Vishnu · Traditional devotional text · Source: vignanam.org (Traditional devotional text (public-domain shlokas))
త్వయి విహరణలోలే బాలజాలైః ప్రలంబ- ప్రమథనసవిలంబే ధేనవః స్వైరచారాః । తృణకుతుకనివిష్టా దూరదూరం చరంత్యః కిమపి విపినమైషీకాఖ్యమీషాంబభూవుః ॥1॥
అనధిగతనిదాఘక్రౌర్యవృందావనాంతాత్ బహిరిదముపయాతాః కాననం ధేనవస్తాః । తవ విరహవిషణ్ణా ఊష్మలగ్రీష్మతాప- ప్రసరవిసరదంభస్యాకులాః స్తంభమాపుః ॥2॥
Offered for worship and study, not as prediction. Non-commercial.
More devotional texts
తదను సహ సహాయైర్దూరమన్విష్య శౌరే గలితసరణిముంజారణ్యసంజాతఖేదమ్ । పశుకులమభివీక్ష్య క్షిప్రమానేతుమారా- త్త్వయి గతవతి హీ హీ సర్వతోఽగ్నిర్జజృంభే ॥3॥
సకలహరితి దీప్తే ఘోరభాంకారభీమే శిఖిని విహతమార్గా అర్ధదగ్ధా ఇవార్తాః । అహహ భువనబంధో పాహి పాహీతి సర్వే శరణముపగతాస్త్వాం తాపహర్తారమేకమ్ ॥4॥
అలమలమతిభీత్యా సర్వతో మీలయధ్వం దృశమితి తవ వాచా మీలితాక్షేషు తేషు । క్వ ను దవదహనోఽసౌ కుత్ర ముంజాటవీ సా సపది వవృతిరే తే హంత భాండీరదేశే ॥5॥
జయ జయ తవ మాయా కేయమీశేతి తేషాం నుతిభిరుదితహాసో బద్ధనానావిలాసః । పునరపి విపినాంతే ప్రాచరః పాటలాది- ప్రసవనికరమాత్రగ్రాహ్యఘర్మానుభావే ॥6॥
త్వయి విముఖమివోచ్చైస్తాపభారం వహంతం తవ భజనవదంతః పంకముచ్ఛోషయంతమ్ । తవ భుజవదుదంచద్భూరితేజఃప్రవాహం తపసమయమనైషీర్యామునేషు స్థలేషు ॥7॥
తదను జలదజాలైస్త్వద్వపుస్తుల్యభాభి- ర్వికసదమలవిద్యుత్పీతవాసోవిలాసైః । సకలభువనభాజాం హర్షదాం వర్షవేలాం క్షితిధరకుహరేషు స్వైరవాసీ వ్యనైషీః ॥8॥
కుహరతలనివిష్టం త్వాం గరిష్ఠం గిరీంద్రః శిఖికులనవకేకాకాకుభిః స్తోత్రకారీ । స్ఫుటకుటజకదంబస్తోమపుష్పాంజలిం చ ప్రవిదధదనుభేజే దేవ గోవర్ధనోఽసౌ ॥9॥
అథ శరదముపేతాం తాం భవద్భక్తచేతో- విమలసలిలపూరాం మానయన్ కాననేషు । తృణమమలవనాంతే చారు సంచారయన్ గాః పవనపురపతే త్వం దేహి మే దేహసౌఖ్యమ్ ॥10॥
Browse Related Categories: