ನಾರಾಯಣೀಯಂ ದಶಕ 50 - ವತ್ಸಾಸುರ-ಬಕಾಸುರಯೋಃ ವಧಂ

ತರಲಮಧುಕೃತ್ ವೃಂದೇ ವೃಂದಾವನೇಽಥ ಮನೋಹರೇ ಪಶುಪಶಿಶುಭಿಃ ಸಾಕಂ ವತ್ಸಾನುಪಾಲನಲೋಲುಪಃ । ಹಲಧರಸಖೋ ದೇವ ಶ್ರೀಮನ್ ವಿಚೇರಿಥ ಧಾರಯನ್ ಗವಲಮುರಲೀವೇತ್ರಂ ನೇತ್ರಾಭಿರಾಮತನುದ್ಯುತಿಃ ॥1॥

ವಿಹಿತಜಗತೀರಕ್ಷಂ ಲಕ್ಷ್ಮೀಕರಾಂಬುಜಲಾಲಿತಂ ದದತಿ ಚರಣದ್ವಂದ್ವಂ ವೃಂದಾವನೇ ತ್ವಯಿ ಪಾವನೇ । ಕಿಮಿವ ನ ಬಭೌ ಸಂಪತ್ಸಂಪೂರಿತಂ ತರುವಲ್ಲರೀ- ಸಲಿಲಧರಣೀಗೋತ್ರಕ್ಷೇತ್ರಾದಿಕಂ ಕಮಲಾಪತೇ ॥2॥

ವಿಲಸದುಲಪೇ ಕಾಂತಾರಾಂತೇ ಸಮೀರಣಶೀತಲೇ ವಿಪುಲಯಮುನಾತೀರೇ ಗೋವರ್ಧನಾಚಲಮೂರ್ಧಸು । ಲಲಿತಮುರಲೀನಾದಃ ಸಂಚಾರಯನ್ ಖಲು ವಾತ್ಸಕಂ ಕ್ವಚನ ದಿವಸೇ ದೈತ್ಯಂ ವತ್ಸಾಕೃತಿಂ ತ್ವಮುದೈಕ್ಷಥಾಃ ॥3॥

ರಭಸವಿಲಸತ್ಪುಚ್ಛಂ ವಿಚ್ಛಾಯತೋಽಸ್ಯ ವಿಲೋಕಯನ್ ಕಿಮಪಿ ವಲಿತಸ್ಕಂಧಂ ರಂಧ್ರಪ್ರತೀಕ್ಷಮುದೀಕ್ಷಿತಮ್ । ತಮಥ ಚರಣೇ ಬಿಭ್ರದ್ವಿಭ್ರಾಮಯನ್ ಮುಹುರುಚ್ಚಕೈಃ ಕುಹಚನ ಮಹಾವೃಕ್ಷೇ ಚಿಕ್ಷೇಪಿಥ ಕ್ಷತಜೀವಿತಮ್ ॥4॥

ನಿಪತತಿ ಮಹಾದೈತ್ಯೇ ಜಾತ್ಯಾ ದುರಾತ್ಮನಿ ತತ್ಕ್ಷಣಂ ನಿಪತನಜವಕ್ಷುಣ್ಣಕ್ಷೋಣೀರುಹಕ್ಷತಕಾನನೇ । ದಿವಿ ಪರಿಮಿಲತ್ ವೃಂದಾ ವೃಂದಾರಕಾಃ ಕುಸುಮೋತ್ಕರೈಃ ಶಿರಸಿ ಭವತೋ ಹರ್ಷಾದ್ವರ್ಷಂತಿ ನಾಮ ತದಾ ಹರೇ ॥5॥

ಸುರಭಿಲತಮಾ ಮೂರ್ಧನ್ಯೂರ್ಧ್ವಂ ಕುತಃ ಕುಸುಮಾವಲೀ ನಿಪತತಿ ತವೇತ್ಯುಕ್ತೋ ಬಾಲೈಃ ಸಹೇಲಮುದೈರಯಃ । ಝಟಿತಿ ದನುಜಕ್ಷೇಪೇಣೋರ್ಧ್ವಂ ಗತಸ್ತರುಮಂಡಲಾತ್ ಕುಸುಮನಿಕರಃ ಸೋಽಯಂ ನೂನಂ ಸಮೇತಿ ಶನೈರಿತಿ ॥6॥

ಕ್ವಚನ ದಿವಸೇ ಭೂಯೋ ಭೂಯಸ್ತರೇ ಪರುಷಾತಪೇ ತಪನತನಯಾಪಾಥಃ ಪಾತುಂ ಗತಾ ಭವದಾದಯಃ । ಚಲಿತಗರುತಂ ಪ್ರೇಕ್ಷಾಮಾಸುರ್ಬಕಂ ಖಲು ವಿಸ್ಮ್ರೃತಂ ಕ್ಷಿತಿಧರಗರುಚ್ಛೇದೇ ಕೈಲಾಸಶೈಲಮಿವಾಪರಮ್ ॥7॥

ಪಿಬತಿ ಸಲಿಲಂ ಗೋಪವ್ರಾತೇ ಭವಂತಮಭಿದ್ರುತಃ ಸ ಕಿಲ ನಿಗಿಲನ್ನಗ್ನಿಪ್ರಖ್ಯಂ ಪುನರ್ದ್ರುತಮುದ್ವಮನ್ । ದಲಯಿತುಮಗಾತ್ತ್ರೋಟ್ಯಾಃ ಕೋಟ್ಯಾ ತದಾಽಽಶು ಭವಾನ್ ವಿಭೋ ಖಲಜನಭಿದಾಚುಂಚುಶ್ಚಂಚೂ ಪ್ರಗೃಹ್ಯ ದದಾರ ತಮ್ ॥8॥