கீ³தகோ³விந்த³ம் த்³விதீய: ஸர்க:³ - அக்லேஶ கேஶவ:

॥ గీతం 5 ॥

సంచరదధరసుధామధురధ్వనిముఖరితమోహనవంశమ్ । చలితదృగంచలచంచలమౌలికపోలవిలోలవతంసమ్ ॥ రాసే హరిమిహ విహితవిలాసం స్మరతి మనో మమ కృతపరిహాసమ్ ॥ 1 ॥

చంద్రకచారుమయూరశిఖండకమండలవలయితకేశమ్ । ప్రచురపురందరధనురనురంజితమేదురముదిరసువేశమ్ ॥ 2 ॥

గోపకదంబనితంబవతీముఖచుంబనలంభితలోభమ్ । బంధుజీవమధురాధరపల్లవముల్లసితస్మితశోభమ్ ॥ 3 ॥

విపులపులకభుజపల్లవవలయితవల్లవయువతిసహస్రమ్ । కరచరణోరసి మణిగణభూషణకిరణవిభిన్నతమిస్రమ్ ॥ 4 ॥

జలదపటలవలదిందువినందకచందనతిలకలలాటమ్ । పీనపయోధరపరిసరమర్దననిర్దయహృదయకవాటమ్ ॥ 5 ॥

మణిమయమకరమనోహరకుండలమండితగండముదారమ్ । పీతవసనమనుగతమునిమనుజసురాసురవరపరివారమ్ ॥ 6 ॥

విశదకదంబతలే మిలితం కలికలుషభయం శమయంతమ్ । మామపి కిమపి తరంగదనంగదృశా మనసా రమయంతమ్ ॥ 7 ॥

శ్రీజయదేవభణితమతిసుందరమోహనమధురిపురూపమ్ । హరిచరణస్మరణం ప్రతి సంప్రతి పుణ్యవతామనురూపమ్ ॥ 8 ॥

గణయతి గుణగ్రామం భామం భ్రమాదపి నేహతే వహతి చ పరితోషం దోషం విముంచతి దూరతః । యువతిషు వలస్తృష్ణే కృష్ణే విహారిణి మాం వినా పునరపి మనో వామం కామం కరోతి కరోమి కిమ్ ॥ 15 ॥

॥ గీతం 6 ॥

నిభృతనికుంజగృహం గతయా నిశి రహసి నిలీయ వసంతమ్ । చకితవిలోకితసకలదిశా రతిరభసరసేన హసంతమ్ ॥ సఖి హే కేశిమథనముదారం రమయ మయా సహ మదనమనోరథభావితయా సవికారమ్ ॥ 1 ॥

ప్రథమసమాగమలజ్జితయా పటుచాటుశతైరనుకూలమ్ । మృదుమధురస్మితభాషితయా శిథిలీకృతజఘనదుకూలమ్ ॥ 2 ॥

కిసలయశయననివేశితయా చిరమురసి మమైవ శయానమ్ । కృతపరిరంభణచుంబనయా పరిరభ్య కృతాధరపానమ్ ॥ 3 ॥

అలసనిమీలితలోచనయా పులకావలిలలితకపోలమ్ । శ్రమజలసకలకలేవరయా వరమదనమదాదతిలోలమ్ ॥ 4 ॥

కోకిలకలరవకూజితయా జితమనసిజతంత్రవిచారమ్ । శ్లథకుసుమాకులకుంతలయా నఖలిఖితఘనస్తనభారమ్ ॥ 5 ॥

చరణరణితమనినూపురయా పరిపూరితసురతవితానమ్ । ముఖరవిశృంఖలమేఖలయా సకచగ్రహచుంబనదానమ్ ॥ 6 ॥

రతిసుఖసమయరసాలసయా దరముకులితనయనసరోజమ్ । నిఃసహనిపతితతనులతయా మధుసూదనముదితమనోజమ్ ॥ 7 ॥

శ్రీజయదేవభణితమిదమతిశయమధురిపునిధువనశీలమ్ । సుఖముత్కంఠితగోపవధూకథితం వితనోతు సలీలమ్ ॥ 8 ॥

హస్తస్రస్తవిలాసవంశమనృజుభ్రూవల్లిమద్బల్లవీ-వృందోత్సారిదృగంతవీక్షితమతిస్వేదార్ద్రగండస్థలమ్ । మాముద్వీక్ష్య విలక్షితం స్మితసుధాముగ్ధాననం కాననే గోవిందం వ్రజసుందరీగణవృతం పశ్యామి హృష్యామి చ ॥ 16 ॥

దురాలోకస్తోకస్తబకనవకాశోకలతికా-వికాసః కాసారోపవనపవనోఽపి వ్యథయతి । అపి భ్రామ్యద్భృంగీరణితరమణీయా న ముకుల-ప్రసూతిశ్చూతానాం సఖి శిఖరిణీయం సుఖయతి ॥ 17 ॥

॥ ఇతి గీతగోవిందే అక్లేశకేశవో నామ ద్వితీయః సర్గః ॥

Browse Related Categories: