Vishnu · Traditional devotional text · Source: vignanam.org (Traditional devotional text (public-domain shlokas))
రుచిరకంపితకుండలమండలః సుచిరమీశ ననర్తిథ పన్నగే । అమరతాడితదుందుభిసుందరం వియతి గాయతి దైవతయౌవతే ॥1॥
నమతి యద్యదముష్య శిరో హరే పరివిహాయ తదున్నతమున్నతమ్ । పరిమథన్ పదపంకరుహా చిరం వ్యహరథాః కరతాలమనోహరమ్ ॥2॥
Offered for worship and study, not as prediction. Non-commercial.
More devotional texts
త్వదవభగ్నవిభుగ్నఫణాగణే గలితశోణితశోణితపాథసి । ఫణిపతావవసీదతి సన్నతాస్తదబలాస్తవ మాధవ పాదయోః ॥3॥
అయి పురైవ చిరాయ పరిశ్రుతత్వదనుభావవిలీనహృదో హి తాః । మునిభిరప్యనవాప్యపథైః స్తవైర్నునువురీశ భవంతమయంత్రితమ్ ॥4॥
ఫణివధూగణభక్తివిలోకనప్రవికసత్కరుణాకులచేతసా । ఫణిపతిర్భవతాఽచ్యుత జీవితస్త్వయి సమర్పితమూర్తిరవానమత్ ॥5॥
రమణకం వ్రజ వారిధిమధ్యగం ఫణిరిపుర్న కరోతి విరోధితామ్ । ఇతి భవద్వచనాన్యతిమానయన్ ఫణిపతిర్నిరగాదురగైః సమమ్ ॥6॥
ఫణివధూజనదత్తమణివ్రజజ్వలితహారదుకూలవిభూషితః । తటగతైః ప్రమదాశ్రువిమిశ్రితైః సమగథాః స్వజనైర్దివసావధౌ ॥7॥
నిశి పునస్తమసా వ్రజమందిరం వ్రజితుమక్షమ ఏవ జనోత్కరే । స్వపతి తత్ర భవచ్చరణాశ్రయే దవకృశానురరుంధ సమంతతః ॥8॥
ప్రబుధితానథ పాలయ పాలయేత్యుదయదార్తరవాన్ పశుపాలకాన్ । అవితుమాశు పపాథ మహానలం కిమిహ చిత్రమయం ఖలు తే ముఖమ్ ॥9॥
శిఖిని వర్ణత ఏవ హి పీతతా పరిలసత్యధునా క్రియయాఽప్యసౌ । ఇతి నుతః పశుపైర్ముదితైర్విభో హర హరే దురితైఃసహ మే గదాన్ ॥10॥
Browse Related Categories: