Sri Mooka Pancha Shati · Traditional devotional text · Source: vignanam.org (Traditional devotional text (public-domain shlokas))
മോഹാംധകാരനിവഹം വിനിഹംതുമീഡേ മൂകാത്മനാമപി മഹാകവിതാവദാന്യാന് । ശ്രീകാംചിദേശശിശിരീകൃതിജാഗരൂകാന് ഏകാമ്രനാഥതരുണീകരുണാവലോകാന് ॥1॥
മാതര്ജയംതി മമതാഗ്രഹമോക്ഷണാനി മാഹേംദ്രനീലരുചിശിക്ഷണദക്ഷിണാനി । കാമാക്ഷി കല്പിതജഗത്ത്രയരക്ഷണാനി ത്വദ്വീക്ഷണാനി വരദാനവിചക്ഷണാനി ॥2॥
Offered for worship and study, not as prediction. Non-commercial.
ആനംഗതംത്രവിധിദര്ശിതകൌശലാനാമ് ആനംദമംദപരിഘൂര്ണിതമംഥരാണാമ് । താരല്യമംബ തവ താഡിതകര്ണസീമ്നാം കാമാക്ഷി ഖേലതി കടാക്ഷനിരീക്ഷണാനാമ് ॥3॥
കല്ലോലിതേന കരുണാരസവേല്ലിതേന കല്മാഷിതേന കമനീയമൃദുസ്മിതേന । മാമംചിതേന തവ കിംചന കുംചിതേന കാമാക്ഷി തേന ശിശിരീകുരു വീക്ഷിതേന ॥4॥
സാഹായ്യകം ഗതവതീ മുഹുരര്ജനസ്യ മംദസ്മിതസ്യ പരിതോഷിതഭീമചേതാഃ । കാമാക്ഷി പാംഡവചമൂരിവ താവകീനാ കര്ണാംതികം ചലതി ഹംത കടാക്ഷലക്ഷ്മീഃ ॥5॥
അസ്തം ക്ഷണാന്നയതു മേ പരിതാപസൂര്യമ് ആനംദചംദ്രമസമാനയതാം പ്രകാശമ് । കാലാംധകാരസുഷുമാം കലയംദിഗംതേ കാമാക്ഷി കോമലകടാക്ഷനിശാഗമസ്തേ ॥6॥
താടാംകമൌക്തികരുചാംകുരദംതകാംതിഃ കാരുണ്യഹസ്തിപശിഖാമണിനാധിരൂഢഃ । ഉന്മൂലയത്വശുഭപാദപമസ്മദീയം കാമാക്ഷി താവകകടാക്ഷമതംഗജേതംദ്രഃ ॥7॥
ഛായാഭരണേ ജഗതാം പരിതാപഹാരീ താടംകരത്നമണിതല്ലജപല്ലവശ്രീഃ । കാരുണ്യനാമ വികിരന്മകരംദജാലം കാമാക്ഷി രാജതി കടാക്ഷസുരദ്രുമസ്തേ ॥8॥
സൂര്യാശ്രയപ്രണയിനീ മണികുംഡലാംശു- ലൌഹിത്യകോകനദകാനനമാനനീയാ । യാംതീ തവ സ്മരഹരാനനകാംതിസിംധും കാമാക്ഷി രാജതി കടാക്ഷകലിംദകന്യാ ॥9॥
പ്രാപ്നോതി യം സുകൃതിനം തവ പക്ഷപാതാത് കാമാക്ഷി വീക്ഷണവിലാസകലാപുരംധ്രീ । സദ്യസ്തമേവ കില മുക്തിവധൂർവൃണീതേ തസ്മാന്നിതാംതമനയോരിദമൈകമത്യമ് ॥10॥
യാംതീ സദൈവ മരുതാമനുകൂലഭാവം ഭ്രൂവല്ലിശക്രധനുരുല്ലസിതാ രസാര്ദ്രാ । കാമാക്ഷി കൌതുകതരംഗിതനീലകംഠാ കാദംബിനീവ തവ ഭാതി കടാക്ഷമാലാ ॥11॥
ഗംഗാംഭസി സ്മിതമയേ തപനാത്മജേവ ഗംഗാധരോരസി നവോത്പലമാലികേവ । വക്ത്രപ്രഭാസരസി ശൈവലമംഡലീവ കാമാക്ഷി രാജതി കടാക്ഷരുചിച്ഛടാ തേ ॥12॥
സംസ്കാരതഃ കിമപി കംദലിതാന് രസജ്ഞ- കേദാരസീമ്നി സുധിയാമുപഭോഗയോഗ്യാന് । കല്യാണസൂക്തിലഹരീകലമാംകുരാന്നഃ കാമാക്ഷി പക്ഷ്മലയതു ത്വദപാംഗമേഘഃ ॥13॥
ചാംചല്യമേവ നിയതം കലയന്പ്രകൃത്യാ മാലിന്യഭൂഃ ശ്രതിപഥാക്രമജാഗരൂകഃ । കൈവല്യമേവ കിമു കല്പയതേ നതാനാം കാമാക്ഷി ചിത്രമപി തേ കരുണാകടാക്ഷഃ ॥14॥
സംജീവനേ ജനനി ചൂതശിലീമുഖസ്യ സംമോഹനേ ശശികിശോരകശേഖരസ്യ । സംസ്തംഭനേ ച മമതാഗ്രഹചേഷ്ടിതസ്യ കാമാക്ഷി വീക്ഷണകലാ പരമൌഷധം തേ ॥15॥
നീലോഽപി രാഗമധികം ജനയന്പുരാരേഃ ലോലോഽപി ഭക്തിമധികാം ദൃഢയന്നരാണാമ് । വക്രോഽപി ദേവി നമതാം സമതാം വിതന്വന് കാമാക്ഷി നൃത്യതു മയി ത്വദപാംഗപാതഃ ॥16॥
കാമദ്രുഹോ ഹൃദയയംത്രണജാഗരൂകാ കാമാക്ഷി ചംചലദൃഗംചലമേഖലാ തേ । ആശ്ചര്യമംബ ഭജതാം ഝടിതി സ്വകീയ- സംപര്ക ഏവ വിധുനോതി സമസ്തബംധാന് ॥17॥
കുംഠീകരോതു വിപദം മമ കുംചിതഭ്രൂ- ചാപാംചിതഃ ശ്രിതവിദേഹഭവാനുരാഗഃ । രക്ഷോപകാരമനിശം ജനയംജഗത്യാം കാമാക്ഷി രാമ ഇവ തേ കരുണാകടാക്ഷഃ ॥18॥
ശ്രീകാമകോടി ശിവലോചനശോഷിതസ്യ ശൃംഗാരബീജവിഭവസ്യ പുനഃപ്രരോഹേ । പ്രേമാംഭസാര്ദ്രമചിരാത്പ്രചുരേണ ശംകേ കേദാരമംബ തവ കേവലദൃഷ്ടിപാതമ് ॥19॥
മാഹാത്മ്യശേവധിരസൌ തവ ദുർവിലംഘ്യ- സംസാരവിംധ്യഗിരികുംഠനകേലിചുംചുഃ । ധൈര്യാംബുധിം പശുപതേശ്ചുലകീകരോതി കാമാക്ഷി വീക്ഷണവിജൃംഭണകുംഭജന്മാ ॥20॥
പീയൂഷവര്ഷവശിശിരാ സ്ഫുടദുത്പലശ്രീ- മൈത്രീ നിസര്ഗമധുരാ കൃതതാരകാപ്തിഃ । കാമാക്ഷി സംശ്രിതവതീ വപുരഷ്ടമൂര്തേഃ ജ്യോത്സ്നായതേ ഭഗവതി ത്വദപാംഗമാലാ ॥21॥
അംബ സ്മരപ്രതിഭടസ്യ വപുര്മനോജ്ഞമ് അംഭോജകാനനമിവാംചിതകംടകാഭമ് । ഭൃംഗീവ ചുംബതി സദൈവ സപക്ഷപാതാ കാമാക്ഷി കോമലരുചിസ്ത്വദപാംഗമാലാ ॥22॥
കേശപ്രഭാപടലനീലവിതാനജാലേ കാമാക്ഷി കുംഡലമണിച്ഛവിദീപശോഭേ । ശംകേ കടാക്ഷരുചിരംഗതലേ കൃപാഖ്യാ ശൈലൂഷികാ നടതി ശംകരവല്ലഭേ തേ ॥23॥
അത്യംതശീതലമതംദ്രയതു ക്ഷണാര്ധമ് അസ്തോകവിഭ്രമമനംഗവിലാസകംദമ് । അല്പസ്മിതാദൃതമപാരകൃപാപ്രവാഹമ് അക്ഷിപ്രരോഹമചിരാന്മയി കാമകോടി ॥24॥
മംദാക്ഷരാഗതരലീകൃതിപാരതംത്ര്യാത് കാമാക്ഷി മംഥരതരാം ത്വദപാംഗഡോലാമ് । ആരുഹ്യ മംദമതികൌതുകശാലി ചക്ഷുഃ ആനംദമേതി മുഹുരര്ധശശാംകമൌലേഃ ॥25॥
ത്രൈയംബകം ത്രിപുരസുംദരി ഹര്മ്യഭൂമി- രംഗം വിഹാരസരസീ കരുണാപ്രവാഹഃ । ദാസാശ്ച വാസവമുഖാഃ പരിപാലനീയം കാമാക്ഷി വിശ്വമപി വീക്ഷണഭൂഭൃതസ്തേ ॥26॥
വാഗീശ്വരീ സഹചരീ നിയമേന ലക്ഷ്മീഃ ഭ്രൂവല്ലരീവശകരീ ഭുവനാനി ഗേഹമ് । രൂപം ത്രിലോകനയനാമൃതമംബ തേഷാം കാമാക്ഷി യേഷു തവ വീക്ഷണപാരതംത്രീ ॥27॥
മാഹേശ്വരം ഝടിതി മാനസമീനമംബ കാമാക്ഷി ധൈര്യജലധൌ നിതരാം നിമഗ്നമ് । ജാലേന ശൃംഖലയതി ത്വദപാംഗനാമ്നാ വിസ്താരിതേന വിഷമായുധദാശകോഽസൌ ॥28॥
ഉന്മഥ്യ ബോധകമലാകാരമംബ ജാഡ്യ- സ്തംബേരമം മമ മനോവിപിനേ ഭ്രമംതമ് । കുംഠീകുരുഷ്വ തരസാ കുടിലാഗ്രസീമ്നാ കാമാക്ഷി താവകകടാക്ഷമഹാംകുശേന ॥29॥
ഉദ്വേല്ലിതസ്തബകിതൈര്ലലിതൈർവിലാസൈഃ ഉത്ഥായ ദേവി തവ ഗാഢകടാക്ഷകുംജാത് । ദൂരം പലായയതു മോഹമൃഗീകുലം മേ കാമാക്ഷി സ്തവരമനുഗ്രഹകേസരീംദ്രഃ ॥30॥
സ്നേഹാദൃതാം വിദലിതോത്പലകംതിചോരാം ജേതാരമേവ ജഗദീശ്വരി ജേതുകാമഃ । മാനോദ്ധതോ മകരകേതുരസൌ ധുനീതേ കാമാക്ഷി താവകകടാക്ഷകൃപാണവല്ലീമ് ॥31॥
ശ്രൌതീം വ്രജന്നപി സദാ സരണിം മുനീനാം കാമാക്ഷി സംതതമപി സ്മൃതിമാര്ഗഗാമീ । കൌടില്യമംബ കഥമസ്ഥിരതാം ച ധത്തേ ചൌര്യം ച പംകജരുചാം ത്വദപാംഗപാതഃ ॥32॥
നിത്യം ശ്രേതുഃ പരിചിതൌ യതമാനമേവ നീലോത്പലം നിജസമീപനിവാസലോലമ് । പ്രീത്യൈവ പാഠയതി വീക്ഷണദേശികേംദ്രഃ കാമാക്ഷീ കിംതു തവ കാലിമസംപ്രദായമ് ॥33॥
ഭ്രാംത്വാ മുഹുഃ സ്തബകിതസ്മിതഫേനരാശൌ കാമാക്ഷി വക്ത്രരുചിസംചയവാരിരാശൌ । ആനംദതി ത്രിപുരമര്ദനനേത്രലക്ഷ്മീഃ ആലംബ്യ ദേവി തവ മംദമപാംഗസേതുമ് ॥34॥
ശ്യാമാ തവ ത്രിപുരസുംദരി ലോചനശ്രീഃ കാമാക്ഷി കംദലിതമേദുരതാരകാംതിഃ । ജ്യോത്സ്നാവതീ സ്മിതരുചാപി കഥം തനോതി സ്പര്ധാമഹോ കുവലയൈശ്ച തഥാ ചകോരൈഃ ॥35॥
കാലാംജനം ച തവ ദേവി നിരീക്ഷണം ച കാമാക്ഷി സാമ്യസരണിം സമുപൈതി കാംത്യാ । നിശ്ശേഷനേത്രസുലഭം ജഗതീഷു പൂർവ- മന്യത്ത്രിനേത്രസുലഭം തുഹിനാദ്രികന്യേ ॥36॥
ധൂമാംകുരോ മകരകേതനപാവകസ്യ കാമാക്ഷി നേത്രരുചിനീലിമചാതുരീ തേ । അത്യംതമദ്ഭുതമിദം നയനത്രയസ്യ ഹര്ഷോദയം ജനയതേ ഹരുണാംകമൌലേഃ ॥37॥
ആരഭ്ഭലേശസമയേ തവ വീക്ഷണസ്സ കാമാക്ഷി മൂകമപി വീക്ഷണമാത്രനമ്രമ് । സർവജ്ഞതാ സകലലോകസമക്ഷമേവ കീര്തിസ്വയംവരണമാല്യവതീ വൃണീതേ ॥38॥
കാലാംബുവാഹ ഉവ തേ പരിതാപഹാരീ കാമാക്ഷി പുഷ്കരമധഃകുരുതേ കടാഖ്ക്ഷ്ഷഃ । പൂർവഃ പരം ക്ഷണരുചാ സമുപൈതി മൈത്രീ- മന്യസ്തു സ.തതരുചിം പ്രകടീകരോതി ॥39॥
സൂക്ഷ്മേഽപി ദുര്ഗമതരേഽപി ഗുരുപ്രസാദ- സാഹായ്യകേന വിചരന്നപവര്ഗമാര്ഗേ । സംസാരപംകനിചയേ ന പതത്യമൂം തേ കാമാക്ഷി ഗാഢമവലംബ്യ കടാക്ഷയഷ്ടിമ് ॥40॥
കാമാക്ഷി സംതതമസൌ ഹരിനീലരത്ന- സ്തംഭേ കടാക്ഷരുചിപുംജമയേ ഭവത്യാഃ । ബദ്ധോഽപി ഭക്തിനിഗലൈര്മമ ചിത്തഹസ്തീ സ്തംഭം ച ബംധമപി മുംചതി ഹംത ചിത്രമ് ॥41॥
കാമാക്ഷി കാഷ്ണര്യമപി സംതതമംജനം ച ബിഭ്രന്നിസര്ഗതരലോഽപി ഭവത്കടാക്ഷഃ । വൈമല്യമന്വഹമനംജനതാ ച ഭൂയഃ സ്ഥൈര്യം ച ഭക്തഹൃദയായ കഥം ദദാതി ॥42॥
മംദസ്മിതസ്തബകിതം മണികുംഡലാംശു- സ്തോമപ്രവാലരുചിരം ശിശിരീകൃതാശമ് । കാമാക്ഷി രാജതി കടാക്ഷരുചേഃ കദംബമ് ഉദ്യാനമംബ കരുണാഹരിണേക്ഷണായാഃ ॥43॥
കാമാക്ഷി താവകകടാക്ഷമഹേംദ്രനീല- സിംഹാസനം ശ്രിതവതോ മകരധ്വജസ്യ । സാമ്രാജ്യമംഗലവിധൌ മുണികുംഡലശ്രീഃ നീരാജനോത്സവതരംഗിതദീപമാലാ ॥44॥
മാതഃ ക്ഷണം സ്നപയ മാം തവ വീക്ഷിതേന മംദാക്ഷിതേന സുജനൈരപരോക്ഷിതേന । കാമാക്ഷി കര്മതിമിരോത്കരഭാസ്കരേണ ശ്രേയസ്കരേണ മധുപദ്യുതിതസ്കരേണ ॥45॥
പ്രേമാപഗാപയസി മജ്ജനമാരചയ്യ യുക്തഃ സ്മിതാംശുകൃതഭസ്മവിലേപനേന । കാമാക്ഷി കുംഡലമണിദ്യുതിഭിര്ജടാലഃ ശ്രീകംഠമേവ ഭജതേ തവ ദൃഷ്ടിപാതഃ ॥46॥
കൈവല്യദായ കരുണാരസകിംകരായ കാമാക്ഷി കംദലിതവിഭ്രമശംകരായ । ആലോകനായ തവ ഭക്തശിവംകരായ മാതര്നമോഽസ്തു പരതംത്രിതശംകരായ ॥47॥
സാമ്രാജ്യമംഗലവിധൌ മകരധ്വജസ്യ ലോലാലകാലികൃതതോരണമാല്യശോഭേ । കാമേശ്വരി പ്രചലദുത്പലവൈജയംതീ- ചാതുര്യമേതി തവ ചംചലദൃഷ്ടിപാതഃ ॥48॥
മാര്ഗേണ മംജുകചകാംതിതമോവൃതേന മംദായമാനഗമനാ മദനാതുരാസൌ । കാമാക്ഷി ദൃഷ്ടിരയതേ തവ ശംകരായ സംകേതഭൂമിമചിരാദഭിസാരികേവ ॥49॥
വ്രീഡനുവൃത്തിരമണീകൃതസാഹചര്യാ ശൈവാലിതാം ഗലരുചാ ശശിശേഖരസ്യ । കാമാക്ഷി കാംതിസരസീം ത്വദപാംഗലക്ഷ്മീഃ മംദം സമാശ്രയതി മജ്ജനഖേലനായ ॥50॥
കാഷായമംശുകമിവ പ്രകടം ദധാനോ മാണിക്യകുംഡലരുചിം മമതാവിരോധീ । ശ്രുത്യംതസീമനി രതഃ സുതരാം ചകാസ്തി കാമാക്ഷി താവകകടാക്ഷയതീശ്വരോഽസൌ ॥51॥
പാഷാണ ഏവ ഹരിനീലമണിര്ദിനേഷു പ്രമ്ലനതാം കുവലയം പ്രകടീകരോതി । നൌമിത്തികോ ജലദമേചകിമാ തതസ്തേ കാമാക്ഷി ശൂന്യമുപമനമപാംഗലക്ഷ്മ്യാഃ ॥52॥
ശൃംഗാരവിഭ്രമവതീ സുതരാം സലജ്ജാ നാസാഗ്രമൌക്തികരുചാ കൃതമംദഹാസാ । ശ്യാമാ കടാക്ഷസുഷമാ തവ യുക്തമേതത് കാമാക്ഷി ചുംബതി ദിഗംബരവക്ത്രബിംബമ് ॥53॥
നീലോത്പലേന മധുപേന ച ദൃഷ്ടിപാതഃ കാമാക്ഷി തുല്യ ഇതി തേ കഥമാമനംതി । ശൈത്യേന നിംദയതി യദന്വഹമിംദുപാദാന് പാഥോരുഹേണ യദസൌ കലഹായതേ ച ॥54॥
ഓഷ്ഠപ്രഭാപടലവിദ്രുമമുദ്രിതേ തേ ഭ്രൂവല്ലിവീചിസുഭഗേ മുഖകാംതിസിംധൌ । കാമാക്ഷി വാരിഭരപൂരണലംബമാന- കാലാംബുവാഹസരണിം ലഭതേ കടാക്ഷഃ ॥55॥
മംദസ്മിതൈര്ധവലിതാ മണികുംഡലാംശു- സംപര്കലോഹിതരുചിസ്ത്വദപാംഗധാരാ । കാമാക്ഷി മല്ലികുസുമൈര്നവപല്ലവൈശ്ച നീലോത്പലൈശ്ച രചിതേവ വിഭാതി മാലാ ॥56॥
കാമാക്ഷി ശീതലകൃപാരസനിര്ഝരാംഭഃ- സംപര്കപക്ഷ്മലരുചിസ്ത്വദപാംഗമാലാ । ഗോഭിഃ സദാ പുരരിപോരഭിലഷ്യമാണാ ദൂർവാകദംബകവിഡംബനമാതനോതി ॥57॥
ഹൃത്പംകജം മമ വികാസയതു പ്രമുഷ്ണ- ന്നുല്ലാസമുത്പലരുചേസ്തമസാം നിരോദ്ധാ । ദോഷാനുഷംഗജഡതാം ജഗതാം ധുനാനഃ കാമാക്ഷി വീക്ഷണവിലാസദിനോദയസ്തേ ॥58॥
ചക്ഷുർവിമോഹയതി ചംദ്രവിഭൂഷണസ്യ കാമാക്ഷി താവകകടാക്ഷതമഃപ്രരോഹഃ । പ്രത്യങ്മുഖം തു നയനം സ്തിമിതം മുനീനാം പ്രാകാശ്യമേവ നയതീതി പരം വിചിത്രമ് ॥59॥
കാമാക്ഷി വീക്ഷണരുചാ യുധി നിര്ജിതം തേ നീലോത്പലം നിരവശേഷഗതാഭിമാനമ് । ആഗത്യ തത്പരിസരം ശ്രവണവതംസ- വ്യോജേന നൂനമഭയാര്ഥനമാതനോതി ॥60॥
ആശ്ചര്യമംബ മദാനാഭ്യുദയാവലംബഃ കാമാക്ഷി ചംചലനിരീക്ഷണവിഭ്രമസ്തേ । ധൈര്യം വിധൂയ തനുതേ ഹൃദി രാഗബംധം ശംഭോസ്തദേവ വിപരീതതയാ മുനീനാമ് ॥61॥
ജംതോഃ സകൃത്പ്രണമതോ ജഗദീഡ്യതാം ച തേജാസ്വിതാം ച നിശിതാം ച മതിം സഭായാമ് । കാമാക്ഷി മാക്ഷികഝരീമിവ വൈഖരീം ച ലക്ഷ്മീം ച പക്ഷ്മലയതി ക്ഷണവീക്ഷണം തേ ॥62॥
കാദംബിനീ കിമയതേ ന ജലാനുഷംഗം ഭൃംഗാവലീ കിമുരരീകുരുതേ ന പദ്മമ് । കിം വാ കലിംദതനയാ സഹതേ ന ഭംഗം കാമാക്ഷി നിശ്ചയപദം ന തവാക്ഷിലക്ഷ്മീഃ ॥63॥
കാകോലപാവകതൃണീകരണേഽപി ദക്ഷഃ കാമാക്ഷി ബാലകസുധാകരശേഖരസ്യ । അത്യംതശീതലതമോഽപ്യനുപാരതം തേ ചിത്തം വിമോഹയതി ചിത്രമയം കടാക്ഷഃ ॥64॥
കാര്പണ്യപൂരപരിവര്ധിതമംബ മോഹ- കംദോദ്ഗതം ഭവമയം വിഷപാദപം മേ । തുംഗം ഛിനത്തു തുഹിനാദ്രിസുതേ ഭവത്യാഃ കാംചീപുരേശ്വരി കടാക്ഷകുഠാരധാരാ ॥65॥
കാമാക്ഷി ഘോരഭവരോഗചികിത്സനാര്ഥ- മഭ്യര്ഥ്യ ദേശികകടാക്ഷഭിഷക്പ്രസാദാത് । തത്രാപി ദേവി ലഭതേ സുകൃതീ കദാചി- ദന്യസ്യ ദുര്ലഭമപാംഗമഹൌഷധം തേ ॥66॥
കാമാക്ഷി ദേശികകൃപാംകുരമാശ്രയംതോ നാനാതപോനിയമനാശിതപാശബംധാഃ । വാസാലയം തവ കടാക്ഷമമും മഹാംതോ ലബ്ധ്വാ സുഖം സമാധിയോ വിചരംതി ലോകേ ॥67॥
സാകൂതസംലപിതസംഭൃതമുഗ്ധഹാസം വ്രീഡാനുരാഗസഹചാരി വിലോകനം തേ । കാമാക്ഷി കാമപരിപംഥിനി മാരവീര- സാമ്രാജ്യവിഭ്രമദശാം സഫലീകരോതി ॥68॥
കാമാക്ഷി വിഭ്രമബലൈകനിധിർവിധായ ഭ്രൂവല്ലിചാപകുടിലീകൃതിമേവ ചിത്രമ് । സ്വാധീനതാം തവ നിനായ ശശാംകമൌലേ- രംഗാര്ധരാജ്യസുഖലാഭമപാംഗവീരഃ ॥69॥
കാമാംകുരൈകനിലയസ്തവ ദൃഷ്ടിപാതഃ കാമാക്ഷി ഭക്തമനസാം പ്രദദാതു കാമാന് । രാഗാന്വിതഃ സ്വയമപി പ്രകടീകരോതി വൈരാഗ്യമേവ കഥമേഷ മഹാമുനീനാമ് ॥70॥
കാലാംബുവാഹനിവഹൈഃ കലഹായതേ തേ കാമാക്ഷി കാലിമമദേന സദാ കടാക്ഷഃ । ചിത്രം തഥാപി നിതരാമമുമേവ ദൃഷ്ട്വാ സോത്കംഠ ഏവ രമതേ കില നീലകംഠഃ ॥71॥
കാമാക്ഷി മന്മഥരിപും പ്രതി മാരതാപ- മോഹാംധകാരജലദാഗമനേന നൃത്യന് । ദുഷ്കര്മകംചുകികുലം കബലീകരോതു വ്യാമിശ്രമേചകരുചിസ്ത്വദപാംഗകേകീ ॥72॥
കാമാക്ഷി മന്മഥരിപോരവലോകനേഷു കാംതം പയോജമിവ താവകമക്ഷിപാതമ് । പ്രേമാഗമോ ദിവസവദ്വികചീകരോതി ലജ്ജാഭരോ രജനിവന്മുകുലീകരോതി ॥73॥
മൂകോ വിരിംചതി പരം പുരുഷഃ കുരൂപഃ കംദര്പതി ത്രിദശരാജതി കിംപചാനഃ । കാമാക്ഷി കേവലമുപക്രമകാല ഏവ ലീലാതരംഗിതകടാക്ഷരുചഃ ക്ഷണം തേ ॥74॥
നീലാലകാ മധുകരംതി മനോജ്ഞനാസാ- മുക്താരുചഃ പ്രകടകംദബിസാംകുരംതി । കാരുണ്യമംബ മകരംദതി കാമകോടി മന്യേ തതഃ കമലമേവ വിലോചനം തേ ॥75॥
ആകാംക്ഷ്യമാണഫലദാനവിചക്ഷണായാഃ । കാമാക്ഷി താവകകടാക്ഷകകാമധേനോഃ । സംപര്ക ഏവ കഥമംബ വിമുക്തപാശ- ബംധാഃ സ്ഫുടം തനുഭൃതഃ പശുതാം ത്യജംതി ॥76॥
സംസാരഘര്മപരിതാപജുഷാം നരാണാം കാമാക്ഷി ശീതലതരാണി തവേക്ഷിതാനി । ചംദ്രാതപംതി ഘനചംദനകര്ദമംതി മുക്താഗുണംതി ഹിമവാരിനിഷേചനംതി ॥77॥
പ്രേമാംബുരാശിസതതസ്നപിതാനി ചിത്രം കാമാക്ഷി താവകകടാക്ഷനിരീക്ഷണാനി । സംധുക്ഷയംതി മുഹുരിംധനരാശിരീത്യാ മാരദ്രുഹോ മനസി മന്മഥചിത്രഭാനുമ് ॥78॥
കാലാംജനപ്രതിഭടം കമനീയകാംത്യാ കംദര്പതംത്രകലയാ കലിതാനുഭാവമ് । കാംചീവിഹാരരസികേ കലുഷാര്തിചോരം കല്ലോലയസ്വ മയി തേ കരുണാകടാക്ഷമ് ॥79॥
ക്രാംതേന മന്മഥദേന വിമോഹ്യമാന- സ്വാംതേന ചൂതതരുമൂലഗതസ്യ പുംസഃ । കാംതേന കിംചിദവലോകയ ലോചനസ്യ പ്രാംതേന മാം ജനനി കാംചിപുരീവിഭൂഷേ ॥80॥
കാമാക്ഷി കോഽപി സുജനാസ്ത്വദപാംഗസംഗേ കംഠേന കംദലിതകാലിമസംപ്രദായാഃ । ഉത്തംസകല്പിതചകോരകുടുംബപോഷാ നക്തംദിവസപ്രസവഭൂനയനാ ഭവംതി ॥81॥
നീലോത്പലപ്രസവകാംതിനിര്ദശനേന കാരുണ്യവിഭ്രമജുഷാ തവ വീക്ഷണേന । കാമാക്ഷി കര്മജലധേഃ കലശീസുതേന പാശത്രയാദ്വയമമീ പരിമോചനീയാഃ ॥82॥
അത്യംതചംചലമകൃത്രിമമംജനം കിം ഝംകാരഭംഗിരഹിതാ കിമു ഭൃംഗമാലാ । ധൂമാംകുരഃ കിമു ഹുതാശനസംഗഹീനഃ കാമാക്ഷി നേത്രരുചിനീലിമകംദലീ തേ ॥83॥
കാമാക്ഷി നിത്യമയമംജലിരസ്തു മുക്തി- ബീജായ വിഭ്രമമദോദയഘൂര്ണിതായ । കംദര്പദര്പപുനരുദ്ഭവസിദ്ധിദായ കല്യാണദായ തവ ദേവി ദൃഗംചലായ ॥84॥
ദര്പാംകുരോ മകരകേതനവിഭ്രമാണാം നിംദാംകുരോ വിദലിതോത്പലചാതുരീണാമ് । ദീപാംകുരോ ഭവതമിസ്രകദംബകാനാം കാമാക്ഷി പാലയതു മാം ത്വദപാംഗപാതഃ ॥85॥
കൈവല്യദിവ്യമണിരോഹണപർവതേഭ്യഃ കാരുണ്യനിര്ഝരപയഃകൃതമംജനേഭ്യഃ । കാമാക്ഷി കിംകരിതശംകരമാനസേഭ്യ- സ്തേഭ്യോ നമോഽസ്തു തവ വീക്ഷണവിഭ്രമേഭ്യഃ ॥86॥
അല്പീയ ഏവ നവമുത്പലമംബ ഹീനാ മീനസ്യ വാ സരണിരംബുരുഹാം ച കിം വാ । ദൂരേ മൃഗീദൃഗസമംജസമംജനം ച കാമാക്ഷി വീക്ഷണരുചൌ തവ തര്കയാമഃ ॥87॥
മിശ്രീഭവദ്ഗരലപംകിലശംകരോരസ്- സീമാംഗണേ കിമപി രിംഖണമാദധാനഃ । ഹേലാവധൂതലലിതശ്രവണോത്പലോഽസൌ കാമാക്ഷി ബാല ഇവ രാജതി തേ കടാക്ഷഃ ॥88॥
പ്രൌഢികരോതി വിദുഷാം നവസൂക്തിധാടീ- ചൂതാടവീഷു ബുധകോകിലലാല്യമാനമ് । മാധ്വീരസം പരിമലം ച നിരര്ഗലം തേ കാമാക്ഷി വീക്ഷണവിലാസവസംതലക്ഷ്മീഃ ॥89॥
കൂലംകഷം വിതനുതേ കരുണാംബുവര്ഷീ സാരസ്വതം സുകൃതിനഃ സുലഭം പ്രവാഹമ് । തുച്ഛീകരോതി യമുനാംബുതരംഗഭംഗീം കാമാക്ഷി കിം തവ കടാക്ഷമഹാംബുവാഹഃ ॥90॥
ജഗര്തി ദേവി കരുണാശുകസുംദരീ തേ താടംകരത്നരുചിദാഡിമഖംഡശോണേ । കാമാക്ഷി നിര്ഭരകടാക്ഷമരീചിപുംജ- മാഹേംദ്രനീലമണിപംജരമധ്യഭാഗേ ॥91॥
കാമാക്ഷി സത്കുവലയസ്യ സഗോത്രഭാവാ- ദാക്രാമതി ശ്രുതിമസൌ തവ ദൃഷ്ടിപാതഃ । കിംച സ്ഫുടം കുടിലതാം പ്രകടീകരോതി ഭ്രൂവല്ലരീപരിചിതസ്യ ഫലം കിമേതത് ॥92॥
ഏഷാ തവാക്ഷിസുഷമാ വിഷമായുധസ്യ നാരാചവര്ഷലഹരീ നഗരാജകന്യേ । ശംകേ കരോതി ശതധാ ഹൃദി ധൈര്യമുദ്രാം ശ്രീകാമകോടി യദസൌ ശിശിരാംശുമൌലേഃ ॥93॥
ബാണേന പുഷ്പധനുഷഃ പരികല്പ്യമാന- ത്രാണേന ഭക്തമനസാം കരുണാകരേണ । കോണേന കോമലദൃശസ്തവ കാമകോടി ശോണേന ശോഷയ ശിവേ മമ ശോകസിംധുമ് ॥94॥
മാരദ്രുഹാ മുകുടസീമനി ലാല്യമാനേ മംദാകിനീപയസി തേ കുടിലം ചരിഷ്ണുഃ । കാമാക്ഷി കോപരഭസാദ്വലമാനമീന- സംദേഹമംകുരയതി ക്ഷണമക്ഷിപാതഃ ॥95॥
കാമാക്ഷി സംവലിതമൌക്തികകുംഡലാംശു- ചംചത്സിതശ്രവണചാമരചാതുരീകഃ । സ്തംഭേ നിരംതരമപാംഗമയേ ഭവത്യാ ബദ്ധശ്ചകാസ്തി മകരധ്വജമത്തഹസ്തീ ॥96॥
യാവത്കടാക്ഷരജനീസമയാഗമസ്തേ കാമാക്ഷി താവദചിരാന്നമതാം നരാണാമ് । ആവിര്ഭവത്യമൃതദീധിതിബിംബമംബ സംവിന്മയം ഹൃദയപൂർവഗിരീംദ്രശൃംഗേ ॥97॥
കാമാക്ഷി കല്പവിടപീവ ഭവത്കടാക്ഷോ ദിത്സുഃ സമസ്തവിഭവം നമതാം നരാണാമ് । ഭൃംഗസ്യ നീലനലിനസ്യ ച കാംതിസംപ- ത്സർവസ്വമേവ ഹരതീതി പരം വിചിത്രമ് ॥98॥
അത്യംതശീതലമനര്ഗലകര്മപാക- കാകോലഹാരി സുലഭം സുമനോഭിരേതത് । പീയൂഷമേവ തവ വീക്ഷണമംബ കിംതു കാമാക്ഷി നീലമിദമിത്യയമേവ ഭേദഃ ॥99॥
അജ്ഞാതഭക്തിരസമപ്രസരദ്വിവേക- മത്യംതഗർവമനധീതസമസ്തശാസ്ത്രമ് । അപ്രാപ്തസത്യമസമീപഗതം ച മുക്തേഃ കാമാക്ഷി നൈവ തവ സ്പൃഹയതി ദൃഷ്ടിപാതഃ ॥100॥
(കാമാക്ഷി മാമവതു തേ കരുണാകടാക്ഷഃ) പാതേന ലോചനരുചേസ്തവ കാമകോടി പോതേന പതകപയോധിഭയാതുരാണാമ് । പൂതേന തേന നവകാംചനകുംഡലാംശു- വീതേന ശീതലയ ഭൂധരകന്യകേ മാമ് ॥101॥
॥ ഇതി കടാക്ഷശതകം സംപൂര്ണമ് ॥
Browse Related Categories: