കാമസികാഷ്ടകമ്

ശ്രുതീനാമുത്തരം ഭാഗം വേഗവത്യാശ്ച ദക്ഷിണമ് । കാമാദധിവസന് ജീയാത് കശ്ചിദദ്ഭുത കേസരീ ॥ 1 ॥

തപനേംദ്വഗ്നിനയനഃ താപാനപചിനോതു നഃ । താപനീയരഹസ്യാനാം സാരഃ കാമാസികാ ഹരിഃ ॥ 2 ॥

ആകംഠമാദിപുരുഷം കംഠീരവമുപരി കുംഠിതാരാതിമ് । വേഗോപകംഠസംഗാത് വിമുക്തവൈകുംഠബഹുമതിമുപാസേ ॥ 3 ॥

ബംധുമഖിലസ്യ ജംതോഃ ബംധുരപര്യംകബംധരമണീയമ് । വിഷമവിലോചനമീഡേ വേഗവതീപുളിനകേളിനരസിംഹമ് ॥ 4 ॥

സ്വസ്ഥാനേഷു മരുദ്ഗണാന് നിയമയന് സ്വാധീനസർവേംദ്രിയഃ പര്യംകസ്ഥിരധാരണാ പ്രകടിതപ്രത്യങ്മുഖാവസ്ഥിതിഃ । പ്രായേണ പ്രണിപേദുഷഃ പ്രഭുരസൌ യോഗം നിജം ശിക്ഷയന് കാമാനാതനുതാദശേഷജഗതാം കാമാസികാ കേസരീ ॥ 5 ॥

വികസ്വരനഖസ്വരുക്ഷതഹിരണ്യവക്ഷഃസ്ഥലീ- -നിരര്ഗലവിനിര്ഗലദ്രുധിരസിംധുസംധ്യായിതാഃ । അവംതു മദനാസികാമനുജപംചവക്ത്രസ്യ മാം അഹംപ്രഥമികാമിഥഃ പ്രകടിതാഹവാ ബാഹവഃ ॥ 6 ॥

സടാപടലഭീഷണേ സരഭസാട്ടഹാസോദ്ഭടേ സ്ഫുരത് ക്രുധിപരിസ്ഫുട ഭ്രുകുടികേഽപി വക്ത്രേ കൃതേ । കൃപാകപടകേസരിന് ദനുജഡിംഭദത്തസ്തനാ സരോജസദൃശാ ദൃശാ വ്യതിവിഷജ്യ തേ വ്യജ്യതേ ॥ 7 ॥

ത്വയി രക്ഷതി രക്ഷകൈഃ കിമന്യൈ- -സ്ത്വയി ചാരക്ഷതി രക്ഷകൈഃ കിമന്യൈഃ । ഇതി നിശ്ചിതധീഃ ശ്രയാമി നിത്യം നൃഹരേ വേഗവതീതടാശ്രയം ത്വാമ് ॥ 8 ॥