Vishnu · Traditional devotional text · Source: vignanam.org (Traditional devotional text (public-domain shlokas))
ādau hairaṇyagarbhīṃ tanumavikalajīvātmikāmāsthitastvaṃ jīvatvaṃ prāpya māyāguṇagaṇakhachitō vartasē viśvayōnē । tatrōdvṛddhēna sattvēna tu guṇayugalaṃ bhaktibhāvaṃ gatēna Chitvā sattvaṃ cha hitvā punaranupahitō vartitāhē tvamēva ॥1॥
sattvōnmēṣāt kadāchit khalu viṣayarasē dōṣabōdhē'pi bhūman bhūyō'pyēṣu pravṛttissatamasi rajasi prōddhatē durnivārā । chittaṃ tāvadguṇāścha grathitamiha mithastāni sarvāṇi rōddhuṃ turyē tvayyēkabhaktiśśaraṇamiti bhavān haṃsarūpī nyagādīt ॥2॥
Offered for worship and study, not as prediction. Non-commercial.
More devotional texts
santi śrēyāṃsi bhūyāṃsyapi ruchibhidayā karmiṇāṃ nirmitāni kṣudrānandāścha sāntā bahuvidhagatayaḥ kṛṣṇa tēbhyō bhavēyuḥ । tvaṃ chāchakhyātha sakhyē nanu mahitatamāṃ śrēyasāṃ bhaktimēkāṃ tvadbhaktyānandatulyaḥ khalu viṣayajuṣāṃ sammadaḥ kēna vā syāt ॥3॥
tvatbhaktyā tuṣṭabuddhēḥ sukhamiha charatō vichyutāśasya chāśāḥ sarvāḥ syuḥ saukhyamayyaḥ salilakuharagasyēva tōyaikamayyaḥ । sō'yaṃ khalvindralōkaṃ kamalajabhavanaṃ yōgasiddhīścha hṛdyāḥ nākāṅkṣatyētadāstāṃ svayamanupatitē mōkṣasaukhyē'pyanīhaḥ ॥4॥
tvadbhaktō bādhyamānō'pi cha viṣayarasairindriyāśāntihētō- rbhaktyaivākramyamāṇaiḥ punarapi khalu tairdurbalairnābhijayyaḥ । saptārchirdīpitārchirdahati kila yathā bhūridāruprapañchaṃ tvadbhaktyōghē tathaiva pradahati duritaṃ durmadaḥ kvēndriyāṇām ॥5॥
chittārdrībhāvamuchchairvapuṣi cha pulakaṃ harṣavāṣpaṃ cha hitvā chittaṃ śuddhyētkathaṃ vā kimu bahutapasā vidyayā vītabhaktēḥ । tvadgāthāsvādasiddhāñjanasatatamarīmṛjyamānō'yamātmā chakṣurvattattvasūkṣmaṃ bhajati na tu tathā'bhyastayā tarkakōṭyā॥6॥
dhyānaṃ tē śīlayēyaṃ samatanusukhabaddhāsanō nāsikāgra- nyastākṣaḥ pūrakādyairjitapavanapathaśchittapadmaṃ tvavāñcham। ūrdhvāgraṃ bhāvayitvā ravividhuśikhinaḥ saṃvichintyōpariṣṭāt tatrasthaṃ bhāvayē tvāṃ sajalajaladharaśyāmalaṃ kōmalāṅgam ॥7॥
ānīlaślakṣṇakēśaṃ jvalitamakarasatkuṇḍalaṃ mandahāsa- syandārdraṃ kaustubhaśrīparigatavanamālōruhārābhirāmam । śrīvatsāṅkaṃ subāhuṃ mṛdulasadudaraṃ kāñchanachChāyachēlaṃ chārusnigdhōrumambhōruhalalitapadaṃ bhāvayē'haṃ bhavantam ॥8॥
sarvāṅgēṣvaṅga raṅgatkutukamiti muhurdhārayannīśa chittaṃ tatrāpyēkatra yuñjē vadanasarasijē sundarē mandahāsē tatrālīnaṃ tu chētaḥ paramasukhachidadvaitarūpē vitanva- nnanyannō chintayēyaṃ muhuriti samupārūḍhayōgō bhavēyam ॥9॥
itthaṃ tvaddhyānayōgē sati punaraṇimādyaṣṭasaṃsiddhayastāḥ dūraśrutyādayō'pi hyahamahamikayā sampatēyurmurārē । tvatsamprāptau vilambāvahamakhilamidaṃ nādriyē kāmayē'haṃ tvāmēvānandapūrṇaṃ pavanapurapatē pāhi māṃ sarvatāpāt ॥10॥
Browse Related Categories: