Vishnu · Traditional devotional text · Source: vignanam.org (Traditional devotional text (public-domain shlokas))
അന്യാവതാരനികരേഷ്വനിരീക്ഷിതം തേ ഭൂമാതിരേകമഭിവീക്ഷ്യ തദാഘമോക്ഷേ । ബ്രഹ്മാ പരീക്ഷിതുമനാഃ സ പരോക്ഷഭാവം നിന്യേഽഥ വത്സകഗണാന് പ്രവിതത്യ മായാമ് ॥1॥
വത്സാനവീക്ഷ്യ വിവശേ പശുപോത്കരേ താ- നാനേതുകാമ ഇവ ധാതൃമതാനുവര്തീ । ത്വം സാമിഭുക്തകബലോ ഗതവാംസ്തദാനീം ഭുക്താംസ്തിരോഽധിത സരോജഭവഃ കുമാരാന് ॥2॥
Offered for worship and study, not as prediction. Non-commercial.
More devotional texts
വത്സായിതസ്തദനു ഗോപഗണായിതസ്ത്വം ശിക്യാദിഭാംഡമുരലീഗവലാദിരൂപഃ । പ്രാഗ്വദ്വിഹൃത്യ വിപിനേഷു ചിരായ സായം ത്വം മായയാഽഥ ബഹുധാ വ്രജമായയാഥ ॥3॥
ത്വാമേവ ശിക്യഗവലാദിമയം ദധാനോ ഭൂയസ്ത്വമേവ പശുവത്സകബാലരൂപഃ । ഗോരൂപിണീഭിരപി ഗോപവധൂമയീഭി- രാസാദിതോഽസി ജനനീഭിരതിപ്രഹര്ഷാത് ॥4॥
ജീവം ഹി കംചിദഭിമാനവശാത്സ്വകീയം മത്വാ തനൂജ ഇതി രാഗഭരം വഹംത്യഃ । ആത്മാനമേവ തു ഭവംതമവാപ്യ സൂനും പ്രീതിം യയുര്ന കിയതീം വനിതാശ്ച ഗാവഃ ॥5॥
ഏവം പ്രതിക്ഷണവിജൃംഭിതഹര്ഷഭാര- നിശ്ശേഷഗോപഗണലാലിതഭൂരിമൂര്തിമ് । ത്വാമഗ്രജോഽപി ബുബുധേ കില വത്സരാംതേ ബ്രഹ്മാത്മനോരപി മഹാന് യുവയോർവിശേഷഃ ॥6॥
വര്ഷാവധൌ നവപുരാതനവത്സപാലാന് ദൃഷ്ട്വാ വിവേകമസൃണേ ദ്രുഹിണേ വിമൂഢേ । പ്രാദീദൃശഃ പ്രതിനവാന് മകുടാംഗദാദി ഭൂഷാംശ്ചതുര്ഭുജയുജഃ സജലാംബുദാഭാന് ॥7॥
പ്രത്യേകമേവ കമലാപരിലാലിതാംഗാന് ഭോഗീംദ്രഭോഗശയനാന് നയനാഭിരാമാന് । ലീലാനിമീലിതദൃശഃ സനകാദിയോഗി- വ്യാസേവിതാന് കമലഭൂര്ഭവതോ ദദര്ശ ॥8॥
നാരായണാകൃതിമസംഖ്യതമാം നിരീക്ഷ്യ സർവത്ര സേവകമപി സ്വമവേക്ഷ്യ ധാതാ । മായാനിമഗ്നഹൃദയോ വിമുമോഹ യാവ- ദേകോ ബഭൂവിഥ തദാ കബലാര്ധപാണിഃ ॥9॥
നശ്യന്മദേ തദനു വിശ്വപതിം മുഹുസ്ത്വാം നത്വാ ച നൂതവതി ധാതരി ധാമ യാതേ । പോതൈഃ സമം പ്രമുദിതൈഃ പ്രവിശന് നികേതം വാതാലയാധിപ വിഭോ പരിപാഹി രോഗാത് ॥10॥
Browse Related Categories: