Vishnu · Traditional devotional text · Source: vignanam.org (Traditional devotional text (public-domain shlokas))
(śrīmahābhāratē bhīṣmaparvaṇi pañchaṣaṣṭitamō'dhyāyē ślō: 47)
viśvāvasurviśvamūrtirviśvēśō viṣvaksēnō viśvakarmā vaśī cha । viśvēśvarō vāsudēvō'si tasmā- -dyōgātmānaṃ daivataṃ tvāmupaimi ॥ 47 ॥
jaya viśva mahādēva jaya lōkahitērata । jaya yōgīśvara vibhō jaya yōgaparāvara ॥ 48 ॥
padmagarbha viśālākṣa jaya lōkēśvarēśvara । bhūtabhavyabhavannātha jaya saumyātmajātmaja ॥ 49 ॥
asaṅkhyēyaguṇādhāra jaya sarvaparāyaṇa । nārāyaṇa suduṣpāra jaya śārṅgadhanurdhara ॥ 50 ॥
jaya sarvaguṇōpēta viśvamūrtē nirāmaya । viśvēśvara mahābāhō jaya lōkārthatatpara ॥ 51 ॥
mahōragavarāhādya harikēśa vibhō jaya । harivāsa diśāmīśa viśvāvāsāmitāvyaya ॥ 52 ॥
vyaktāvyaktāmitasthāna niyatēndriya satkriya । asaṅkhyēyātmabhāvajña jaya gambhīrakāmada ॥ 53 ॥
anantavidita brahman nityabhūtavibhāvana । kṛtakārya kṛtaprajña dharmajña vijayāvaha ॥ 54 ॥
Offered for worship and study, not as prediction. Non-commercial.
More devotional texts
guhyātman sarvayōgātman sphuṭa sambhūta sambhava । bhūtādya lōkatattvēśa jaya bhūtavibhāvana ॥ 55 ॥
ātmayōnē mahābhāga kalpasaṅkṣēpatatpara । udbhāvanamanōbhāva jaya brahmajanapriya ॥ 56 ॥
nisargasarganirata kāmēśa paramēśvara । amṛtōdbhava sadbhāva muktātman vijayaprada ॥ 57 ॥
prajāpatipatē dēva padmanābha mahābala । ātmabhūta mahābhūta satvātman jaya sarvadā ॥ 58 ॥
pādau tava dharā dēvī diśō bāhu divaṃ śiraḥ । mūrtistē'haṃ surāḥ kāyaśchandrādityau cha chakṣuṣī ॥ 59 ॥
balaṃ tapaścha satyaṃ cha karma dharmātmajaṃ tava । tējō'gniḥ pavanaḥ śvāsa āpastē svēdasambhavāḥ ॥ 60 ॥
aśvinau śravaṇau nityaṃ dēvī jihvā sarasvatī । vēdāḥ saṃskāraniṣṭhā hi tvayīdaṃ jagadāśritam ॥ 61 ॥
na saṅkhyā na parīmāṇaṃ na tējō na parākramam । na balaṃ yōgayōgīśa jānīmastē na sambhavam ॥ 62 ॥
tvadbhaktiniratā dēva niyamaistvāṃ samāśritāḥ । archayāmaḥ sadā viṣṇō paramēśaṃ mahēśvaram ॥ 63 ॥
ṛṣayō dēvagandharvā yakṣarākṣasapannagāḥ । piśāchā mānuṣāśchaiva mṛgapakṣisarīsṛpāḥ ॥ 64 ॥
ēvamādi mayā sṛṣṭaṃ pṛthivyāṃ tvatprasādajam । padmanābha viśālākṣa kṛṣṇa duḥkhapraṇāśana ॥ 65 ॥
tvaṃ gatiḥ sarvabhūtānāṃ tvaṃ nētā tvaṃ jagadguruḥ । tvatprasādēna dēvēśa sukhinō vibudhāḥ sadā ॥ 66 ॥
pṛthivī nirbhayā dēva tvatprasādātsadā'bhavat । tasmādbhava viśālākṣa yaduvaṃśavivardhanaḥ ॥ 67 ॥
dharmasaṃsthāpanārthāya daityānāṃ cha vadhāya cha । jagatō dhāraṇārthāya vijñāpyaṃ kuru mē prabhō ॥ 68 ॥
yattatparamakaṃ guhyaṃ tvatprasādādidaṃ vibhō । vāsudēva tadētattē mayōdgītaṃ yathātatham ॥ 69 ॥
sṛṣṭvā saṅkarṣaṇaṃ dēvaṃ svayamātmānamātmanā । kṛṣṇa tvamātmanō sākṣī pradyumnaṃ chātmasambhavam ॥ 70 ॥
pradyumnādaniruddhaṃ tvaṃ yaṃ vidurviṣṇumavyayam । aniruddhō'sṛjanmāṃ vai brahmāṇaṃ lōkadhāriṇam ॥ 71 ॥
vāsudēvamayaḥ sō'haṃ tvayaivāsmi vinirmitaḥ । [tasmādyāchāmi lōkēśa chaturātmānamātmanā।] vibhajya bhāgaśō''tmānaṃ vraja mānuṣatāṃ vibhō ॥ 72 ॥
tatrāsuravadhaṃ kṛtvā sarvalōkasukhāya vai । dharmaṃ prāpya yaśaḥ prāpya yōgaṃ prāpsyasi tattvataḥ ॥ 73 ॥
tvāṃ hi brahmarṣayō lōkē dēvāśchāmitavikrama । taistairhi nāmabhiryuktā gāyanti paramātmakam ॥ 74 ॥
sthitāścha sarvē tvayi bhūtasaṅghāḥ kṛtvāśrayaṃ tvāṃ varadaṃ subāhō । anādimadhyāntamapārayōgaṃ lōkasya sētuṃ pravadanti viprāḥ ॥ 75 ॥
iti śrīmahābhāratē bhīṣmaparvaṇi pañchaṣaṣṭitamō'dhyāyē vāsudēva stōtram ।
Browse Related Categories: