Vishnu · Traditional devotional text · Source: vignanam.org (Traditional devotional text (public-domain shlokas))
atha nakhastutiḥ pāntvasmān puruhūtavairibalavanmātaṅgamādyadghaṭā- -kumbhōchchādrivipāṭanādhikapaṭu pratyēka vajrāyitāḥ । śrīmatkaṇṭhīravāsyapratatasunakharā dāritārātidūra- -pradhvastadhvāntaśāntapravitatamanasā bhāvitā bhūribhāgaiḥ ॥ 1 ॥
lakṣmīkānta samantatō'pi kalayan naivēśitustē samaṃ paśyāmyuttamavastu dūrataratōpāstaṃ rasō yō'ṣṭamaḥ । yadrōṣōtkara dakṣa nētra kuṭila prāntōtthitāgni sphurat khadyōtōpama visphuliṅgabhasitā brahmēśaśakrōtkarāḥ ॥ 2 ॥
atha vāyustutiḥ śrīmadviṣṇvaṅghriniṣṭhātiguṇagurutamaśrīmadānandatīrtha- -trailōkyāchāryapādōjjvalajalajalasatpāṃsavō'smān punantu । vāchāṃ yatra praṇētrī tribhuvanamahitā śāradā śāradēndu- -jyōtsnābhadrasmitaśrīdhavaḻitakakubhā prēmabhāraṃ babhāra ॥ 1 ॥
utkaṇṭhākuṇṭhakōlāhalajavavijitājasrasēvānuvṛddha- -prājñātmajñānadhūtāndhatamasasumanōmauliratnāvaḻīnām । bhaktyudrēkāvagāḍhapraghaṭanasadhaṭātkārasaṅghṛṣyamāṇa- prāntaprāgryāṅghripīṭhōtthitakanakarajaḥpiñjarārañjitāśāḥ ॥ 2 ॥
janmādhivyādhyupādhipratihativirahaprāpakāṇāṃ guṇānāṃ agryāṇāmarpakāṇāṃ chiramuditachidānandasandōhadānām । ētēṣāmēṣa dōṣapramuṣitamanasāṃ dvēṣiṇāṃ dūṣakāṇāṃ daityānāmārtimandhē tamasi vidadhatāṃ saṃstavē nāsmi śaktaḥ ॥ 3 ॥
asyāviṣkartukāmaṃ kalimalakaluṣē'smin janē jñānamārgaṃ vandyaṃ chandrēndrarudradyumaṇiphaṇivayōnāyakādyairihādya । madhvākhyaṃ mantrasiddhaṃ kimuta kṛtavatō mārutasyāvatāraṃ pātāraṃ pāramēṣṭyaṃ padamapavipadaḥ prāpturāpannapuṃsām ॥ 4 ॥
Offered for worship and study, not as prediction. Non-commercial.
More devotional texts
udyadvidyutprachaṇḍāṃ nijaruchinikaravyāptalōkāvakāśō bibhradbhīmō bhujē yō'bhyuditadinakarābhāṅgadāḍhya prakāṇḍē । vīryōddhāryāṃ gadāgryāmayamiha sumatiṃ vāyudēvō vidadhyāt adhyātmajñānanētā yativaramahitō bhūmibhūṣāmaṇirmē ॥ 5 ॥
saṃsārōttāpanityōpaśamadasadayasnēhahāsāmbupūra- -prōdyadvidyānavadyadyutimaṇikiraṇaśrēṇisampūritāśaḥ । śrīvatsāṅkādhivāsōchitatarasaraḻaśrīmadānandatīrtha- -kṣīrāmbhōdhirvibhindyādbhavadanabhimataṃ bhūri mē bhūtihētuḥ ॥ 6 ॥
mūrdhanyēṣō'ñjalirmē dṛḍhataramiha tē badhyatē bandhapāśa- -chChētrē dātrē sukhānāṃ bhajati bhuvi bhaviṣyadvidhātrē dyubhartrē । atyantaṃ santataṃ tvaṃ pradiśa padayugē hanta santāpabhājā- -masmākaṃ bhaktimēkāṃ bhagavata uta tē mādhavasyātha vāyōḥ ॥ 7 ॥
sābhrōṣṇābhīśuśubhraprabhamabhaya nabhō bhūribhūbhṛdvibhūti- -bhrājiṣṇurbhūrṛbhūṇāṃ bhavanamapi vibhō'bhēdi babhrē babhūvē । yēna bhrūvibhramastē bhramayatu subhṛśaṃ babhruvaddurbhṛtāśān bhrāntirbhēdāvabhāsastviti bhayamabhibhūrbhōkṣyatō māyibhikṣūn ॥ 8 ॥
yē'muṃ bhāvaṃ bhajantē suramukhasujanārādhitaṃ tē tṛtīyaṃ bhāsantē bhāsuraistē sahacharachalitaiśchāmaraiśchāruvēṣāḥ । vaikuṇṭhē kaṇṭhalagnasthiraśuchivilasatkāntitāruṇyalīlā- lāvaṇyāpūrṇakāntākuchabharasulabhāślēṣasammōdasāndrāḥ ॥ 9 ॥
ānandānmandamandā dadati hi marutaḥ kundamandāranandyā- -vartāmōdān dadhānā mṛdupadamuditōdgītakaiḥ sundarīṇām । vṛndairāvandyamuktēndvahimagumadanāhīndradēvēndrasēvyē maukundē mandirē'sminnaviratamudayanmōdināṃ dēvadēva ॥ 10 ॥
uttaptā'tyutkaṭatviṭ prakaṭakaṭakaṭadhvānasaṅghaṭṭanōdya- -dvidyudvyūḍhasphuliṅgaprakaravikiraṇōtkvāthitē bādhitāṅgān । udgāḍhaṃ pātyamānā tamasi tata itaḥ kiṅkaraiḥ paṅkilē tē paṅktirgrāvṇāṃ garimṇā glapayati hi bhavadvēṣiṇō vidvadādya ॥ 11 ॥
asminnasmadgurūṇāṃ haricharaṇachiradhyānasanmaṅgalānāṃ yuṣmākaṃ pārśvabhūmiṃ dhṛtaraṇaraṇikasvargisēvyāṃ prapannaḥ । yastūdāstē sa āstē'dhibhavamasulabhaklēśanirmūkamasta- -prāyānandaṃ kathañchinna vasati satataṃ pañchakaṣṭē'tikaṣṭē ॥ 12 ॥
kṣut kṣāmān rūkṣarakṣōradakharanakharakṣuṇṇavikṣōbhitākṣā- -nāmagnānāndhakūpē kṣuramukhamukharaiḥ pakṣibhirvikṣatāṅgān । pūyāsṛṅmūtraviṣṭhākṛmikulakalilē tatkṣaṇakṣiptaśaktyā- -dyastravrātārditāṃstvaddviṣa upajihatē vajrakalpā jalūkāḥ ॥ 13 ॥
mātarmē mātariśvan pitaratulagurō bhrātariṣṭāptabandhō svāmin sarvāntarātmannajara jarayitarjanmamṛtyāmayānām । gōvindē dēhi bhaktiṃ bhavati cha bhagavannūrjitāṃ nirnimittāṃ nirvyājāṃ niśchalāṃ sadguṇagaṇabṛhatīṃ śāśvatīmāśu dēva ॥ 14 ॥
viṣṇōrattyuttamatvādakhilaguṇagaṇaistatra bhaktiṃ gariṣṭhāṃ āśliṣṭē śrīdharābhyāmamumatha parivārātmanā sēvakēṣu । yaḥ sandhattē viriñchaśvasanavihagapānantarudrēndrapūrvē- -ṣvādhyāyaṃstāratamyaṃ sphuṭamavati sadā vāyurasmadgurustam ॥ 15 ॥
tattvajñān muktibhājaḥ sukhayisi hi gurō yōgyatātāratamyā- -dādhatsē miśrabuddhiṃstridivanirayabhūgōcharān nityabaddhān । tāmisrāndhādikākhyē tamasi subahulaṃ duḥkhayasyanyathājñān viṣṇōrājñābhiritthaṃ śṛtiśatamitihāsādi chākarṇayāmaḥ ॥ 16 ॥
vandē'haṃ taṃ hanūmāniti mahitamahāpauruṣō bāhuśālī khyātastē'gryō'vatāraḥ sahita iha bahubrahmacharyādidharmaiḥ । sasnēhānāṃ sahasvānaharaharahitaṃ nirdahan dēhabhājāṃ aṃhōmōhāpahō yaḥ spṛhayati mahatīṃ bhaktimadyāpi rāmē ॥ 17 ॥
prākpañchāśatsahasrairvyavahitamahitaṃ yōjanaiḥ parvataṃ tvaṃ yāvatsañjīvanādyauṣadhanidhimadhikaprāṇa laṅkāmanaiṣiḥ । adrākṣīdutpatantaṃ tata uta girimutpāṭayantaṃ gṛhītvā yāntaṃ khē rāghavāṅghrau praṇatamapi tadaikakṣaṇē tvāṃ hi lōkaḥ ॥ 18 ॥
kṣiptaḥ paśchātsatsalīlaṃ śatamatulamatē yōjanānāṃ sa uchcha- -stāvadvistāravaṃśchāpyupalalava iva vyagrabuddhyā tvayā'taḥ । svasvasthānasthitātisthiraśakalaśilājālasaṃślēṣanaṣṭa- -ChChēdāṅkaḥ prāgivābhūt kapivaravapuṣastē namaḥ kauśalāya ॥ 19 ॥
dṛṣṭvā duṣṭādhipōraḥ sphuṭitakanakasadvarma ghṛṣṭāsthikūṭaṃ niṣpiṣṭaṃ hāṭakādriprakaṭataṭataṭākātiśaṅkō janō'bhūt । yēnā'jau rāvaṇāripriyanaṭanapaṭurmuṣṭiriṣṭaṃ pradēṣṭuṃ kiṃ nēṣṭē mē sa tē'ṣṭāpadakaṭakataṭitkōṭibhāmṛṣṭakāṣṭhaḥ ॥ 20 ॥
dēvyādēśapraṇītidṛhiṇaharavarāvadhyarakṣōvighātā- -dyāsēvōdyaddayārdraḥ sahabhujamakarōdrāmanāmā mukundaḥ । duṣprāpē pāramēṣṭhyē karatalamatulaṃ mūrdhivinyasya dhanyaṃ tanvanbhūyaḥ prabhūtapraṇayavikasitābjēkṣaṇastvēkṣamāṇaḥ ॥ 21 ॥
jaghnē nighnēna vighnō bahulabalabakadhvaṃsanādyēna śōcha- -dviprānukrōśapāśairasuvidhṛtisukhasyaikachakrājanānām । tasmai tē dēva kurmaḥ kurukulapatayē karmaṇā cha praṇāmān kirmīraṃ durmatīnāṃ prathamamatha cha yō narmaṇā nirmamātha ॥ 22 ॥
nirmṛdnannatyayatnaṃ vijaravara jarāsandhakāyāsthisandhīn yuddhē tvaṃ svadhvarē vā paśumiva damayan viṣṇupakṣadviḍīśam । yāvatpratyakṣabhūtaṃ nikhilamakhabhujaṃ tarpayāmāsithāsau tāvatyā'yōji tṛptyā kimu vada bhagavan rājasūyāśvamēdhē ॥ 23 ॥
kṣvēlākṣīṇāṭṭahāsaṃ tava raṇamarihannudgadōddāmabāhōḥ bahvakṣauhiṇyanīkakṣapaṇasunipuṇaṃ yasya sarvōttamasya । śuśrūṣārthaṃ chakartha svayamayamatha saṃvaktumānandatīrtha- -śrīmannāmansamarthastvamapi hi yuvayōḥ pādapadmaṃ prapadyē ॥ 24 ॥
dṛhyantīṃ hṛdṛhaṃ māṃ dṛtamanila balāddrāvayantīmavidyā- -nidrāṃ vidrāvya sadyōrachanapaṭumathā'pādya vidyāsamudra । vāgdēvī sā suvidyādraviṇada viditā draupadī rudrapatnyā- -dudriktā drāgabhadrādrahayatu dayitā pūrvabhīmā'jñayā tē ॥ 25 ॥
yābhyāṃ śuśrūṣurāsīḥ kurukulajananē kṣatraviprōditābhyāṃ brahmabhyāṃ bṛṃhitābhyāṃ chitasukhavapuṣā kṛṣṇanāmāspadābhyām । nirbhēdābhyāṃ viśēṣādvivachanaviṣayābhyāmamūbhyāmubhābhyāṃ tubhyaṃ cha kṣēmadēbhyaḥ sarisijavilasallōchanēbhyō namō'stu ॥ 26 ॥
gachChan saugandhikārthaṃ pathi sa hanumataḥ puchChamachChasya bhīmaḥ prōddhartuṃ nāśakatsa tvamumuruvapuṣā bhīṣayāmāsa chēti । pūrṇajñānaujasōstē gurutama vapuṣōḥ śrīmadānandatīrtha krīḍāmātraṃ tadētat pramadada sudhiyāṃ mōhaka dvēṣabhājām ॥ 27 ॥
bahvīḥ kōṭīraṭīkaḥ kuṭalakaṭumatīnutkaṭāṭōpakōpān drākcha tvaṃ satvaratvāchcharaṇada gadayā pōthayāmāsithārīn । unmathyātathyamithyātvavachanavachanānutpathasthāṃstathā'nyān prāyachChaḥ svapriyāyai priyatamakusumaṃ prāṇa tasmai namastē ॥ 28 ॥
dēhādutkrāmitānāmadhipatirasatāmakramādvakrabuddhiḥ kruddhaḥ krōdhaikavaśyaḥ krimiriva maṇimān duṣkṛtī niṣkriyārtham । chakrē bhūchakramētya krakachamiva satāṃ chētasaḥ kaṣṭaśāstraṃ dustarkaṃ chakrapāṇērguṇagaṇavirahaṃ jīvatāṃ chādhikṛtya ॥ 29 ॥
tadduṣprēkṣānusārātkatipayakunarairādṛtō'nyairvisṛṣṭō brahmā'haṃ nirguṇō'haṃ vitathamidamiti hyēṣa pāṣaṇḍavādaḥ । tadyuktyābhāsajālaprasaraviṣatarūddāhadakṣapramāṇa- -jvālāmālādharāgniḥ pavana vijayatē tē'vatārastṛtīyaḥ ॥ 30 ॥
ākrōśantō nirāśā bhayabharavivaśasvāśayāśChinnadarpā vāśantō dēśanāśasviti bata kudhiyāṃ nāśamāśādaśā'śu । dhāvantō'ślīlaśīlā vitathaśapathaśāpāśivāḥ śāntaśauryā- -stvadvyākhyāsiṃhanādē sapadi dadṛśirē māyigōmāyavastē ॥ 31 ॥
triṣvapyēvāvatārēṣvaribhirapaghṛṇaṃ hiṃsitō nirvikāraḥ sarvajñaḥ sarvaśaktiḥ sakalaguṇagaṇāpūrṇarūpapragalbhaḥ । svachChaḥ svachChandamṛtyuḥ sukhayasi sujanaṃ dēva kiṃ chitramatra trātā yasya tridhāmā jagaduta vaśagaṃ kiṅkarāḥ śaṅkarādyāḥ ॥ 32 ॥
udyanmandasmitaśrīmṛdu madhumadhurālāpapīyūṣadhārā- -pūrāsēkōpaśāntāsukhasujanamanōlōchanāpīyamānam । sandrakṣyē sundaraṃ sanduhadiha mahadānandamānandatīrtha śrīmadvaktrēndubimbaṃ duratanududitaṃ nityadā'haṃ kadā nu ॥ 33 ॥
prāchīnāchīrṇapuṇyōchchayachaturatarāchārataśchāruchittā- -natyuchchāṃ rōchayantīṃ śrutichitavachanāṃ śrāvakāṃśchōdyachuñchūn । vyākhyāmutkhātaduḥkhāṃ chiramuchitamahāchārya chintāratāṃstē chitrāṃ sachChāstrakartāścharaṇaparicharāñChrāvayāsmāṃścha kiñchit ॥ 34 ॥
pīṭhē ratnōkapaklṛptē ruchiraruchimaṇijyōtiṣā sanniṣaṇṇaṃ brahmāṇaṃ bhāvinaṃ tvāṃ jvalati nijapadē vaidikādyā hi vidyāḥ । sēvantē mūrtimatyaḥ sucharita charitaṃ bhāti gandharva gītaṃ pratyēkaṃ dēvasaṃsatsvapi tava bhagavannartitadyōvadhūṣu ॥ 35 ॥
sānukrōśairajasraṃ janimṛtinirayādyūrmimālāvilē'smin saṃsārābdhau nimagnān śaraṇamaśaraṇānichChatō vīkṣya jantūn । yuṣmābhiḥ prārthitaḥ san jalanidhiśayanaḥ satyavatyāṃ maharṣē- -rvyaktaśchinmātramūrtirna khalu bhagavataḥ prākṛtō jātu dēhaḥ ॥ 36 ॥
astavyastaṃ samastaśrutigatamadhamai ratnapūgaṃ yathā'ndhai- -rarthaṃ lōkōpakṛtyai guṇagaṇanilayaḥ sūtrayāmāsa kṛtsnam । yō'sau vyāsābhidhānastamahamaharaharbhaktitastvatprasādāt sadyō vidyōpalabdhyai gurutamamaguruṃ dēvadēvaṃ namāmi ॥ 37 ॥
ājñāmanyairadhāryāṃ śirasi parisaradraśmikōṭīrakōṭau kṛṣṇasyākliṣṭakarmā dadhadanusarāṇādarthitō dēvasaṅghaiḥ । bhūmāvāgatya bhūmannasukaramakarōrbrahmasūtrasya bhāṣyaṃ durbhāṣyaṃ vyasya dasyōrmaṇimata uditaṃ vēdasadyuktibhistvam ॥ 38 ॥
bhūtvā kṣētrē viśuddhē dvijagaṇanilayē raupyapīṭhābhidhānē tatrāpi brahmajātistribhuvanaviśadē madhyagēhākhyagēhē । pārivrājyādhirājaḥ punarapi badarīṃ prāpya kṛṣṇaṃ cha natvā kṛtvā bhāṣyāṇi samyag vyatanuta cha bhavān bhāratārthaprakāśam ॥ 39 ॥
vandē taṃ tvāṃ supūrṇapramatimanudināsēvitaṃ dēvavṛndaiḥ vandē vandārumīśē śriya uta niyataṃ śrīmadānandatīrtham । vandē mandākinīsatsaridamalajalāsēkasādhikyasaṅgaṃ vandē'haṃ dēva bhaktyā bhavabhayadahanaṃ sajjanānmōdayantam ॥ 40 ॥
subrahmaṇyākhyasūrēḥ suta iti subhṛśaṃ kēśavānandatīrtha- śrīmatpādābjabhaktaḥ stutimakṛta harērvāyudēvasya chāsya । tatpādārchādarēṇa grathitapadalasanmālayā tvētayā yē saṃrādhyāmū namanti pratatamatiguṇā muktimētē vrajanti ॥ 41 ॥
atha śrīnakhastutiḥ pāntvasmān puruhūtavairibalavanmātaṅgamādyadghaṭā kumbhōchchādrivipāṭanādhikapaṭupratyēkavajrāyitāḥ । śrīmatkaṇṭhīravāsya pratata sunakharā dāritārātidūra- pradhvastadhvāntaśāntapravitatamanasā bhāvitā nākivṛndaiḥ ॥ 1 ॥
lakṣmīkānta samantatō'vikalayan naivēśitustē samaṃ paśyāmyuttamavastu dūrataratō'pāstaṃ rasō yō'ṣṭamaḥ । yadrōṣōtkaradakṣanētrakuṭilaprāntōtthitāgnisphurat khadyōtōpamavisphuliṅgabhasitā brahmēśaśakrōtkarāḥ ॥ 2 ॥
iti śrītrivikramapaṇḍitāchārya virachitā vāyustutiḥ samāptā ॥
Browse Related Categories: