ನಾರಾಯಣೀಯಂ ದಶಕ 55 - ಕಾಲಿಯನರ್ತನಂ

അഥ വാരിണി ഘോരതരം ഫണിനം പ്രതിവാരയിതും കൃതധീര്ഭഗവന് । ദ്രുതമാരിഥ തീരഗനീപതരും വിഷമാരുതശോഷിതപര്ണചയമ് ॥1॥

അധിരുഹ്യ പദാംബുരുഹേണ ച തം നവപല്ലവതുല്യമനോജ്ഞരുചാ । ഹ്രദവാരിണി ദൂരതരം ന്യപതഃ പരിഘൂര്ണിതഘോരതരംഗ്ഗണേ ॥2॥

ഭുവനത്രയഭാരഭൃതോ ഭവതോ ഗുരുഭാരവികംപിവിജൃംഭിജലാ । പരിമജ്ജയതി സ്മ ധനുശ്ശതകം തടിനീ ഝടിതി സ്ഫുടഘോഷവതീ ॥3॥

അഥ ദിക്ഷു വിദിക്ഷു പരിക്ഷുഭിത- ഭ്രമിതോദരവാരിനിനാദഭരൈഃ । ഉദകാദുദഗാദുരഗാധിപതി- സ്ത്വദുപാംതമശാംതരുഷാഽംധമനാഃ ॥4॥

ഫണശൃംഗസഹസ്രവിനിസ്സൃമര- ജ്വലദഗ്നികണോഗ്രവിഷാംബുധരമ് । പുരതഃ ഫണിനം സമലോകയഥാ ബഹുശൃംഗിണമംജനശൈലമിവ ॥5॥

ജ്വലദക്ഷി പരിക്ഷരദുഗ്രവിഷ- ശ്വസനോഷ്മഭരഃ സ മഹാഭുജഗഃ । പരിദശ്യ ഭവംതമനംതബലം സമവേഷ്ടയദസ്ഫുടചേഷ്ടമഹോ ॥6॥

അവിലോക്യ ഭവംതമഥാകുലിതേ തടഗാമിനി ബാലകധേനുഗണേ । വ്രജഗേഹതലേഽപ്യനിമിത്തശതം സമുദീക്ഷ്യ ഗതാ യമുനാം പശുപാഃ ॥7॥

അഖിലേഷു വിഭോ ഭവദീയ ദശാ- മവലോക്യ ജിഹാസുഷു ജീവഭരമ് । ഫണിബംധനമാശു വിമുച്യ ജവാ- ദുദഗമ്യത ഹാസജുഷാ ഭവതാ ॥8॥