Devi · Traditional devotional text · Source: vignanam.org (Traditional devotional text (public-domain shlokas))
ṣaḍādhārapaṅkēruhāntarvirāja- -tsuṣumnāntarālē'titējōllasantīm । sudhāmaṇḍalaṃ drāvayantīṃ pibantīṃ sudhāmūrtimīḍē chidānandarūpām ॥ 1 ॥
jvalatkōṭibālārkabhāsāruṇāṅgīṃ sulāvaṇyaśṛṅgāraśōbhābhirāmām । mahāpadmakiñjalkamadhyē virāja- -ttrikōṇē niṣaṇṇāṃ bhajē śrībhavānīm ॥ 2 ॥
kvaṇatkiṅkiṇīnūpurōdbhāsiratna- -prabhālīḍhalākṣārdrapādābjayugmam । ajēśāchyutādyaiḥ suraiḥ sēvyamānaṃ mahādēvi manmūrdhni tē bhāvayāmi ॥ 3 ॥
suśōṇāmbarābaddhanīvīvirāja- -nmahāratnakāñchīkalāpaṃ nitambam । sphuraddakṣiṇāvartanābhiṃ cha tisrō valīramba tē rōmarājiṃ bhajē'ham ॥ 4 ॥
lasadvṛttamuttuṅgamāṇikyakumbhō- -pamaśri stanadvandvamambāmbujākṣi । bhajē dugdhapūrṇābhirāmaṃ tavēdaṃ mahāhāradīptaṃ sadā prasnutāsyam ॥ 5 ॥
śirīṣaprasūnōllasadbāhudaṇḍai- -rjvaladbāṇakōdaṇḍapāśāṅkuśaiścha । chalatkaṅkaṇōdārakēyūrabhūṣō- -jjvaladbhirlasantīṃ bhajē śrībhavānīm ॥ 6 ॥
śaratpūrṇachandraprabhāpūrṇabimbā- -dharasmēravaktrāravindāṃ suśāntām । suratnāvaḻīhāratāṭaṅkaśōbhāṃ mahāsuprasannāṃ bhajē śrībhavānīm ॥ 7 ॥
sunāsāpuṭaṃ sundarabhrūlalāṭaṃ tavauṣṭhaśriyaṃ dānadakṣaṃ kaṭākṣam । lalāṭē lasadgandhakastūribhūṣaṃ sphurachChrīmukhāmbhōjamīḍē'hamamba ॥ 8 ॥
Offered for worship and study, not as prediction. Non-commercial.
chalatkuntalāntarbhramadbhṛṅgabṛndaṃ ghanasnigdhadhammillabhūṣōjjvalaṃ tē । sphuranmauḻimāṇikyabaddhēndurēkhā- -vilāsōllasaddivyamūrdhānamīḍē ॥ 9 ॥
iti śrībhavāni svarūpaṃ tavēdaṃ prapañchātparaṃ chātisūkṣmaṃ prasannam । sphuratvamba ḍimbhasya mē hṛtsarōjē sadā vāṅmayaṃ sarvatējōmayaṃ cha ॥ 10 ॥
gaṇēśābhimukhyākhilaiḥ śaktibṛndai- -rvṛtāṃ vai sphurachchakrarājōllasantīm । parāṃ rājarājēśvari traipuri tvāṃ śivāṅkōparisthāṃ śivāṃ bhāvayāmi ॥ 11 ॥
tvamarkastvamindustvamagnistvamāpa- -stvamākāśabhūvāyavastvaṃ mahattvam । tvadanyō na kaśchit prapañchō'sti sarvaṃ sadānandasaṃvitsvarūpaṃ bhajē'ham ॥ 12 ॥
śrutīnāmagamyē suvēdāgamajñā mahimnō na jānanti pāraṃ tavāmba । stutiṃ kartumichChāmi tē tvaṃ bhavāni kṣamasvēdamatra pramugdhaḥ kilāham ॥ 13 ॥
gurustvaṃ śivastvaṃ cha śaktistvamēva tvamēvāsi mātā pitā cha tvamēva । tvamēvāsi vidyā tvamēvāsi bandhu- -rgatirmē matirdēvi sarvaṃ tvamēva ॥ 14 ॥
śaraṇyē varēṇyē sukāruṇyamūrtē hiraṇyōdarādyairagaṇyē supuṇyē । bhavāraṇyabhītēścha māṃ pāhi bhadrē namastē namastē namastē bhavāni ॥ 15 ॥
itīmāṃ mahachChrībhavānībhujaṅgaṃ stutiṃ yaḥ paṭhēdbhaktiyuktaścha tasmai । svakīyaṃ padaṃ śāśvataṃ vēdasāraṃ śriyaṃ chāṣṭasiddhiṃ bhavānī dadāti ॥ 16 ॥
bhavānī bhavānī bhavānī trivāraṃ udāraṃ mudā sarvadā yē japanti । na śōkaṃ na mōhaṃ na pāpaṃ na bhītiḥ kadāchitkathañchitkutaśchijjanānām ॥ 17 ॥
॥ iti śrīmachChaṅkarāchāryavirachitā bhavānī bhujaṅgaṃ sampūrṇam ॥
Browse Related Categories: