46 ॥

ētā dūtyaḥ smṛtā dēvyaḥ śṛṅgāramadagarvitāḥ । tāsāṃ nāmāni vakṣyāmi śṛṇu mē nṛpasattama ॥ 47 ॥

anaṅgarūpā prathamāpyanaṅgamadanā parā । tṛtīyātu tataḥ prōktā sundarī madanāturā ॥ 48 ॥

tatō bhuvanavēgāsyāttathā bhuvanapālikā । syātsarvaśiśirānaṅgavēdanānaṅgamēkhalā ॥ 49 ॥

vidyuddāmasamānāṅgyaḥ kvaṇatkāñchīguṇānvitāḥ । raṇanmañjīracharaṇā bahirantaritastataḥ ॥ 50 ॥

dhāvamānāstu śōbhantē sarvā vidyullatōpamāḥ । kuśalāḥ sarvakāryēṣu vētrahastāḥ samantataḥ ॥ 51 ॥

aṣṭadikṣutathaitāsāṃ prākārādbahirēva cha । sadanāni virājantē nānā vāhanahētibhiḥ ॥ 52 ॥

vajrasālādagrabhāgē sālō vaidūryanirmitaḥ । daśayōjanatuṅgō'sau gōpuradvārabhūṣitaḥ ॥ 53 ॥

vaidūryabhūmiḥ sarvāpigṛhāṇi vividhāni cha । vīthyō rathyā mahāmārgāḥ sarvē vēdūryanirmitāḥ ॥ 54 ॥

vāpī kūpa taḍāgāścha sravantīnāṃ taṭāni cha । vālukā chaiva sarvā'pi vaidūryamaṇinirmitā ॥ 55 ॥

tatrāṣṭadikṣuparitō brāhmyādīnāṃ cha maṇḍalam । nijairgaṇaiḥ parivṛtaṃ bhrājatē nṛpasattama ॥ 56 ॥

pratibrahmāṇḍamātṛṇāṃ tāḥ samaṣṭaya īritāḥ । brāhmī māhēśvarī chaiva kaumārī vaiṣṇavī tathā ॥57 ॥

vārāhī cha tathēndrāṇī chāmuṇḍāḥ saptamātaraḥ । aṣṭamī tu mahālakṣmīrnāmnā prōktāstu mātaraḥ ॥ 58 ॥

brahmarudrādidēvānāṃ samākārā stutāḥ smṛtāḥ । jagatkaḻyāṇakāriṇyaḥ svasvasēnāsamāvṛtāḥ ॥ 59 ॥

tatsālasya chaturdvārṣu vāhanāni mahēśituḥ । sajjāni nṛpatē santi sālaṅkārāṇi nityaśaḥ ॥ 60 ॥

dantinaḥ kōṭiśō vāhāḥ kōṭiśaḥ śibikāstathā । haṃsāḥ siṃhāścha garuḍā mayūrā vṛṣabhāstathā ॥ 61 ॥

tairyuktāḥ syandanāstadvatkōṭiśō nṛpanandana । pārṣṇigrāhasamāyuktā dhvajairākāśachumbinaḥ ॥ 62 ॥

kōṭiśastu vimānāni nānā chihnānvitāni cha । nānā vāditrayuktāni mahādhvajayutāni cha ॥ 63 ॥

vaidūryamaṇi sālasyāpyagrē sālaḥ paraḥ smṛtaḥ । daśayōjana tuṅgō'sāvindranīlāśmanirmitaḥ ॥ 64 ॥

tanmadhya bhūstathā vīthyō mahāmārgā gṛhāṇi cha । vāpī kūpa taḍāgāścha sarvē tanmaṇinirmitāḥ ॥ 65 ॥

tatra padma tu samprōktaṃ bahuyōjana vistṛtam । ṣōḍaśāraṃ dīpyamānaṃ sudarśanamivāparam ॥ 66 ॥

tatra ṣōḍaśaśaktīnāṃ sthānāni vividhāni cha । sarvōpaskarayuktāni samṛddhāni vasanti hi ॥ 67 ॥

tāsāṃ nāmāni vakṣyāmi śṛṇu mē nṛpasattama । karāḻī vikarāḻī cha tathōmā cha sarasvatī ॥ 68 ॥

śrī durgōṣā tathā lakṣmīḥ śrutiśchaiva smṛtirdhṛtiḥ । śraddhā mēdhā matiḥ kāntirāryā ṣōḍaśaśaktayaḥ ॥ 69 ॥

nīlajīmūtasaṅkāśāḥ karavāla karāmbujāḥ । samāḥ khēṭakadhāriṇyō yuddhōpakrānta mānasāḥ ॥ 70 ॥

sēnānyaḥ sakalā ētāḥ śrīdēvyā jagadīśituḥ । pratibrahmāṇḍasaṃsthānāṃ śaktīnāṃ nāyikāḥ smṛtāḥ ॥ 71 ॥

brahmāṇḍakṣōbhakāriṇyō dēvī śaktyupabṛṃhitāḥ । nānā rathasamārūḍhā nānā śaktibhiranvitāḥ ॥ 72 ॥

ētatparākramaṃ vaktuṃ sahasrāsyō'pi na kṣamaḥ । indranīlamahāsālādagrē tu bahuvistṛtaḥ ॥ 73 ॥

muktāprākāra uditō daśayōjana dairghyavān । madhyabhūḥ pūrvavatprōktā tanmadhyē'ṣṭadaḻāmbujam ॥ 74 ॥

muktāmaṇigaṇākīrṇaṃ vistṛtaṃ tu sakēsaram । tatra dēvīsamākārā dēvyāyudhadharāḥ sadā ॥ 75 ॥

samprōktā aṣṭamantriṇyō jagadvārtāprabōdhikāḥ । dēvīsamānabhōgāstā iṅgitajñāstupaṇḍitāḥ ॥ 76 ॥

kuśalāḥ sarvakāryēṣu svāmikāryaparāyaṇāḥ । dēvyabhiprāya bōdhyastāśchaturā atisundarāḥ ॥ 77 ॥

nānā śaktisamāyuktāḥ pratibrahmāṇḍavartinām । prāṇināṃ tāḥ samāchāraṃ jñānaśaktyāvidanti cha ॥ 78 ॥

tāsāṃ nāmāni vakṣyāmi mattaḥ śṛṇu nṛpōttama । anaṅgakusumā prōktāpyanaṅgakusumāturā ॥ 79 ॥

anaṅgamadanā tadvadanaṅgamadanāturā । bhuvanapālā gaganavēgā chaiva tataḥ param ॥ 80 ॥

śaśirēkhā cha gaganarēkhā chaiva tataḥ param । pāśāṅkuśavarābhītidharā aruṇavigrahāḥ ॥ 81 ॥

viśvasambandhinīṃ vārtāṃ bōdhayanti pratikṣaṇam । muktāsālādagrabhāgē mahāmārakatō paraḥ ॥ 82 ॥

sālōttamaḥ samuddiṣṭō daśayōjana dairghyavān । nānā saubhāgyasaṃyuktō nānā bhōgasamanvitaḥ ॥ 83 ॥

madhyabhūstādṛśī prōktā sadanāni tathaiva cha । ṣaṭkōṇamatravistīrṇaṃ kōṇasthā dēvatāḥ śṛṇuḥ ॥ 84 ॥

pūrvakōṇē chaturvaktrō gāyatrī sahitō vidhiḥ । kuṇḍikākṣaguṇābhīti daṇḍāyudhadharaḥ paraḥ ॥ 85 ॥

tadāyudhadharā dēvī gāyatrī paradēvatā । vēdāḥ sarvē mūrtimantaḥ śāstrāṇi vividhāni cha ॥ 86 ॥

smṛtayaścha purāṇāni mūrtimanti vasanti hi । yē brahmavigrahāḥ santi gāyatrīvigrahāścha yē ॥ 87 ॥

vyāhṛtīnāṃ vigrahāścha tē nityaṃ tatra santi hi । rakṣaḥ kōṇē śaṅkhachakragadāmbuja karāmbujā ॥ 88 ॥

sāvitrī vartatē tatra mahāviṣṇuścha tādṛśaḥ । yē viṣṇuvigrahāḥ santi matsyakūrmādayōkhilāḥ ॥ 89 ॥

sāvitrī vigrahā yē cha tē sarvē tatra santi hi । vāyukōṇē paraśvakṣamālābhayavarānvitaḥ ॥ 90 ॥

mahārudrō vartatē'tra sarasvatyapi tādṛśī । yē yē tu rudrabhēdāḥ syurdakṣiṇāsyādayō nṛpa ॥ 91 ॥

gaurī bhēdāścha yē sarvē tē tatra nivasanti hi । chatuḥṣaṣṭyāgamā yē cha yē chānyēpyāgamāḥ smṛtāḥ ॥ 92 ॥

tē sarvē mūrtimantaścha tatra vai nivasanti hi । agnikōṇē ratnakumbhaṃ tathā maṇikaraṇḍakam ॥ 93 ॥

dadhānō nijahastābhyāṃ kubērō dhanadāyakaḥ । nānā vīthī samāyuktō mahālakṣmīsamanvitaḥ ॥ 94 ॥

dēvyā nidhipatistvāstē svaguṇaiḥ parivēṣṭitaḥ । vāruṇē tu mahākōṇē madanō ratisaṃyutaḥ ॥ 95 ॥

pāśāṅkuśadhanurbāṇadharō nityaṃ virājatē । śṛṅgāramūrtimantastu tatra sannihitāḥ sadā ॥ 96 ॥

īśānakōṇē vighnēśō nityaṃ puṣṭisamanvitaḥ । pāśāṅkuśadharō vīrō vighnahartā virājatē ॥ 97 ॥

vibhūtayō gaṇēśasya yāyāḥ santi nṛpōttama । tāḥ sarvā nivasantyatra mahaiśvaryasamanvitāḥ ॥ 98 ॥

pratibrahmāṇḍasaṃsthānāṃ brahmādīnāṃ samaṣṭayaḥ । ētē brahmādayaḥ prōktāḥ sēvantē jagadīśvarīm ॥ 99 ॥

mahāmārakatasyāgrē śatayōjana dairghyavān । pravālaśālōstyaparaḥ kuṅkumāruṇavigrahaḥ ॥ 100 ॥

madhyabhūstādṛśī prōktā sadanāni cha pūrvavat । tanmadhyē pañchabhūtānāṃ svāminyaḥ pañcha santi cha ॥ 101 ॥

hṛllēkhā gaganā raktā chaturthī tu karāḻikā । mahōchChuṣmā pañchamī cha pañchabhūtasamaprabhāḥ ॥ 102 ॥

pāśāṅkuśavarābhītidhāriṇyōmitabhūṣaṇāḥ । dēvī samānavēṣāḍhyā navayauvanagarvitāḥ ॥ 103 ॥

pravālaśālādagrē tu navaratna vinirmitaḥ । bahuyōjanavistīrṇō mahāśālō'sti bhūmipa ॥ 104 ॥

tatra chāmnāyadēvīnāṃ sadanāni bahūnyapi । navaratnamayānyēva taḍāgāścha sarāṃsi cha ॥ 105 ॥

śrīdēvyā yē'vatārāḥ syustē tatra nivasanti hi । mahāvidyā mahābhēdāḥ santi tatraiva bhūmipa ॥ 106 ॥

nijāvaraṇadēvībhirnijabhūṣaṇavāhanaiḥ । sarvadēvyō virājantē kōṭisūryasamaprabhāḥ ॥ 107 ॥

saptakōṭi mahāmantradēvatāḥ santi tatra hi । navaratnamayādagrē chintāmaṇigṛhaṃ mahat ॥ 108 ॥

tatra tyaṃ vastu mātraṃ tu chintāmaṇi vinirmitam । sūryōdgārōpalaistadvachchandrōdgārōpalaistathā ॥ 109 ॥

vidyutprabhōpalaiḥ stambhāḥ kalpitāstu sahasraśaḥ । yēṣāṃ prabhābhirantasthaṃ vastu kiñchinna dṛśyatē ॥ 110 ॥

iti śrīdēvībhāgavatē mahāpurāṇē dvādaśaskandhē ēkādaśō'dhyāyaḥ ।

Browse Related Categories: