Kavacha Stotras · Traditional devotional text · Source: vignanam.org (Traditional devotional text (public-domain shlokas))
nṛsiṃhakavachaṃ vakṣyē prahlādēnōditaṃ purā । sarvarakṣākaraṃ puṇyaṃ sarvōpadravanāśanam ॥ 1 ॥
sarvasampatkaraṃ chaiva svargamōkṣapradāyakam । dhyātvā nṛsiṃhaṃ dēvēśaṃ hēmasiṃhāsanasthitam ॥ 2 ॥
vivṛtāsyaṃ trinayanaṃ śaradindusamaprabham । lakṣmyāliṅgitavāmāṅgaṃ vibhūtibhirupāśritam ॥ 3 ॥
chaturbhujaṃ kōmalāṅgaṃ svarṇakuṇḍalaśōbhitam । sarōjaśōbhitōraskaṃ ratnakēyūramudritam ॥ 4 ॥ [ratnakēyūraśōbhitam]
taptakāñchanasaṅkāśaṃ pītanirmalavāsanam । indrādisuramauḻisthasphuranmāṇikyadīptibhiḥ ॥ 5 ॥
virājitapadadvandvaṃ śaṅkhachakrādihētibhiḥ । garutmatā savinayaṃ stūyamānaṃ mudānvitam ॥ 6 ॥
svahṛtkamalasaṃvāsaṃ kṛtvā tu kavachaṃ paṭhēt । nṛsiṃhō mē śiraḥ pātu lōkarakṣātmasambhavaḥ ॥ 7 ॥
sarvagō'pi stambhavāsaḥ phālaṃ mē rakṣatu dhvanim । nṛsiṃhō mē dṛśau pātu sōmasūryāgnilōchanaḥ ॥ 8 ॥
smṛtiṃ mē pātu nṛharirmunivaryastutipriyaḥ । nāsāṃ mē siṃhanāsastu mukhaṃ lakṣmīmukhapriyaḥ ॥ 9 ॥
Offered for worship and study, not as prediction. Non-commercial.
sarvavidyādhipaḥ pātu nṛsiṃhō rasanāṃ mama । vaktraṃ pātvinduvadanaḥ sadā prahlādavanditaḥ ॥ 10 ॥
nṛsiṃhaḥ pātu mē kaṇṭhaṃ skandhau bhūbharaṇāntakṛt । divyāstraśōbhitabhujō nṛsiṃhaḥ pātu mē bhujau ॥ 11 ॥
karau mē dēvavaradō nṛsiṃhaḥ pātu sarvataḥ । hṛdayaṃ yōgisādhyaścha nivāsaṃ pātu mē hariḥ ॥ 12 ॥
madhyaṃ pātu hiraṇyākṣavakṣaḥkukṣividāraṇaḥ । nābhiṃ mē pātu nṛhariḥ svanābhi brahmasaṃstutaḥ ॥ 13 ॥
brahmāṇḍakōṭayaḥ kaṭyāṃ yasyāsau pātu mē kaṭim । guhyaṃ mē pātu guhyānāṃ mantrāṇāṃ guhyarūpadhṛk ॥ 14 ॥
ūrū manōbhavaḥ pātu jānunī nararūpadhṛk । jaṅghē pātu dharābhārahartā yō'sau nṛkēsarī ॥ 15 ॥
surarājyapradaḥ pātu pādau mē nṛharīśvaraḥ । sahasraśīrṣā puruṣaḥ pātu mē sarvaśastanum ॥ 16 ॥
mahōgraḥ pūrvataḥ pātu mahāvīrāgrajō'gnitaḥ । mahāviṣṇurdakṣiṇē tu mahājvālastu nairṛtau ॥ 17 ॥
paśchimē pātu sarvēśō diśi mē sarvatōmukhaḥ । nṛsiṃhaḥ pātu vāyavyāṃ saumyāṃ bhūṣaṇavigrahaḥ ॥ 18 ॥
īśānyāṃ pātu bhadrō mē sarvamaṅgaḻadāyakaḥ । saṃsārabhayadaḥ pātu mṛtyōrmṛtyurnṛkēsarī ॥ 19 ॥
idaṃ nṛsiṃhakavachaṃ prahlādamukhamaṇḍitam । bhaktimānyaḥ paṭhēnnityaṃ sarvapāpaiḥ pramuchyatē ॥ 20 ॥
putravān dhanavān lōkē dīrghāyurupajāyatē । yaṃ yaṃ kāmayatē kāmaṃ taṃ taṃ prāpnōtyasaṃśayam ॥ 21 ॥
sarvatra jayamāpnōti sarvatra vijayī bhavēt । bhūmyantarikṣadivyānāṃ grahāṇāṃ vinivāraṇam ॥ 22 ॥
vṛśchikōragasambhūtaviṣāpaharaṇaṃ param । brahmarākṣasayakṣāṇāṃ dūrōtsāraṇakāraṇam ॥ 23 ॥
bhūrjē vā tāḻapatrē vā kavachaṃ likhitaṃ śubham । karamūlē dhṛtaṃ yēna sidhyēyuḥ karmasiddhayaḥ ॥ 24 ॥
dēvāsuramanuṣyēṣu svaṃ svamēva jayaṃ labhēt । ēkasandhyaṃ trisandhyaṃ vā yaḥ paṭhēnniyatō naraḥ ॥ 25 ॥
sarvamaṅgaḻamāṅgaḻyaṃ bhuktiṃ muktiṃ cha vindati । dvātriṃśatisahasrāṇi paṭhēchChuddhātmanāṃ nṛṇām ॥ 26 ॥
kavachasyāsya mantrasya mantrasiddhiḥ prajāyatē । anēna mantrarājēna kṛtvā bhasmābhimantraṇam ॥ 27 ॥
tilakaṃ vinyasēdyastu tasya grahabhayaṃ harēt । trivāraṃ japamānastu dattaṃ vāryabhimantrya cha ॥ 28 ॥
prāśayēdyō narō mantraṃ nṛsiṃhadhyānamācharēt । tasya rōgāḥ praṇaśyanti yē cha syuḥ kukṣisambhavāḥ ॥ 29 ॥
kimatra bahunōktēna nṛsiṃhasadṛśō bhavēt । manasā chintitaṃ yattu sa tachchāpnōtyasaṃśayam ॥ 30 ॥
garjantaṃ garjayantaṃ nijabhujapaṭalaṃ sphōṭayantaṃ haṭhantaṃ rūpyantaṃ tāpayantaṃ divi bhuvi ditijaṃ kṣēpayantaṃ kṣipantam । krandantaṃ rōṣayantaṃ diśi diśi satataṃ saṃharantaṃ bharantaṃ vīkṣantaṃ ghūrṇayantaṃ śaranikaraśatairdivyasiṃhaṃ namāmi ॥
iti śrībrahmāṇḍapurāṇē prahlādōktaṃ śrī nṛsiṃha kavacham ।
Browse Related Categories: