Devi · Traditional devotional text · Source: vignanam.org (Traditional devotional text (public-domain shlokas))
kallōlōllasitāmṛtābdhilaharīmadhyē virājanmaṇi- -dvīpē kalpakavāṭikāparivṛtē kādambavāṭyujjvalē । ratnastambhasahasranirmitasabhāmadhyē vimānōttamē chintāratnavinirmitaṃ janani tē siṃhāsanaṃ bhāvayē ॥ 1 ॥
ēṇāṅkānalabhānumaṇḍalalasachChrīchakramadhyē sthitāṃ bālārkadyutibhāsurāṃ karatalaiḥ pāśāṅkuśau bibhratīm । chāpaṃ bāṇamapi prasannavadanāṃ kausumbhavastrānvitāṃ tāṃ tvāṃ chandrakaḻāvataṃsamakuṭāṃ chārusmitāṃ bhāvayē ॥ 2 ॥
īśānādipadaṃ śivaikaphaladaṃ ratnāsanaṃ tē śubhaṃ pādyaṃ kuṅkumachandanādibharitairarghyaṃ saratnākṣataiḥ । śuddhairāchamanīyakaṃ tava jalairbhaktyā mayā kalpitaṃ kāruṇyāmṛtavāridhē tadakhilaṃ santuṣṭayē kalpatām ॥ 3 ॥
lakṣyē yōgijanasya rakṣitajagajjālē viśālēkṣaṇē prālēyāmbupaṭīrakuṅkumalasatkarpūramiśrōdakaiḥ । gōkṣīrairapi nārikēlasalilaiḥ śuddhōdakairmantritaiḥ snānaṃ dēvi dhiyā mayaitadakhilaṃ santuṣṭayē kalpatām ॥ 4 ॥
hrīṃkārāṅkitamantralakṣitatanō hēmāchalātsañchitaiḥ ratnairujjvalamuttarīyasahitaṃ kausumbhavarṇāṃśukam । muktāsantatiyajñasūtramamalaṃ sauvarṇatantūdbhavaṃ dattaṃ dēvi dhiyā mayaitadakhilaṃ santuṣṭayē kalpatām ॥ 5 ॥
haṃsairapyatilōbhanīyagamanē hārāvalīmujjvalāṃ hindōladyutihīrapūritatarē hēmāṅgadē kaṅkaṇē । mañjīrau maṇikuṇḍalē makuṭamapyardhēnduchūḍāmaṇiṃ nāsāmauktikamaṅgulīyakaṭakau kāñchīmapi svīkuru ॥ 6 ॥
sarvāṅgē ghanasārakuṅkumaghanaśrīgandhapaṅkāṅkitaṃ kastūrītilakaṃ cha phālaphalakē gōrōchanāpatrakam । gaṇḍādarśanamaṇḍalē nayanayōrdivyāñjanaṃ tē'ñchitaṃ kaṇṭhābjē mṛganābhipaṅkamamalaṃ tvatprītayē kalpatām ॥ 7 ॥
Offered for worship and study, not as prediction. Non-commercial.
kahlārōtpalamallikāmaruvakaiḥ sauvarṇapaṅkēruhai- -rjātīchampakamālatīvakulakairmandārakundādibhiḥ । kētakyā karavīrakairbahuvidhaiḥ kluptāḥ srajō mālikāḥ saṅkalpēna samarpayāmi varadē santuṣṭayē gṛhyatām ॥ 8 ॥
hantāraṃ madanasya nandayasi yairaṅgairanaṅgōjjvalai- -ryairbhṛṅgāvalinīlakuntalabharairbadhnāsi tasyāśayam । tānīmāni tavāmba kōmalatarāṇyāmōdalīlāgṛhā- -ṇyāmōdāya daśāṅgaguggulughṛtairdhūpairahaṃ dhūpayē ॥ 9 ॥
lakṣmīmujjvalayāmi ratnanivahōdbhāsvattarē mandirē mālārūpavilambitairmaṇimayastambhēṣu sambhāvitaiḥ । chitrairhāṭakaputrikākaradhṛtairgavyairghṛtairvardhitai- -rdivyairdīpagaṇairdhiyā girisutē santuṣṭayē kalpatām ॥ 10 ॥
hrīṃkārēśvari taptahāṭakakṛtaiḥ sthālīsahasrairbhṛtaṃ divyānnaṃ ghṛtasūpaśākabharitaṃ chitrānnabhēdaṃ tathā । dugdhānnaṃ madhuśarkarādadhiyutaṃ māṇikyapātrē sthitaṃ māṣāpūpasahasramamba saphalaṃ naivēdyamāvēdayē ॥ 11 ॥
sachChāyairvarakētakīdalaruchā tāmbūlavallīdalaiḥ pūgairbhūriguṇaiḥ sugandhimadhuraiḥ karpūrakhaṇḍōjjvalaiḥ । muktāchūrṇavirājitairbahuvidhairvaktrāmbujāmōdanaiḥ pūrṇā ratnakalāchikā tava mudē nyastā purastādumē ॥ 12 ॥
kanyābhiḥ kamanīyakāntibhiralaṅkārāmalārārtikā pātrē mauktikachitrapaṅktivilasatkarpūradīpālibhiḥ । tattattālamṛdaṅgagītasahitaṃ nṛtyatpadāmbhōruhaṃ mantrārādhanapūrvakaṃ suvihitaṃ nīrājanaṃ gṛhyatām ॥ 13 ॥
lakṣmīrmauktikalakṣakalpitasitachChattraṃ tu dhattē rasā- -dindrāṇī cha ratiścha chāmaravarē dhattē svayaṃ bhāratī । vīṇāmēṇavilōchanāḥ sumanasāṃ nṛtyanti tadrāgava- -dbhāvairāṅgikasāttvikaiḥ sphuṭarasaṃ mātastadākarṇyatām ॥ 14 ॥
hrīṃkāratrayasampuṭēna manunōpāsyē trayīmaulibhi- -rvākyairlakṣyatanō tava stutividhau kō vā kṣamētāmbikē । sallāpāḥ stutayaḥ pradakṣiṇaśataṃ sañchāra ēvāstu tē saṃvēśō namasaḥ sahasramakhilaṃ tvatprītayē kalpatām ॥ 15 ॥
śrīmantrākṣaramālayā girisutāṃ yaḥ pūjayēchchētasā sandhyāsu prativāsaraṃ suniyatastasyāmalaṃ syānmanaḥ । chittāmbhōruhamaṇṭapē girisutā nṛttaṃ vidhattē rasā- -dvāṇī vaktrasarōruhē jaladhijā gēhē jaganmaṅgaḻā ॥ 16 ॥
iti girivaraputrīpādarājīvabhūṣā bhuvanamamalayantī sūktisaurabhyasāraiḥ । śivapadamakarandasyandinīyaṃ nibaddhā madayatu kavibhṛṅgānmātṛkāpuṣpamālā ॥ 17 ॥
iti śrīmatparamahaṃsaparivrājakāchāryasya śrīgōvindabhagavatpūjyapādaśiṣyasya śrīmachChaṅkarabhagavataḥ kṛtau mantramātṛkāpuṣpamālā stavaḥ ।
Browse Related Categories: