Vishnu · Traditional devotional text · Source: vignanam.org (Traditional devotional text (public-domain shlokas))
madanāturachētasō'nvahaṃ bhavadaṅghridvayadāsyakāmyayā । yamunātaṭasīmni saikatīṃ taralākṣyō girijāṃ samārchichan ॥1॥
tava nāmakathāratāḥ samaṃ sudṛśaḥ prātarupāgatā nadīm । upahāraśatairapūjayan dayitō nandasutō bhavēditi ॥2॥
iti māsamupāhitavratāstaralākṣīrabhivīkṣya tā bhavān । karuṇāmṛdulō nadītaṭaṃ samayāsīttadanugrahēchChayā ॥3॥
niyamāvasitau nijāmbaraṃ taṭasīmanyavamuchya tāstadā । yamunājalakhēlanākulāḥ puratastvāmavalōkya lajjitāḥ ॥4॥
trapayā namitānanāsvathō vanitāsvambarajālamantikē । nihitaṃ parigṛhya bhūruhō viṭapaṃ tvaṃ tarasā'dhirūḍhavān ॥5॥
iha tāvadupētya nīyatāṃ vasanaṃ vaḥ sudṛśō yathāyatham । iti narmamṛdusmitē tvayi bruvati vyāmumuhē vadhūjanaiḥ ॥6॥
ayi jīva chiraṃ kiśōra nastava dāsīravaśīkarōṣi kim । pradiśāmbaramambujēkṣaṇētyuditastvaṃ smitamēva dattavān ॥7॥
adhiruhya taṭaṃ kṛtāñjalīḥ pariśuddhāḥ svagatīrnirīkṣya tāḥ । vasanānyakhilānyanugrahaṃ punarēvaṃ giramapyadā mudā ॥8॥
Offered for worship and study, not as prediction. Non-commercial.
More devotional texts
viditaṃ nanu vō manīṣitaṃ vaditārastviha yōgyamuttaram । yamunāpulinē sachandrikāḥ kṣaṇadā ityabalāstvamūchivān ॥9॥
upakarṇya bhavanmukhachyutaṃ madhuniṣyandi vachō mṛgīdṛśaḥ । praṇayādayi vīkṣya vīkṣya tē vadanābjaṃ śanakairgṛhaṃ gatāḥ ॥10॥
iti nanvanugṛhya vallavīrvipināntēṣu purēva sañcharan । karuṇāśiśirō harē hara tvarayā mē sakalāmayāvalim ॥11॥
Browse Related Categories: